قلم کا ایک امانت دار - سید منیر نیازی کولکاتا - Taemeer News | A Social Cultural & Literary Urdu Portal | Taemeernews.com

2015-09-11

قلم کا ایک امانت دار - سید منیر نیازی کولکاتا

syed munir niyazi kolkata
اخبار کے پیشے میں دو شعبے ہوتے ہیں ایک ٹیبل ورک کرنے والوں سے متعلق ہوتا ہے تو دوسرا فیلڈ ورک کرنے والوں سے۔ عموماً فیلڈ ورک کے لوگ پورے معاشرے میں نہ صرف معروف ہوتے ہیں بلکہ خاصے بااثر و بارُسوخ اور معاملاتِ زندگی میں ٹیبل ورک والوں سے کہیں ترقی یافتہ ہوتے ہیں۔
ہم نے جس اخبار میں بیس برس سے زائد وقت گزارا وہاں کے لوگ اور وہ زمانہ سب یاد ہے۔ نیاز اعظمی ہمارے سب سے پہلے صحافی دوست تھے، جو اُس اخبار کے عملے میں تنہا M.A. تھے۔ کلکتہ یونیورسٹی کے گولڈ میڈلسٹ نیاز اعظمی ممبئی کے دونوں بڑے اخبار میں کام کر چکے تھے ، یاد آیا کہ جب ممبئی سے روزنامہ قومی آواز جاری ہوا تو نیاز اعظمی نے وہاں بھی ڈیسک انچارج کے طور پر کام کیا تھا۔جسکے سربراہ خلیل زا ہد، ابھی موجود ہیں۔ نیازاعظمی کی اہلیہ ٹی بی جیسے مہلک مرض میں مبتلا ہوئیں تو نیاز اعظمی نے اُنھیں بہ غرضِ علاج ممبئی بلا لیا اور سیوڑی کے مشہور ٹی بی ہسپتال میں داخل کیا۔ نیازاعظمی چونکہ اخبار میں کام کرتے تھے اور نیوز ایڈیٹر تھے، لہٰذا ان کی ڈیوٹی شام ہی کی ہوتی تھی اور رات 12 بجے سے پہلے انھیں دفتر سے چھٹی نہیں ملتی تھی۔ چونکہ ہسپتال میں مریضوں کی عیادت کا وقت شام ہی کا ہوتا ہے تو نیاز اعظمی صرف چھٹی والے دن ہی اپنی اہلیہ سے ملنے ہسپتال جاتے تھے۔
ایک دن جب اُنہوں نے تاسف بھرے لہجے میں اپنی اس لاچاری کا ذِکر کیا تو ہمارا دِل بھی بھر آیا ہم دوسرے دن اپنی بیگم کے ساتھ ہسپتال گئے چونکہ ٹی بی کے علاج میں ایک طویل مدت لگتی تھی جہاں تک یاد آتا ہے کہ وہ محترمہ کوئی مہینے بھر سے زائد ، ٹی بی ہسپتال میں زیر علاج رہیں اور جب وہاں سے ڈِسچارج ہوئیں تو باندرہ کی مشہور جھونپڑ پٹی جو بہرام نگر کے نام سے معروف تھی ، ٹی بی کی یہ مریضہ ہسپتال سے سیدھے اسی بہرام نگر کے ایک نہایت معمولی سے جھونپڑے میں منتقل ہوئیں۔
یہاں یہ بتانا مقصود تھا کہ ایک بڑے اخبار کے نیوز ایڈیٹر نیاز اعظمی کے پاس اپنی بیمار بیوی کیلئے ممبئی جیسے شہر میں کوئی ایسی جگہ نہیں تھی جہاں چند دِن اسے رکھ سکیں۔ نیاز اعظمی اس شہرِ غدار میں بیمار ہوئے اور اپنے وطن دیِدار گنج (اعظم گڑھ) چلے گئے، وہاں کب اُن کا انتقال ہوا ؟ ہم اخبار والوں کو بھی پتہ نہیں چلا۔
نیاز اعظمی جیسا کوئی اُردوصحافی ہمارے نزدیک اس وقت کم از کم اس شہر میں تو ایک بھی نہیں ہے۔ ان کے ہاں نیوز سینس نہایت اعلیٰ درجے کا تھا زبان وبیان کا تو جواب ہی نہیں تھا، تھے تو وہ اخبار ہی کے آدمی مگر شعر و ادب کا نفیس ذوق رکھتے تھے۔ یہ باتیں نیاز اعظمی ہی کے ہم منصب اور ہم پیشہ سید منیر نیازی کے انتقال پر یاد آئیں۔ یہ موصوف بھی کلکتے کے ایک بڑے اخبار میں ڈیسک انچارج کے طور پر اپنی عمر کا بڑا حصہ گزار کر وطن مالوف غازی پور منتقل ہوگئے تھے اور گزشتہ 26/ اگست کو کوئی 80 برس کی عمر میں اللہ کو پیارے بھی ہو گئے۔ کلکتے کے اخبار والوں نے اُن کی خبر چھاپ کر اپنی ذمے داری ادا کر دی اور بس۔۔۔!
ایک اخبارچی کو اور کیا ملتا۔۔۔!!

