ماہنامہ شبستاں دہلی - غالب نمبر 1969 - پی۔ڈی۔ایف ڈاؤن لوڈ

تعارف رسالہ ٹی۔این۔بی

اپنے دور کے ملک گیر شہرت یافتہ اشاعتی گروپ "شمع" نے فلمی/ادبی رسالہ شمع، خواتین کا ماہنامہ بانو، بچوں کا ماہنامہ کھلونا اور بالغوں کے لیے جاسوسی ماہنامے "مجرم" کے علاوہ عام قارئین کے لیے ایک نیم ادبی تفریحی اردو ڈائجسٹ "شبستاں" کی برسوں کامیابی سے اشاعت عمل میں لائی تھی۔
سیر و سیاحت، حالات حاضرہ، تاریخ، جنگ و جدل، جرم و سزا، شکاریات، اسرار و ہئیت، طب و سائنس، دلچسپ و عجیب، ناقابل یقین، نفسیات، شخصیات، انٹرویو، شعر و ادب، غیر ملکی ادب جیسے مختلف و متنوع موضوعات پر مشتمل اس ڈائجسٹ نے اردو داں قارئین میں اپنی مقبولیت قائم کی۔ شبستاں نے چند خاص نمبر بھی شائع کیے ہیں جن میں غالب نمبر اور فیض نمبر نے اردو دنیا میں بےپناہ مقبولیت حاصل کی۔ تعمیرنیوز کی جانب سے "شبستاں" کا خصوصی شمارہ، غالب نمبر - 1969 پیش خدمت ہے۔ 355 صفحات کی اس پی۔ڈی۔ایف فائل کا حجم تقریباً 21 میگابائٹس ہے۔
رسالہ کا ڈاؤن لوڈ لنک نیچے درج ہے۔

"اپنا صفحہ" کے زیر عنوان، اس شمارے کے اداریہ کے تحت مدیران لکھتے ہیں

غالب کی سو سالہ برسی منائی جا رہی ہے اور سو برس کی مدت ایک بڑی لمبی مدت ہوتی ہے لیکن ہم نے شبستاں کے "غالب نمبر" میں سو برس کو مختصر کر کے صرف 354 صفحات میں محدود کر لیا ہے اور ہم مطمئن بھی ہیں کیونکہ پھولوں کی تعداد زیادہ ہوتی ہے اور پھولوں سے نکلنے والے عطر کی مقدار ہمیشہ کم ہوتی ہے۔
یہ غالب نمبر نہیں ایک عطر بیز صحیفہ ہے۔ اس صحیفہ کو ایک صحیفۂ ناطق بھی کہا جا سکتا ہے کیونکہ اس کا ہر صفحہ ایک بولتی ہوئی تصویر ہے۔ اس کے ہر صفحہ میں غالب بھی ہے اور وہ نغمہ بھی جس نے غالب کے لبوں پر دم توڑ دیا تھا اور جسے آج "دیوانِ غالب" کہا جاتا ہے۔۔۔
غالب کے بارے میں شبستاں کی اس دستاویز میں غالب کا ماضی بھی ہے اور حال بھی لیکن اس میں غالب کا مستقبل نہیں ہے کیونکہ غالب کا مستقبل اردو ہے۔ غالب کی مٹی ثمرقند کی تھی، ان کی مادری زبان فارسی تھی لیکن انہوں نے اردو سے محبت کی، اردو میں شاعری کی کیونکہ اردو ہندوستان کی زبان تھی لیکن۔۔۔ یہ غالب کی شومئ قسمت ہی ہے کہ ہندوستان کے پچاس کروڑ بیٹے غالب کی سو سالہ برسی تو منا رہے ہیں لیکن اردو کو اپنے ملک کی زبان تسلیم کرنے سے انکار کر رہے ہیں۔

کچھ دوسرے ایڈیشن کے بارے میں
ہم غالب کو پوری دنیا پر محیط دیکھنا چاہتے تھے۔ ہم ادب کی رفعتوں میں غالب کو تلاش کرنا چاہتے تھے اور ہم خود یہ جاننا چاہتے تھے کہ غالب کون تھے؟ شبستاں کے اضافہ شدہ "غالب نمبر" میں ہم نے اپنی ان ہی تمناؤں کی تکمیل کی ہے۔۔۔ اس میں غالب کا وہ کلام بھی ہے جو دیوانِ غالب میں نہیں تھا، اس میں غالب کے بارے میں کچھ چونکا دینے والے انکشافات بھی ہیں اور اس میں "پوچھتے ہیں وہ کہ غالب کون ہے" کی ایک مکمل تشریح بھی ہے۔
ہمیں پوری امید ہے کہ غالب نمبر کا یہ اضافہ شدہ ایڈیشن اس کہانی کو مکمل کر دے گا جو سابقہ ایڈیشن میں ادھوری رہ گئی تھی۔
----- مدیران

