لینچنگ اردو کی - کالم از کے این واصف

14/اپریل تجزیہ کے۔این۔واصف

"لینچنگ" یہ انگریزی کا کوئی نیا لفظ نہیں ہے۔ مگر پچھلے چار ، پانچ سال میں یہ لفظ کچھ زیادہ ہی سنا اور پڑھا جا رہا ہے۔ جس کے معنی اجتماعی طور پر یا گروپ کی شکل میں کسی پر حملہ آور ہونا ہے جس کا مقصد جسمانی اذیت پہنچانا یا جان سے مار ڈالنا ہوتا ہے۔ کسی زمانے میں سفید فام امریکی سیاہ فام افراد کی لینچنگ (Lynching) کیا کرتے تھے۔ آج کل ہندوستان میں یہ غیر قانونی اور غیر انسانی عمل "بھگوا بریگیڈ" نے ا پنے ہاتھ میں لے رکھا ہے۔ یہ لوگ کسی پر بھی فرضی جرم عائد کر دیتے ہیں اور فوری مبینہ مجرم کو سزا بھی دے دیتے ہیں۔ پچھلے چار پانچ سال کے عرصہ میں ملک میں پیش آ رہے لینچنگ کے واقعات میں اب تک ہزاروں افراد زخمی اور بیسیوں اپنی جان گنوا چکے ہیں۔
خیر ہمیں ملک میں پھیلی اس لاقانونیت اور افراتفری پر بحث کرنا فی الحال ہمارا موضوع نہیں ہے بلکہ ہمارا موضوعِ بحث اردو زبان پر کی جا رہی "لینچنگ" ہے جو خود اردو والے کر رہے ہیں۔ ویسے اردو والوں کا یہ عمل برسوں سے جاری ہے۔
کوئی دو ہفتہ قبل اردو والوں کی لینچنگ سے ایک موت ہوئی ، مقتول کی عمر 25 سال تھی جو 1994 ء میں سعودی عرب کے شہر جدہ میں پیدا ہوا تھا۔ اس نے بڑی تیزی سے مملکت اور خلیجی ممالک میں اپنی پہچان بنالی تھی۔ مگر وہ 22 مارچ 2019 ء کو ختم ہو گیا۔ اس کی موت اہل اردو کی لینچنگ سے ہوئی۔
جی ہاں ہم بات کر رہے ہیں سعودی عرب سے شائع ہونے والے پہلے اردو اخبار "اردو نیوز" کی۔ عرب دنیا سے شائع ہونے والا یہ پہلا اردو روزنامہ مملکت سمیت سارے خلیجی ممالک میں دستیاب کرایا جاتا تھا۔ یہ اخبار ایک بڑے اشاعتی ادارے "سعودی ریسرچ اینڈ پبلیشنگ کمپنی" (SRPC) کے زیر اہتمام شائع ہوتا تھا جو سعودی عرب کا ایک نامور ادارہ ہے۔ اس ادارے کے تحت کئی عربی روزنامے ، ہفتہ وار اور ماہنامہ شائع ہونے کے علاوہ انگریزی اخبار "عرب نیوز" ، "اردو نیوز" اور "ملیالم نیوز" بھی شائع ہوتے تھے۔ ملیالم نیوز اور اردو نیوز 1994 ء میں شائع ہونا شروع ہوئے تھے جبکہ انگریزی اخبار 'عرب نیوز' کوئی 50 سال سے شائع ہو رہا ہے اور اس کی اشاعت اب بھی جاری ہے۔ 'اردو نیوز' ایک بڑے ادارے کے زیر اہتمام شائع ہونے کے باوجود کبھی مالی اعتبار سے خود کفیل نہ ہو سکا۔ پھر بھی SRPC نے اسے 25 سال جیسے طویل عرصہ تک جاری رکھا۔ اردو نیوز کے کارکنان، ایک اچھا اور معیاری اخبار نکالنے کے علاوہ ہمیشہ اس کوشش میں لگے رہتے تھے کہ کسی طرح اس اخبار کی تعداد اشاعت بڑھے اور کسی طرح اخبار کے لئے اشتہارات حاصل کئے جائیں لیکن داد دیجئے اردو کمیونٹی کو جو 25 سال میں ٹس سے مس نہ ہوئی اور انجان بنی رہی۔ کبھی یہ نہیں سوچا کہ اپنی زبان کے اخبار کو بچانے ، زندہ رکھنے میں اپنا انفرادی فرض ادا کرتے ہو ئے روزانہ صرف ایک اخبار ہی خرید لیا جائے۔ سعودی عرب میں ہند و پاک کے اردو جاننے والوں کی تعداد لاکھوں میں ہے لیکن اردو نیوز کی تعداد اشاعت چند ہزار سے آگے نہیں بڑھی۔ یعنی اردو والوں کی جملہ آبادی میں چند ایک ہزار اخبار خرید کر پڑھتے تھے ، کچھ یہاں وہاں سے مانگ کر پڑھ لیتے تھے یا پھر چائے خانوں یا ریسٹورنٹس وغیرہ میں اخبار دیکھ لیا کرتے تھے اور بخدا ہمارے کچھ جاننے والے ایسے بھی ہیں جنہیں آج تک پتہ نہیں کہ سعودی عرب سے ایک اردو اخبار شائع ہوتا تھا۔ جو بھی ہو 25 سال اپنی بقاء کی جنگ لڑتے لڑتے ایک دن ختم ہو گیا۔
جس طرح لینچنگ کے نتیجہ میں ہوئے قتل کیس میں مقتول کی نشاندہی مشکل ہوتی ہے ، یہی حال اخبار "اردو نیوز" کے ختم ہونے کے معاملے میں بھی ہے کیونکہ کسی کو پتہ نہیں کہ یہ اخبار کیوں بند ہوا۔ اس میں کس کا تجاہل رہا ، کس کی بے توجہی اور کس کی لاپرواہی کے نتیجہ میں یہ اخبار بند ہوا؟
بس حقیقت یہ ہے کہ 25 سال بعد ایک اخبار بند ہوگیا۔