منیر نیازی سے پہلی بار کلکتے کے سب سے بڑے اُردو اخبار کے دفتر میں ملاقات ہوئی تھی ، وہی روایتی چہرے مُہرے اور ممبئی کی زبان میں کہا جائے تو سوکھے ہوئے چہرے پر حالات کی حزنیہ کہانی لکھی ہوئی تھی۔ ان سے مل کر جب اخبار کے چیف ایڈیٹر کے کیبن پر نظر پڑی (جب کہ ہم چیف ایڈیٹر ہی سے ملنے گئے تھے۔) تو ان حضرت کی رنگین تصویر دیکھی تو کلہّ بھرا ہوا تھا اور سپید رنگ کے لحیم و شحیم شخص کا چہرہ ایسے لگ رہا تھا کہ اگر کوئی منہ نوچ لے تو خون کی دھار، ابھی بہہ نکلے۔ یہ صورت دیکھ کر ایک بار منیر نیازی کے "چہرے" کی طرف دیکھا تو سرخ و سپید چہرے والے سے پھر ملنے کی خواہش دم تو ڑ گئی بلکہ قلب و ذہن میں ایک منفی لہر سی محسوس ہوئی، وہ لہر تو اب نہیں مگر اس کا تاثر اب تک ذہن پر باقی ہے۔

سید منیر نیازی کے انتقال کی خبر کے ساتھ یہ بھی سنا کہ پسماندگان بس "زندگی" گزار رہے ہیں۔ کلکتے کے جس اخبار میں منیر نیازی کام کرتے تھے اس کے اداریے مشہور تھے، منیر نیازی خبر کی ترجمہ نگاری اور ایڈیٹنگ کے ساتھ اداریہ نویسی بھی کرتے تھے اور جب چیف صاحب ، پارلیمان کے ممبر بن گئے تو اِس اخبار کے بیباک اداریے انہی منیر نیازی کے قلم سے نکلتے تھے۔ کلکتے کے تمام اہلِ علم اور باخبر حضرات منیر نیازی کی بوقلمونی اوراُن کی سادہ مزاجی کے سبب ان کی عزت و احترام کرتے تھے۔
مگر اس عزت و احترام سے۔۔۔۔'زندگی کے مسائل'۔۔۔۔تو حل نہیں ہوتے۔۔۔!

سید منیر نیازی ،غازی پور میں اپنی صاف ستھری زندگی کے ساتھ رخصت ہوگئے یہ کم بڑی بات نہیں کہ ان کے صحافتی کردار پر ایک معمولی سا دھبہ تو دور ایک چھینٹا بھی نہیں تھا۔۔۔ یاد آتا ہے کہ جب کلکتے کی چونا گلی میں حکیم حسینی کے گھر منیر نیازی سے آخری ملاقات ہوئی تو اُن سے بہت سی باتیں ہوئی تھیں، ان کا بیان یہاں ممکن نہیں مگر ایک سینئر صحافی کی طرف سے ایک جونئیر اخبارچی کو بڑی بلیغ نصیحت کی تھی انہوں نے۔۔۔۔
"ندیم میاں! قلم ہمارے آپ کے پاس ایک امانت ہے۔ یہ اپنی ذات کا اشتہار لکھنے کیلئے نہیں ہوتا۔۔"

۔۔۔ ایسے ہی قلم کے امین تھے۔۔۔اور منیر بھی۔۔۔ سید منیر نیازی!!
ان کی 'سیدی' ان کے ساتھ کیا آج بھی روشن نہیں ہے؟!