غالب کے انتقال کی خبر سب سے پہلے دہلی کے اکمل الاخبار میں شائع ہوئی تھی اور پھر اسی اخبار کے ذریعے پورے ملک میں پھیلی تھی۔ یہ خبرِ انتقال بھی تھی اور غالب کے حضور میں خراجِ عقیدت بھی ۔۔۔ ذیل میں یہ پوری خبر مع عنوان پیش ہے۔ اس سے صرف غالب کی عظمت کا ہی اندازہ نہیں ہوگا بلکہ یہ بھی معلوم ہو سکے گا کہ آج سے سو برس پیشتر اردو اخبارات کی زبان کتنی مرصع اور کتنی مخلص تھی۔

غالب کی وفات
فضاں اس زمانے غدارے، آہ روزگار ناہنجارے۔ ہر روز نیا رنگ دکھاتا ہے، ہر دم دامِ غم و الم میں پھنساتا ہے۔ اس محیطِ آفت کی موج بلاخیز ہے، اس وادئ ہولناک کی ہوا فتنہ انگیز ہے۔ اس کا آب سراب، اس کی راحت جزو جراحت۔ اس کی رافت سرمایۂ صداقت، اس کی شکر زہرآلود، اس کی امید آرزوئے فرسودہ۔ ہر روز محلِ حیات کو صرصر ممات سے گراتا ہے، ہر دم محفلِ سرور سے صدائے ماتم اٹھاتا ہے۔۔۔ پھول ادھر کھلا ادھر گر پڑا۔ لالہ لباس رنگین میں یہی داغ دل پر رکھتا ہے۔ غنچہ خون جگر سے پرورش پاتا ہے۔ بلبل نوحہ گر چمن ہے اور مرغ سحر خواں اسیرِ محن ۔۔۔
کیا عجب گو آسمان درپئے آزار ہے۔ بھلا اس سے کیا توقع آسودگی جس کا خود گردش پر مدار ہے۔ دیکھو بیٹھے بٹھائے کیا آفت اٹھائی ہے، کس منتخبِ روزگار کی جدائی دکھائی ہے۔ نخلِ برومند سے معانی کو بادِ خزاں سے گرایا، مہرِ سپہرِ سخن دانی کو خاک میں ملایا، جو خسرو کے بعد ملکِ سخن کا خسرو مالکِ رقاب تھا۔ اس کا نامۂ عمر طے ہوا، جو میدانِ سخنوری کا شہسوار مالک رقاب تھا۔ اس کا رخشِ زندگی پے ہوا۔ ان حضرت کی کن کن خوبیوں کا ذکر کیا جائے۔ دریا کوزے میں کیوں کر سمائے۔ حسن خلق میں اخلاق کی کتاب۔ عمیم الاشفاقی میں لاجواب، خوبئ تحریر میں بےنظیر۔ صافی ضمیر جادو تقریر فارسی زبان میں لاثانی، اردوئے معلیٰ کے بانی۔ افسوس جس کا شہباز خیال طائر صدرہ شکار ہو وہ پنجۂ گرگِ اجل میں گرفتار ہو ۔۔۔ اس غم سے سب کی حالت تباہ ہے، روز یہی اس مصیبت میں سیاہ ہے، اب توضیح اجمال و تفصیلِ مقال ہے۔ واضح ہو کہ جنابِ مرحوم دو تین مہینے سے صاحبِ فراش رہے۔ ضعف و نقاہت کے صدمے سہے۔ آٹھ دن انتقال سے پہلے کھانا پینا ترک فرمایا۔ اس دنیائے فانی سے بالکل دل اٹھایا۔ تاآنکہ 15/فروری 1869ء ۔۔۔ روز دوشنبہ کو دوپہر ڈھلے اس خورشیدِ اوجِ فضل و کمال کو زوال ہوا۔۔۔
(بحوالہ: اکمل الاخبار۔ 17/فروری 1869ء)

***
نام رسالہ: شبستاں - غالب نمبر 1969
مدیر: یونس/ادریس/الیاس دہلوی (نگران: یوسف دہلوی مرحوم)
تعداد صفحات: 355
پی۔ڈی۔ایف فائل حجم: تقریباً 21 میگابائٹس
ڈاؤن لوڈ تفصیلات کا صفحہ: (بشکریہ: archive.org)
Shabistan Ghalib Number 1969.pdf