یہاں ہمیں ڈاکٹر انور معظم کی نظم "قتل ہوا ہے" یاد آ رہی ہے۔ اس کو معروف ڈرامہ نگار بھاسکر شوالکر نے ایک Play کی شکل دیکر اسٹیج پر بھی پیش کیا تھا۔ اسٹیج پر یہ ڈرامہ کچھ یوں شروع ہوتا ہے کہ ایک بڑے کینوس پر کٹے پھٹے انسانی عضاء بکھرے پڑ ے ہیں جو ایک علامتی لاش ہے۔ پانچ یا چھ افراد کا ایک گروپ اس پینٹنگ کے اطراف "قتل ہوا ہے" کا ورد کرتے ہوئے گھوم رہا ہوتا ہے۔ دو چار چکر کاٹنے کے بعد گروپ اچانک رک جاتا ہے اور ان میں سے ایک جو حاکم یا منصف ہے ، گروپ کے ایک شخص کی طرف اشارہ کرتے کہتا ہے : "یہ قتل تم نے کیا ہے"۔ وہ شخص جواب دیتا ہے کہ "میں نے تو اس کا ہاتھ توڑا تھا، میں نے اس کی جان نہیں لی۔ لہذا میں قاتل نہیں ہو سکتا"۔
یہ گروپ دوبارہ سے "قتل ہوا ہے ۔۔۔ قتل ہوا ہے" کا جملہ دہراتے پھر پینٹنگ کے گرد چکر لگاتا ہے اور کچھ لمحے بعد منصف رک کر دوسرے شخص سے وہی سوال کرتا ہے کہ کیا یہ قتل تم نے کیا ہے؟ اس شخص کا جواب بھی وہی ہوتا ہے ، میں نے تو صرف اس کی ٹانگ توڑی تھی۔ میں نے اس کی جان نہیں لی۔ لہذا میں قاتل نہیں ہوں۔ منصف پانچوں افراد سے یہی سوال کرتا ہے اور سب کا جواب وہی ہوتا ہے۔ آخر میں منصف یہ کہتا ہے کہ قاتل میں ہوں کیونکہ میں کسی کو قاتل ثابت نہیں کر پایا۔

اس ڈرامہ میں کم از کم کوئی تو الزام اپنے سر لیتا ہے۔ مگر ہم اہل اردو اپنی زبان کو اپنے تجاہل عارفانہ سے مسلسل ضرب تو لگا رہے ہیں مگر کوئی یہ ماننے کو تیار نہیں کہ اردو کو گمنامی کے اندھیروں کی طرف ڈھکیلنے میں کس کا ہاتھ ہے؟ دوسری طرف اردو والے یہ کہتے نہیں تھکتے کہ ۔۔۔
اردو دشمن طاقتوں نے اس زبان کا یہ حشر کیا ہے۔۔۔
حکومت کی عدم سرپرستی نے اردو کو کم کمزور کیا ہے۔۔۔
اردو تعصب کا شکار ہوئی ہے۔۔۔
مگر کوئی اردو والا اپنے گریبان میں جھانکنے کی زحمت نہیں کرتا کہ ہم نے اپنی انفرادی حیثیت میں اپنی زبان کیلئے کیا کیا؟!