***
Nadeem Siddiqui
ای-میل : nadeemd57[@]gmail.com
ندیم صدیقی

Syed Munir Niazi, a trusted journo from Kolkata. Article: Nadeem Siddiqui

2 تبصرے:

  1. سید مکرم نیاز صاحب۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ بہت شریہ نیم صدیقی کا مضمون ٹیگ کرنے کا۔۔۔۔۔۔۔۔۔۔۔۔۔۔۔۔۔۔۔بعض اوقات کسی سچ کا بیان بہت کٹھن ہوتا ہے۔۔۔۔۔۔۔۔۔۔۔۔۔۔۔۔۔۔۔۔۔۔۔ 28 اگست کو کلکتہ سے فہیم انور کا ایک ایسیم ایس آیا۔۔۔۔۔۔۔۔۔۔۔۔۔۔۔آج ہماری ٹیم کا ایک اور ممبر کم ہو گیا۔۔۔۔۔۔۔۔۔۔۔۔۔۔ دوپہر کا وقت تھا۔۔۔۔۔۔۔۔۔۔۔۔۔۔۔۔۔۔۔ میں سو کر اٹھا ہی تھا۔۔۔۔۔۔۔۔۔۔۔جی سائیں سے ہو گیا۔۔۔۔۔۔۔۔۔۔۔۔۔۔۔۔۔۔۔ فہیم کو فون کیا وہ ریسیو نہیں کر سکے۔۔۔۔۔۔۔۔۔ میں انقلاب اور راشٹری سہارا کو چھوڑ کر دہلی کے سارے اردو اخبارات منگاتا ہوں مگر کسی میں کوئی ایسی خبر شائع ہونے کی امید نہیں تھی جس کا تعلق میری ٹیم کے کسی فرد سے ہو۔۔۔۔۔۔۔۔۔۔۔۔۔تھوڑی دیر میں ظفر انور نے فون کیا اور بتایا کہ نیازی صاحب کے انتقال کی خبر ان کے ہندوستان ایکسپریس میں بھی چھپی ہے۔۔۔۔۔۔۔۔۔۔۔۔۔۔خبر دیکھی اور اس کجے بعد سے جو کیفیت ہے بیان سے باہر۔۔۔۔۔۔۔۔چھ لکھنا چاہا چند سطروں سے آ گے نہیں بڑھ سکا۔۔۔۔۔۔۔۔۔۔۔۔۔تقریباََ دو ہفتے ہو چکے ہیں ۔۔۔۔۔۔۔۔۔۔۔۔۔۔۔۔۔۔۔۔۔۔ اس پر یقین یہ نہیں ہوتا۔۔۔۔۔۔۔۔۔ خوب دکھا ہوا ہے دل۔۔۔۔۔۔۔۔۔۔۔۔۔۔۔۔۔ لکھوں گا۔۔۔۔۔۔۔۔۔۔۔۔۔۔۔۔ نیازی صاحب کے ساتھ میرا تعلق اپریل 1980 سے ابھی جولائی تک رہا۔۔۔۔۔۔۔۔۔۔۔۔۔۔ سمجھ میں نہیں آتا کہاں سے شروع کروں۔۔۔۔۔۔۔۔۔۔۔۔۔۔۔۔۔۔بس اتنی بات ہے کہ نیازی صاحب تقریباََ گھر کے فرد ہوچکے تھے۔۔۔۔۔۔۔۔۔۔۔۔۔۔جولائی میں بھی ان سے جو بات ہوئی وہ مریم کی ضد پر۔۔۔۔۔۔۔۔۔۔۔۔۔۔۔۔۔۔۔ دکھ بھرا معاملہ ہے مگر دلچسپ بھی ہے۔ 27 جولائی کو سابق صدر عبدالکلام کے انتقال کے بعد والا دن تھا۔۔۔۔۔۔۔۔۔۔۔۔۔۔۔۔میں دیر تک سوتا ہوں۔ ا ؁ھا تو دوپہر تھی۔۔۔۔۔۔۔۔۔۔۔۔۔۔۔۔ چائے، ناشتہ دوائیں دینے کے بعد مسز نے پوچھا کہ آپ نے ابی [ ان کے والد]سے کب سے بات نہیں کی ؟ مین نے کہا تمہاری بات روز پہو جاتی ہے پھر کاہے کا سوال۔ کہنے لگیں ’’وسیم بھائی [ جناب محمد وسیم الحق ، ایڈیٹر اخبارِ مشرق ]سے آخری بار کب ملے ؟ کب بات کی؟ ‘‘بتایا پچھلے سال ستمبر میں۔۔۔۔۔۔۔۔۔۔۔۔ پھر سوال آیا ’’ماسٹر صاحب [حضرت قیصر شمیم ] کو کب سے فون نہیں کیا؟ بہت دن ہو گئے۔ ویسے ابھی اپریل/مئی میں مونو کی شادی میں کئی بار مل کر آیا ہوں۔ تب سوال آیا نیازی صاحب کی خیریت کب سے نہیں پوچھی؟ اور میرے پاس اس کا کوئی جواب نہیں تھا۔ْ۔۔۔۔۔۔۔۔۔۔۔۔۔۔۔۔۔۔۔ نیازی صاحب سے بات ہوئے سال بھر یا اس سے زیادہ ہو چکا تھا۔۔۔۔۔۔۔۔۔۔۔۔۔۔۔مریم نے فون لا کر دیا اور کہا کہ ابھی بات کیجئے۔۔۔۔ مجھ سے بھی مسز سے بھی تفصیل کسی اور موقعہ کیلئے ۔۔۔۔۔۔۔یہاں اس طوالت کی ضرورت اس لئے پڑی کہ نیازی صاحب بچوں سے بھی گھل مل گئے تھے۔۔۔۔۔۔۔۔۔۔۔۔ قیام دہلی کے دوران ان کے اور قریب ہونے اور اس انسان کو دیہکھنے کا موقعہ ملا جس نے صحافت کیلئے اپنی پوری زندگی قربان کر دی ۔۔۔۔۔۔۔۔۔۔۔۔۔۔ یہاں تک کہ اپنی فیملی پر بھی ضرورت بھر توجہ نہیں دے سکے۔۔۔۔خوب دردمند ہونے کے باوجود قسمت کی ہر چوٹ خندہ پیشانی سے اٹھائی۔۔۔۔۔۔۔۔۔۔۔۔۔۔۔۔۔۔۔۔۔ ملال صرف اس کا ہے کہ نیازی کو اس وقت از کار رفتہ قرار دیا گیا جب صحافت کو ان کے تجربہ کی زیادہ ضرورت تھی۔۔۔۔۔۔۔۔۔۔۔۔۔۔۔خبروں کی باکمال ایڈنغ اور چست سرخیاں ہی نیازی کا اکلوتا سرمایہ نہیں تھیںْ۔۔۔۔۔۔۔۔۔۔۔۔۔۔۔۔۔وہ مضامیں بھی بہت سوچ کر لکھتے اور موضوع سے انصاف کرتے تھے۔ میناکشی پورم کو رحمت نگر بنانے کے جشن میں واحد صحافی منیر نیازی کی آواز تھی جس نے اس پورے عمل کو ہلاکت خٰز قرار دیا تھا اور یہ پیشین گوئی کی تھی کہ کنورشن کو نئی جہت ملے گی اور تب جشن آ پ نہیں اغیار مناءٰن گے۔۔۔۔۔۔۔۔۔۔ خبروں کے ترجمہ کو نیازی کو تخلیقی عمل بنا دیا تھا۔۔۔۔۔۔۔۔۔۔۔۔۔۔۔۔۔کہاں کہاں کون کون سے گوشے شمار کئے جائیں۔۔۔۔۔۔۔۔ ندیم کے مضمون کیلئے شکریہ ادا کروں گا کہ انہوں نےء لکھا۔ ایک سچے صحافی کو ایک سچے صحافی کا خراج عقیدت احسان مند کر گیا۔۔۔۔۔۔۔۔۔۔۔۔۔۔۔۔ مجھے موقعہ ملا تو ضرور لکھوں گا۔۔۔۔۔ لکلکتہ سے کمال کا بار بار اصرار آ ارہا ہے۔۔۔۔۔۔۔۔۔۔۔۔۔۔۔۔۔ کئی اور لوگ نیازی پر مضمون مانگ رہے ہیں لیکن نیازی کوئی فرد تھوڑٰے تھے پورا دبستان ہیں ۔۔۔۔۔۔۔۔۔۔ دفتر کے دفتر چاہئیں ین کے بیان کیلئے۔۔۔اور میری ہر روز تیزی سے گرتی ہوئی صحت بھی سنبھلنے کا تقاضا کر رہی ہے۔۔۔۔۔۔۔۔۔۔۔۔۔۔۔۔۔۔۔۔۔ شائد ایک ساتھ نہیں جستہ جستہ کچھ لکھ سکوں مگر لکھنا ہے۔۔۔ ان برسوں کو پھر ایک بار جینا ہے جن برسوں میں ایک صحافینے آنکھیں موند کر اپنا سب کچھ اردو صحافت کیلئے گنوایا مگر آکر کو اپنے میدانِ عمل سے دور ایک گاؤں میں آخری ہچکی لی۔۔۔۔۔۔۔۔۔۔۔۔۔۔۔۔۔