Direct Download link:

GoogleDrive Download link:

ماہنامہ 'شبستاں' - غالب نمبر 1969 :: فہرست
نمبر شمار	تخلیق	تخلیق کار	صفحہ نمبر
الف	اپنا صفحہ	مدیران	5
1	مرزا غالب سے انٹرویو	ملاقاتی	7
2	اے گہوارۂ علم و ہنر	علامہ اقبال	18
3	غدر 1857 میں غالب پر کیا بیتی	بہادر شاہ ظفر	19
4	غالب کے سفر	مرزا سجاد علی خاں اختر	23
5	غالب کو خراج ہائے عقیدت	عرش ملسیانی	29
6	حالی کا مرثیہ	مولانا حالی	34
7	حضرت غوث علی شاہ قلندر کی رند بلانوش سے ملاقات	مختار الدین احمد آرزو	35
8	غالب پر سرسید کا ایک سو بارہ سال پرانا مضمون	سرسید	39
9	غالب کے انتقال پر پہلا مضمون	سید مسعود حسن رضوی	42
10	پہلا غالب پرست	محمد قاسم صدیقی	44
11	غالب کی برسی پر غالب کے نام کی تجارت	غلام احمد فرقت	46
12	غالب کے لطیفے	والی آسی	51
13	نظم: چاندنی رات کا میخوار	شمیم کرہانی	57
14	حیات غالب کے چند ورق	مولانا محمد حسین آزاد	58
15	غالب کی بہو سے ایک ملاقات	حمید احمد خاں	66
16	غالب کی شہرت کا راز	علیم اختر مظفر نگری	70
17	غالب کی محبوبہ	حمیدہ سلطان	74
18	غالب کا انداز بیاں	شہزاد اختر	78
19	فکر تونسوی غالب کے شعر کی شرح کرتے ہیں	فکر تونسوی	80
20	غالب کے اشعار - کارٹونسٹ کی نظر میں	وہاب حیدر	82
21	نظم: میر مہدی مجروح کے آنسو	میر مہدی مجروح	88
22	غالب کے خطوط	ادارہ	93
23	خراج عقیدت	جگر مرادآبادی	98
24	دیوانِ غالب	مرزا غالب	99
25	غزلیں	مرزا غالب	101
26	قصیدہ، مثنوی، قطعہ، رباعی، مرثیہ، سلام، منقبت، نظم، مدح، خمسہ، سہرا	مرزا غالب	199
27	متفرقات	مرزا غالب	239
28	انتخاب از نسخۂ حمیدیہ	مرزا غالب	249
29	غیر مروجہ کلام	مرزا غالب	275
30	قادر نامہ	مرزا غالب	291
31	انتخاب از تحقیقاتِ آسی	مرزا غالب	299
32	غالب کے انتقال کی پہلی خبر	اکمل الاخبار دہلی	307
33	غالب کے دو صاحبِ طرز شاگرد	متین طارق	308
34	جب غالب نے اپنی ہتکِ عزت کا دعویٰ کیا	بابائے اردو مولوی عبدالحق	312
35	غالب : دو شعر دو ستارے	غلام رسول مہر	314
36	کرتا ہوں جمع پھر جگر لخت لخت کو	عابد رضا بیداد	318
37	کیا غالب کی موت ذیابطیس سے ہوئی؟	شمیم اختر	322
38	جب غالب کے نام پر پورے ملک کو اپریل فول بنایا گیا	محمد ابراہیم خلیل	323
39	فیض احمد فیض کے آئینے میں غالب کا عکس	مختار زمن	324
40	لکھنؤ کی دو رنڈیا زہرہ ار مشتری غالب کی سخت دشمن تھیں	نادم سیتا پوری	328
41	شرح کلام غالب	مولانا حسرت موہانی	334
42	یہ غالب کے جعلی شاگرد ہیں	مالک رام	338
43	غالب نے بیسویں صدی کی آہٹ سن لی تھی	ڈاکٹر ذاکر حسین خان (صدر جمہوریہ ہند)	340
44	دیوان غالب مصنفوں کے لیے مشعل راہ	صہبا لکھنوی	342
45	پیروڈی بر غزل غالب	شوکت تھانوی	345
46	غالب یادگار قائم کرنے کی تجویز سو سال پرانی ہے	ڈاکٹر فرمان فتح پوری	346
47	آخری مضمون	سلامت علی مہدی	350

Shabistan magazine Delhi, issue: Ghalib Number 1969, pdf download.