یہاں "اردو نیوز" اخبار پر گفتگو ہم نے محض اس لئے کی کہ اس روزنامہ کو بند ہوئے ہفتہ ، دس دن ہی ہوئے ہیں۔ یہ ایک تازہ سانحہ ہے۔ ورنہ ہم نے پچھلے چند برسوں میں کئی روزنامہ ، ہفتہ وار اور ماہناموں پر مٹی ڈالی ہے۔ جن میں سے چند ایک نام جو فی الحال ذہن میں ہیں، کا ذکر کروں گا جیسے ۔۔۔
اردو ملاپ ، اردو بلڈس، اردو میگزین (جدہ)، شمع ، بیسویں صدی ، بانو ، کھلونا ، شب خون وغیرہ وغیرہ ۔۔۔
شامل ہیں اور اس فہرست میں بہت آگے گئے اور کچھ تیار بیٹھے ہیں کہ مصداق آنے والے برسوں میں ہم یا ہماری آنے والی نسل رہے سہے اردو کے اخبار ، رسالوں پر خاک ڈالے گی اور عربی زبان کے بعد اردو میں جو ہمارا دینی سرمایہ کتب خانوں اور شخصی لائبریریوں میں موجود ہے ، وہ دیمک کی غذا بن جائے گا۔

اب آیئے ہم اردو اخبارات و رسائل کو جاری یا زندہ رکھے جانے کے بارے میں کچھ تدابیر پر غور کریں۔
بے شک جرائد و رسائل صرف اس کی تعداد اشاعت میں اضافہ ہونے یا بڑھ جانے سے زندہ نہیں رہ سکتے بلکہ وہ اشتہارات کے بل بوتے پر ہی کھڑے رہ سکتے ہیں اور اشتہارات اسی وقت حاصل ہوتے ہیں جب جرائد و رسائل مقبول ہوں اور مقبولیت اسی وقت ہوگی جب ان کی اشاعت کی تعداد بڑھے گی کیونکہ اشتہار دینے والے یہی دیکھتے ہیں کہ ان کا پیام کتنے افراد تک پہنچے گا؟ لہذا جتنی سرکولیشن بڑھے گی اتنے زیادہ اشتہار ملیں گے اور اشتہار ملیں گے تو ادارے کی آمدنی بڑھے گی اور آمدنی بڑھے گی تو ادارے کے ٹکے رہنے کی ضمانت ہوگی۔
یہاں ہم ایک اور بات واضح کرنا چاہیں گے کہ اردو کے اخبار یا رسائل خریدنا صرف ان کی ذمہ داری نہیں، جو اردو پڑھنا جانتے ہیں بلکہ ہر اس صاحب حیثیت شخص کو اردو اخبار یا رسالے خریدنے چاہئے جس کی مادری زبان اردو ہے۔ جو اظہار خیال اردو میں کرتا ہے۔
اردو اخبار ، رسائل یا کتابیں ہمیں یہ سمجھ کر خریدنا چاہئے کہ ہماری کمائی پر ہماری زبان کا بھی حق ہے۔ آپ تصور کر کے دیکھیں کہ ہر اردو بولنے والا اپنی کمائی کا ایک معمولی سا حصہ اپنی زبان پر زبان کا ٹیکس ہی سمجھ کر خرچ کرے تو ہندوستان میں ایک انقلاب بپا ہو جائے گا۔ اردو روزگار کی زبان بن جائے گی۔ نئی نسل اردو پڑھنے کی طرف راغب ہوگی۔ اس کا سماجی اور سیاسی سطح پر بھی فائدہ ہوگا۔ آج جو اخبار سینکڑوں یا ہزاروں کی تعداد میں شائع ہوتے ہیں ، اگر ان کی تعداد اشاعت لاکھوں میں پہنچ جائے گی تو ہماری زبان کی اہمیت اور وقعت بڑھ جائے گی۔ آج اردو اخبار میں کوئی خبر یا ہمارا مطالبہ شائع ہوتا ہے تو وہ گنبد کی آواز کی طرح اردو حلقوں میں بلند ہو کر رہ جاتی ہے۔ اگر ہماری آواز لاکھوں صفحات پر شائع ہوگی تو اس کی طاقت بڑھے گی اور اقتدار کے ایوانوں تک پہنچے گی ، ہماری آواز ہمارے مسائل صاحبانِ اقتدار کے کانوں تک گونجیں گے۔

بہرحال اب بھی تاخیر نہیں ہوئی ہے۔
ہر اردو والا اپنی انفرادی ذمہ داری نبھائے ، اردو اخبار ، رسائل اور کتابیں خریدنا اپنی عادت بنالے ، اپنے بچوں کو اردو سکھایئے ، نئی نسل میں اپنی زبان اور اس سے جڑی تہذیب کو منتقل کریں تو اردو کو اپنا کھویا ہوا وقار واپس حاصل ہوگا۔
ورنہ اردو زبان صرف بول چال کی زبان بن کر رہ جائے گی۔

بشکریہ: روزنامہ "سیاست" (حیدرآباد)۔ اتوار ایڈیشن، 14/اپریل 2019۔
***
knwasif[@]yahoo.com
موبائل : 00966509834206

کے۔ این۔ واصف

Lynching of Urdu. - Column by: K. N. Wasif