    جواب دیںحذف کریں

  2. نیازی رزق حلال ، قناعت اور قدروں کا احترام
    [اشہر ہاشمی]
    کلکتہ میں ایک ٹرانسپورٹر تھا جے جے رام سنگھ۔۔۔۔۔۔۔۔۔۔۔۔۔۔۔۔۔ لاریاں چلواتا تھا۔۔۔۔۔۔۔۔۔۔۔۔۔ ٹرانسپورٹ لابی ہر شہر میں پاور فل ہے۔۔۔۔۔۔۔۔۔۔۔ کلکتہ میں بھی تھی۔ اسے ٹرانسپورٹ ہڑتال کرانی تھی۔۔۔۔۔۔۔۔۔۔۔۔۔۔۔۔۔۔ بات 1982 کے بعد کسی وقت کی ہے۔ کیونکہ آزاد ہند کا دفتر 22 ساگر دت لین سے 25 ایڈن ہاسپیٹل روڈ منتقل ہو گیا تھا۔۔۔۔۔۔۔۔۔ جے جے رام سنگھ نے پریس ریلیز بھجوائی ۔۔۔۔۔۔نیازی صاحب کو پوچھتا ہوا اس کا کوئی ہرکارہ آیا تھا۔۔۔۔۔۔۔۔۔۔۔۔۔۔ نیازی صاحب کتابت خانہ میں کاتبوں کے ساتھ ماتھا پچی کر رہے تھے۔۔۔۔۔۔۔۔۔۔۔۔۔۔۔۔۔۔ وہ کچھ دیر رکا پھر لفافہ چھوڑ کر جانے لگا تب تک نیازیہ صٓحب آ گئے۔۔۔۔۔۔۔۔۔۔۔۔۔۔۔۔ کیا بات ہے؟ سنگھ صاحب نے خبر بھیجی ہے۔ نیازی خبر لفافہ سے نکال کر پڑھنے لگے۔ اس نے کہا ::’’ یہ بھی ہے ‘‘۔ کہنے لگے ’’چھوڑ دو ۔اب جاؤ‘‘۔ خبر پرڑھ کر ردی کی ٹوکری میں پھینکنے کی بجائے دائیں طرف رکھ لی اور اسے پیپر ویٹ سے دبا دیا۔ پھر دوسرا لفافہ کھولا۔اس میں پیسے تھے۔۔۔۔۔۔۔۔۔۔۔۔۔۔۔۔۔۔۔۔۔۔ لپک کر دروازے کی طرف بھاگے۔۔۔۔۔۔۔۔۔۔۔سیڑھیاں اتر کر لینڈنگ کی کھڑکی سے منہ باہر نکالا ۔وہ نضر آ گیا۔ آواز دی مشکل سے اپنی طرف متوجہ کیا اور اوپر بلایا۔ پھر کرسی پر آکر بیٹھ گئے۔۔۔۔۔۔۔۔۔۔۔۔۔۔۔ ۵ب تک وہ آ چکا تھا۔
    ’’ یہ تم غلطی سے چھوڑے جا رہے ہو‘‘
    اس نے کہا ’’نہیں جے جے رام سنگھ نے آپ کیلئے بھیجا ہے‘‘
    تب تک اس معاملہ میں ہم لوگوں کی دلچسپی پیدا ہو گئی تھی ورنہ آزاد ہند میں کام کا بوجھ وہ ہوتا تھا کہ لوگ آس پاس سے غافل رہتے تھے ۔
    پوچھا ’’ اس میں کیا ہے ؟‘‘
    اس نے کہا ’’ آپ نے دیکھا نہیں ‘‘
    کہنے لگے ’’ دیکھا تو ہے اسی لئے پوچھ رہا پو ۔ ہیں معلعم ہے نا اس میں کیا ہے ‘‘
    کہنے لگا ’’ہاں مجھے معلوم ہے اور تاکید کی گئی ہے کہ آپ کے ہاتھ میں دے کر آؤں‘‘
