ماہنامہ چمنستان دہلی - افسانہ نمبر جون 1945 - پی۔ڈی۔ایف ڈاؤن لوڈ

تعارف رسالہ ٹی۔این۔بی

چمنستان
جنوری-1940 میں دہلی سے اپنی اشاعت کا آغاز کرنے والے اردو کے اس ماہنامہ رسالے کی ٹیگ لائن تھی: اردو زبان کے سدابہار پھولوں کا گلدستہ، اس انجمنِ گل میں شعلے بھی ہیں شبنم بھی۔
آغا شاعر قزلباش دہلوی کی یاد میں جاری اس ماہنامے کے مدیر آغا سرخوش قزلباش تھے اور شاید تقسیمِ ملک کے سانحے تک یہ رسالہ بپاندی دہلی سے شائع ہوتا رہا۔ مشہور ای-لائبریری ویب سائٹ "ریختہ" پر اس رسالے کے تقریباً 50 شمارے موجود ہیں۔ اس ماہنامے کی بزم میں مشاہیرِ ادب کی تحریریں شامل رہیں جیسے جوش ملیح آبادی، خواجہ حسن نظامی، احسان دانش، آرزو لکھنوی، ملا رموزی، صفی لکھنوی، انجم آفندی، رشید احمد صدیقی، فراق، خمار، جاں نثار اختر، شوکت تھانوی، میرزا ادیب، حجاب امتیاز علی، ماہر القادری اور دیگر بےشمار معروف و مقبول شاعر و ادیب۔ بقول مدیر اس رسالے کو اور اس کی آسان و سہل ہندوستانی زبان کو سراہنے والوں میں پرنسپل جامعہ ملیہ اسلامیہ ڈاکٹر ذاکر حسین اور سابق وزیراعظم اترپردیش شری پنڈت گووند بلبھ پنت شامل تھے۔ اور یہ رسالہ حکومت رامپور اور محکمۂ تعلیمات حکومتِ میسور سے منظور شدہ تھا۔
اس رسالے کا ماہ جون-1945 کا شمارہ "افسانہ نمبر" کے طور پر شائع ہوا تھا جن میں شامل چند تخلیق کاروں کے نام ہیں: جوش، جگر، مجاز، حفیظ جالندھری، ل۔احمد اکبرآبادی، خواجہ احمد عباس، مرزا ادیب، احسان دانش، سجاد ظہیر، قیسی رامپوری، ایم۔اسلم، خدیجہ مستور، ابراہیم جلیس، قرۃ العین حیدر، ضمیر جعفری وغیرہ۔
چمنستان کا یہ خصوصی شمارہ (افسانہ نمبر : جون-1945) قدیم رسائل کے شائقین کے لیے تعمیرنیوز کی جانب سے پیش خدمت ہے۔ تقریباً ڈیڑھ سو صفحات کی اس پی۔ڈی۔ایف فائل کا حجم تقریباً 11 میگابائٹس ہے۔
رسالہ کا ڈاؤن لوڈ لنک نیچے درج ہے۔

اس خصوصی شمارہ کے اداریہ بعنوان "پہلی نظر" کے تحت مدیر آغا سرخوش قزلباش لکھتے ہیں ۔۔۔

موجودہ زندگی بھی آخر ایک پہیا بن کر رہ گئی۔ وہ آغازِ کار کی وحشت، گھبراہٹ، ہراس، ناامیدی، بےچینی، وہم کی تاریکیاں سب کی سب زندگی کے رخ پر آتے ہی مساوات کی صورت میں ڈھل گئیں۔ اب نہ کرب ہے، نہ چیخ نہ غم ہے نہ مسرت۔ پانچواں سال ہونے کو آیا، تجربات نے ولولوں کی بنیادیں کھوکھلی کر دیں۔ حوادث نے عزائم کو پژمردہ کر دیا۔ واقعات نے امیدوں کو بےحس بنا دیا اور وقت نے باگ ڈور اپنے ہاتھ میں لے لی۔ نہ وہ ہماہمی ہے نہ وہ زور شور۔ زندگی نہ رکتی ہے نہ ٹھٹکتی ہے اور نہ ہی دوڑتی ہے۔ ایک مسلسل بہاؤ ہے، پیہم رفتار جو محسوس بھی ہے اور معلوم بھی۔ تاہم کبھی کبھی عمر کے تقاضے اپنے میں خون دوڑاتے ہیں، نبضوں میں دھڑکنیں بھرتے ہیں۔ امنگ اپنے پر کھولتی ہے۔ عزم کے چہرے پر سرخی جھلکنے لگتی ہیں۔ دماغ وقت کی نگاہوں میں نگاہیں الجھا دیتا ہے اور دل بھی اسپارک دے اٹھتا ہے۔ اس وقت چاہتا ہوں کہ چمنستان کے لیے کوئی تعمیری کام کیا جائے۔ ہندوستانی پبلشرز کو ہندوستان کا ایک ایسا قومی ادارہ بنا دیا جائے کہ جس سے مصنفین بھی مطمئن رہیں اور ناشر بھی۔
اس حیاتِ بےحیاتی میں مفلوج کوششوں سے عزم کے انجکشن دے رہا ہوں اور اس کی ایک لپک یہ افسانہ نمبر حاضر کر رہا ہوں۔ مئی نمبر میں جو مضمون نگار حضرات کی فہرست دی تھی وہ "بڑھا بھی دیتے ہیں کچھ زیبِ داستاں کے لیے" کے مصداق نہ تھی، اس میں قطعیت شامل تھی۔ لیکن باوجود بالغ وعدوں کے، چمنستان ان تمام حضرات کی دماغی کاوشیں نہیں جمع کر سکا جس کے لیے میں آپ حضرات سے معذرت خواہ ہوں اور امید کے سسکتے ہوئے ہونٹوں سے یہ ضرور کہوں گا کہ جنوری 1946 میں سالنامہ شاید ویسا شائع کر سکوں جیسا اس نمبر کو کامراں بنانے کا خیال تھا۔ زیرنظر نمبر بھی آپ ملاحظہ فرمائیں گے تو آپ کو شعلہ و شبنم کے امتزاج کا عمدہ نمونہ نظر آئے گا۔ میں ان تمام حضرات کا ممنون ہوں جنہوں نے میری درخواست کو قبول فرما کر مجھے مفتخر کیا۔
اکثر مضامین جو افسانہ نمبر کے لیے ہی منگوائے تھے، رہ گئے ہیں جس کی وجہ کاغذ کی قلت کے سوا اور کچھ نہیں۔ میں امید کرتا ہوں کہ مضمون نگار حضرات مجھے میری اس نادانستہ غلطی پر معاف کریں گے۔

