دکن کی اردو صحافت - اردو اخبارات از ابتدا تا آزادئ ہند

مضمون محمد اعجاز الدین حامد

دکن کی اردو صحافت کا آغاز ایک تحقیق کے مطابق اخبار "آفتابِ ہند" سے ہوتا ہے جو غدر (1857ء) کے تین سال بعد جاری ہوا تھا۔ اس کے بعد دکن میں اردو اخبارات کی اشاعت کا سلسلہ جاری ہو گیا۔
نظام الاخبار دکن، آصف الاخبار، معلم شفیق، مشیر دکن، علم و عمل، صحیفہ، معارف، رہبر دکن، نظام گزٹ، رعیت، صبح دکن، وقت، منشور، پیام، تنظیم، سلطنت، مملکت، میزان، مستقبل، انقلاب، پرچم، مبصر، اتحاد، آزاد، جناح، معین اور امن ۔۔۔
جیسے بیشتر اخبارات نے قوم کی سیاسی بیداری، قومی یکجہتی، اتفاق و اتحاد، رائے عامہ کو ہموار کرنے، اخلاق عامہ کی درستگی، علم کو پھیلانے عمل کی سمت ابھارنے، سماجی شعور کو بیدار کرنے اور دینی بصیرت کو عام کرنے میں نمایاں حصہ لیا۔

خاص طور پر پولیس ایکشن سے لگ بھگ تیرہ (13) سال قبل جاری ہونے والے اخبار "پیام" نے، جس کے ایڈیٹر جدوجہد آزادئ ہند کے صف اول کے رہنما اور نامور صحافی قاضی عبدالغفار تھے، دکن کی اردو صحافت میں ایک انقلابِ عظیم بپا کر دیا۔ چونکہ قاضی صاحب کا ساتھ مولانا محمد علی جوہر، حکیم اجمل خان اور مولانا ابوالکلام آزاد جیسے رہنمایان ملت کے دم بدم رہا تھا اس لیے بھی قاضی عبدالغفار تمام تر سیاسی نکتوں سے مکمل طور پر آگاہ تھے۔ وہ غلامی کی زنجیروں میں جکڑے ہوئے ہندوستانیوں کے دل کی آواز تھے۔ مولانا محمد علی جوہر کے اخبار "کامریڈ" کے اسٹاف کے ساتھ جب وہ لندن کی گول میز کانفرنس میں شرکت کے لیے گئے تو وہاں سے صحافت کے بارے میں معلومات کا خزانہ لے آئے تھے۔
چنانچہ انہوں نے اپنے اخبار "پیام" کے ذریعہ نہ صرف ہندوستانیوں کی روح کو بیداری کا پیام دیا بلکہ مظلوم عوام کا پیام انہوں نے حکومت کے ایوانوں تک پہنچایا۔ روزنامہ "پیام" کے اداریے بڑے معرکۃ الآرا ہوتے تھے۔ آپ کے بعد جناب اختر حسن صاحب، سابق سکریٹری و ڈائرکٹر اردو اکیڈیمی نے اس اخبار کو خرید لیا اور اس کے تقاضوں کو پورا کیا۔ کچھ دنوں تک "پیام" کانگریس کی حمایت کرتا رہا مگر بعد میں وہ عوام کی آواز بن گیا اور اس نے حق گوئی اور بےباکی کی انوکھی مثال قائم کی۔ بحیثیت مجموعی دکن کی اردو صحافت اخبار "پیام" کے بعد جدید دور میں داخل ہو گئی اور اس طرح سے آج کی صحافت کے لیے مشعل راہ بن گئی۔

اعلیٰ حضرت حضور پرنور ہز اکزالٹیڈ میر عثمان علی خان بہادر بندگان عالی اخبارات و رسائل سے ذاتی و خصوصی دلچسپی رکھتے تھے۔ بیسیوں اخبارات کی آپ نے سرکاری خزانے کے ذریعہ اپنے دستِ خاص سے مالی مدد کی۔
اور دوسری طرف اخبارات و رسائل کی اشاعت کے سلسلے میں سرکار کی جانب سے دئے جانے والے اجازت نامے کے جملہ طریقوں کو نہایت سہل اور سادہ انداز میں مروج کیا تاکہ ایک معمولی سی حیثیت رکھنے والا عام آدمی بھی اخبار شائع کر کے اپنے شوق کو پورا کر سکے۔ حضور نظام کو اشاعت علم کا خاص شوق و شغف تھا، جامعہ عثمانیہ کے قیام اور دارالترجمہ کی تشکیل کے ذریعہ اردو ذریعۂ تعلیم کا تجربہ کر کے اعلی حضرت نے اپنی علم دوستی کا بھرپور مطاہرہ فرمایا تھا۔