    شائد تن تک غصہ دبانے کی کوشش کامیاب ہو گئی تھی۔انہوں نے کہا کہ ’’ جے جے رام سنگھ کو فون لگاؤ‘‘
    آفس کا فون استعمال ہوا۔۔۔۔۔۔۔۔۔۔۔۔۔۔۔۔۔۔ادھر سے جے جے رام کی آواز سن کر ہرکارے نے چونگا نیازی صاحب دے دیا ۔انہوں نے بڑی متانت سے کہا’’ پیسے واپس بھیج رہا ہوں۔ مجھے نہیں چاہئیں۔۔۔۔۔خبر چھپ جائے گی۔آپ بے فکر رہیں۔۔۔۔۔۔۔۔۔۔۔۔۔۔۔۔‘‘
    شائد جے جے رام سنگھ کچھ بول رہا تھا مگر نیازی صاحب نے لائن کاٹی ، لفافہ اس کے ہاتھ میں تھمیایا اور اپنے کام میں مصروف ہو گئے۔
    اس لفافہ میں 20 روپے کے نوٹ تھے۔ 50 ہوں گے یا پورے 100۔۔۔۔۔۔۔۔۔۔۔ اس کا اندازہ نہیں مگر 1982 میں اور آزاد ہند کے کسی کاتکن کی میز پر وہ بڑے پیسے تھے۔۔۔۔۔۔ تب نیازی کی تنخواہ کیا تھی معلوم نہیں مگر مہینہ بھر کی نہ سہی آدھے مہینہ یا ایک ہفتہ کی اجرت تو ضرور تھی۔۔۔۔۔۔۔۔۔۔۔۔۔۔۔۔۔ خاموشی سے رکھ لینے میں جاتا بھی کچھ نہیں تھا، رکھ لیتے لیکن مزاج نہیں تھا۔۔۔۔۔۔
    یاد رکھنے کی بات یہ ہے کہ اس پورے عمل میں وہ اپنی تیز مزاجی اور تند خوئی کے باوجود نارمل نہیں تھے ورنہ دیانتداری کا ڈنکا پیٹنے کی خوہش میں آدمی بنگلہ فلم کا ہیرو بن جاتا ہے۔ نیازی نے ایسا کچھ نہیں کیا۔
    جب کہ اسی دفتر مین اور تقریباََ ان ہی دنوں میں ،ایک صاحب نے محمڈن اسپورٹنگ کلب کے اسپورٹس سکریٹری مصطفیَ ماما سے 50 روپے لے کر آسانی سے جیب میں رکھ لئے اور کہا اب تم جاؤ ۔۔۔۔۔۔۔منصور الدین فریدی س کے چشم دید گواہ ہیں۔
    میں نے نیازی سے بہت کچھ سیکھا ہے ۔۔۔۔۔۔۔۔۔۔۔۔۔۔۔۔ یہ بھی کہ ادارہ جتنے پیسے دیتا ہے اس سے ہی گھر چلاؤ۔۔۔۔۔۔۔۔۔۔۔۔۔۔۔ ہاتھ پھیلانے لگے تو اپنی نگاہ میں کوار ہوتے جاؤ گے۔۔۔۔۔۔۔۔۔۔۔۔ مجھے نیازی کے ساتھ کام کرنے پر ناز اس لئے کہ نیازی ان قدروں کے پرچم بردار تھے جو اردو میں ہمیشہ عزیز رہیں گی اردو صرف زبان نہیں ، تہذیب بھی ہے۔

    جواب دیںحذف کریں