***
نام رسالہ: چمنستان - افسانہ نمبر: جون-1945
مدیر: آغا سرخوش قزلباش
تعداد صفحات: 152
پی۔ڈی۔ایف فائل حجم: تقریباً 11 میگابائٹس
ڈاؤن لوڈ تفصیلات کا صفحہ: (بشکریہ: archive.org)
Chamanistan_June-1945.pdf

Direct Download link:

ماہنامہ 'چمنستان' - افسانہ نمبر: جون-1945 :: فہرست
نمبر شمار	تخلیق	تخلیق کار	صفحہ نمبر
1	پہلی نظر	آغا سرخوش قزلباش	2
2	نئی تہذیب	آغا شاعر قزلباش دہلوی	3
3	مرد کی شکست	سر سید رضا علی	4
4	تبرکات	صفی لکھنوی	8
5	قدیم ترین افسانہ	ل۔ احمد اکبرآبادی	9
6	عصرِ جواں	جوش ملیح آبادی	16
7	جھجھک	شاہد احمد دہلوی	17
8	جگرپارے	جگر مرادآبادی	20
9	چاندنی	وزیر حسن دہلوی	21
10	شاعر کی جوانی کے منصوبے	حفیظ جالندھری	23
11	ایک کاروباری	اختر اورینوی	25
12	ترے بغیر	نواب مکرم علی خاں مکرم	32
13	ایک رات	مرزا ادیب	33
14	روحِ انقلاب	احسان دانش	38
15	پاؤں میں پھول	خواجہ احمد عباس	39
16	زندگی کا نور	رشید اختر ندوی	49
17	نمودِ صبح صادق	ضیاء الاسلام	53
18	اقبال کا پیامِ حیات	سجاد ظہیر	54
19	کیلیں	قیسی رامپوری	57
20	آہنگِ نو	اثر جلیلی	59
21	احساسِ ندامت	ایم۔ اسلم	60
22	شالامار	شہید یار جنگ	69
23	میری بھول	خواجہ محمد شفیع دہلوی	70
24	ایک سوال	احمد ندیم قاسمی	71
25	ترکِ دوستی	درویش میرٹھی	76
26	عسق	خدیجہ مستور	77
27	قبر اور گلاب کا پھول	جعفر علی خاں اثر لکھنوی	84
28	نصف بہتر	شائستہ اختر بانو سہروردی	85
29	عذرا	صالحہ عابد حسین	90
30	غزالانِ لکھنؤ	اسرار الحق مجاز	95
31	اور یہ افسانہ نگار	جیون ساتھی	96
32	واردات	اصطفیٰ خاں اصطفی	97
33	فاصلہ	ابراہیم جلیس	98
34	پرواز کے بعد	قرۃ العین حیدر	103
35	وہ رات	حمیدہ سلطانہ	112
36	دھندلکا	سلام مچھلی شہری	118
37	روس کی تقلید کے بجائے	آغا سرخوش قزلباش	120
38	الٹا اثر	بہزاد لکھنوی	121
39	نغمات	سید ضمیر جعفری	123
40	ٹوٹا ہوا کھلونا	سحاب آغا شاعر	124
41	ایک زندہ لڑکی	صدیقہ بیگم سیوہاروی	129
42	ترقی پسندی سے پہلے	بہارکوٹی	132
43	پچھتاؤ گی	خمار لکھنوی	138
44	کھسی میں ہنسی	دیش	139
45	وارداتِ شاعر	عاصم پریمی	146
46	تصویریں	ادارہ	147
47	اشتہار	مشتہرین	148

Chamanistan magazine Delhi, issue: June 1945 (Afsana Number), pdf download.