اخبارات و رسائل میں اشاعت کی غرض سے اعلی حضرت خود اپنے دستِ مبارک سے لکھا ہوا اپنا تازہ کلام اور دیگر علمی و تنقیدی تبصرے روانہ فرماتے تھے۔ نہ صرف یہ بلکہ شہزادگان والا شان بھی آپ ہی کی ایما پر آپ ہی کی تقلید میں اپنا کلام وغیرہ اشاعت کے لیے مختلف اخبارات کو روانہ کرتے تھے۔ علاوہ ازیں اخبارات کے خاص نمبر و سالنامے بھی اعلیٰ حضرت کے کلام سے لیس ہوتے تھے۔ رسالہ "ہمجولی" کی نسبت اعلیٰ حضرت نے اپنا ذاتی تبصرہ خود تحریر کر کے روانہ فرمایا تھا، چنانچہ آپ کے اس تبصرے کی بعد کے رسالے میں اشاعتِ خاص کر کے مدیر نے عزت حاصل کی۔
جو اخبارات اعلیٰ حضرت کے کلام سے منور ہوتے تھے ان کے نام اس طرح ہیں: نظام گزٹ، یادگار سلور جوبلی آصف سابع، صبحِ دکن، رہبرِ دکن وغیرہ۔
اعلیٰ حضرت کی تخت نشینی (اگست-1911ء) کے وقت جو اخبارات موجود تھے، ان میں مشیر دکن، دکن لاء رپورٹ، آصفیہ گزٹ، علم و عمل، صحیفہ وغیرہ شامل ہیں۔

حیدرآباد دکن کے اخبارات نے یہاں کی سماجی، علمی و تہذیبی اور صحافتی زندگی پر بہت گہرا اثر مرتب کیا۔ دکن کے عوام کی سماجی زندگی کا عکس ان اخبارات میں پورے طور پر واضح ہے۔ حیدرآباد کا تمدن، یہاں کی محفلیں اور معاشرت، لباس اور رہن سہن کے بارے میں یہ اخبارات مکمل معلومات فراہم کرتے ہیں۔ ساتھ ہی یہاں کی علمی و تہذیبی سرگرمیاں بھی ان اخبارات میں شائع شدہ خبروں اور اداریوں میں پوری طرح جلوہ گر نظر آتی ہیں۔

وہ خصوصیات جو آزادی سے قبل شائع شدہ ہندوستان کے دیگر اخبارات کے مقابلے میں حیدرآباد کے اخبارات میں نظر آتی ہیں: وہ ان اخبارات کی زبان، اسلوب، طرز ادا، خبروں کی بےساختگی، اداریوں کی حق گوئی و بےباکی اور اخبارات کے مدیروں کا نڈر و بےخوف ہونا ہے۔
حالانکہ حیدرآباد دکن پر بادشاہِ وقت اعلیٰ حضرت حضور نظام کی حکومت قائم تھی مگر باوجود اس کے، حیدرآباد کے اکثر اخبار انتہائی بےلاگ تھے اور حکومتِ وقت پر بھی (اگر کوئی خامی ان میں نظر آئے) تنقید سے گریز نہیں کرتے تھے۔

دکن کے ان متذکرہ اخبارات کے مختصر جائزے سے یہ ثابت ہوتا ہے کہ ہندوستان کی اردو صحافت کا قیام و استحکام صرف اور صرف دولت عثمانیہ اور اعلیٰ حضرت حضور نظام کی خصوصی عنایت اور ذاتی دلچسپی کا نتیجہ ہے۔ ریاست حیدرآباد اگرچیکہ ایک خودمختار ریاست تھی مگر اس ریاست کے اربابِ اقتدار صحافت کی آزادی، آزادئ رائے اور حق گوئی و بےباکی کو دل سے پسند کرتے تھے اور معاملے میں اپنا کوئی ثانی نہیں رکھتے تھے۔
اگرچیکہ بعض اخبارات پر مملکتِ آصفیہ کا عتاب بھی نازل ہوا تھا مگر اس کی وجہ ذاتی اغراض نہیں بلکہ قومی اور ملی مفادات کی صیانت و پاسبانی کرنا تھا۔
اس دور کے اخبارات جہاں ایک طرف اس زمانے کی تہذیب و شائستگی پر مشتمل ایک مبسوط دستاویز کی حیثیت رکھتے ہیں وہیں وہ عوام اور حکومتِ وقت کے درمیان باہمی تال میل اور ربط و ضبط برقرار رکھنے میں پوری طرح کامیاب و کامران نظر آتے ہیں۔ ان اخبارات کا مطالعہ دراصل ہمیں اس دور کی پوری سیاسی و سماجی اور تہذیبی و تمدنی زندگی سے روشناس کراتا ہے۔

حیدرآباد دکن کے (از ابتداء تا 1947ء) اردو اخبارات کی ایک مکمل فہرست ذیل میں پیش ہے:

فہرست - حیدرآباد دکن کے اردو اخبارات
نمبر شمار	اخبار	سن اشاعت	مدیر
1	آفتاب ہند	1860	قاضی محمد قطب
2	دارالطبع	1869	-
3	متین کرتان	1870	کرتان محی الدین
4	رحمانی	1873	-
5	مفید عام	1878	نارائن سوامی
6	نظام الاخبار دکن	1878	-
7	آصف الاخبار	1878	نارائن سوامی
8	جریدہ اعلامیہ	1880	-
9	معلم شفیق	1880	محب حسن
10	شاہ دکن	1882	اظہر الدین
11	اسلامیہ	1882	محمد حسین
12	شوکت الاسلام	1882	حاجی محمد قاسم کرتان
13	ارم دکن	1883	سید احمد زید بلگرامی
14	احمدی	1883	حمید الدین نعمانی
15	ہزار داستان	1883	مولوی محمد سلطان عاقل
16	محبوب شاہی	1883	منشی غوث الدین
17	پیک آصفی	1884	مولوی سید احمد زید بلگرامی
18	آصفی	1885	سید محمد سلطان اثنا عشری
19	جوہر سخن	1885	عبداللہ خان ضیغم
20	گلزار دکن	1885	قادر علی خان
21	مسرت القلوب	1886	-
22	دکن پنچ	1887	حکیم جگناتھ پرشاد، وکیل ہائیکورٹ
23	مشیر دکن	1892	پنڈت کشن راؤ / پنڈت واسدیو راؤ
24	افسر الاخبار	1887	مشتاق احمد
25	نظام پریس	1887	عبدالسلام عرشی
26	خیال محبوب	1887	عبدالسلام عرشی
27	سفیر دکن	1888	منشی نثار علی شہرت
28	محبوب القلوب	1890	عماد السلطنۃ بہادر
29	نظارہ عالم	1896	منشی قدرت اللہ مضطر
30	مظلوم دکن	1898	عظیم الدین
31	جام جمشید	1901	ابراہیم خان
32	عزیز الاخبار	1902	نواب عزیز جنگ بہادر ولا
33	دکہنی	1903	مولوی محمد عبدالرحیم، وکیل ہائیکورٹ
34	علم و عمل	1904	صادق حسین
35	نظامی	1904	امیر حمزہ
36	محبوب گزٹ	1905	منشی پیارے لال
37	آصفیہ گزٹ	1911	مولوی سید محمد علی عرش ملیح آبادی
38	صحیفہ	1912	مولوی اکبر علی
39	معارف	1913	مولوی امیر حسن
40	عثمان گزٹ	1913	سید رضا شاہ ترمذی انجم
41	بلیٹن	-	میجر کیمرن
42	پولیس گزٹ	1914	-
43	واعظ	1917	مولوی عبدالوہاب عندلیب
44	وقایع دفتر معتمدی مال	1918	مولوی محمد رحمت اللہ
45	بیدر گزٹ	1920	-
46	رہبر دکن	1921	سید احمد محی الدین
47	نظام گزٹ	1927	سید وقار احمد ایم۔اے
48	رعیت	1927	ایم۔ نرسنگ راؤ
49	صبح دکن	1928	احمد عارف / اشرف علی
50	وقت	1928	مولوی محمد عبدالرحمن صاحب رئیس
51	اخبار سرسری	1928	مولوی محمد مظفر الدین خان
52	الحمایت	1929	محمد منیر الدین خان
53	دکن گزٹ	1929	ڈاکٹر مرزا غلام جیلانی
54	منشور / وقت	1930	مولوی محمد عبدالرحمن صاحب رئیس
55	ناندیڑ گزٹ / الاعظم	1931	حکیم غفران احمد
56	پیام	1935	قاضی عبدالغفار / اختر حسن
57	تنظیم	1936	علی اشرف
58	سلطنت	1938	سید سعد اللہ قادری
59	مملکت	1941	میر حسن الدین (بی۔اے، ایل ایل بی)
60	تاج	1944	سید حسن
61	میزان	1944	غلام محمد
62	مستقبل	1945	-
63	شیراز	1945	سید صمصام شیرازی
64	سید الاخبار	1946	سید صمصام شیرازی
65	البلاغ	1946	عبدالقدوس ہاشمی
66	انقلاب	1946	مرتضی مجتہدی
67	پرچم	1946	فصیح الدین
68	تاجر	1946	بہاؤ الدین محمود سلیم صدیقی
69	مبصر	1947	محمد صفدر اقبال
70	دی اسٹیٹس نیوز	1947	محمد اختر حسین
71	عظیم تر حیدرآباد	1947	عزیز احمد
72	اتحاد	1947	سلطان بن عمر
73	آزادی	1947	سید مختار محمد کرمانی
74	آزاد	1947	ٹھاکر امراؤ سنگھ
75	جناح	1947	سید اظہر حسین رضوی
76	امروز	1947	شعیب اللہ خان
77	معین	1947	سید جعفر اللہ جعفری
78	امن	1947	سوامی واسدیو شاستری

***
ماخوذ از کتاب: حیدرآباد دکن کے اردو اخبارات (از ابتدا تا 1947ء، ایک جائزہ)۔
تصنیف: محمد اعجاز الدین حامد، حیدرآباد۔ (مقالہ برائے ایم۔فل، یونیورسٹی آف حیدرآباد، سن اشاعت: ستمبر 1993ء)۔

Urdu Newspapers of erstwhile state Hyderabad Deccan, from beginning till 1947. Article: Mohammed Aijazuddin Hamed.