محرم نامہ - اسلامی تاریخی واقعات از خواجہ حسن نظامی - تعارف کتاب

حضرت خواجہ حسن نظامی (پیدائش: 2/محرم/1295ھ ، 1873ء - وفات: 31/جولائی 1955ء)
نہ صرف صاحب طرز ادیب، انشا پرداز اور مورخ تھے بلکہ اپنے ایک مخصوص اسلوب کے موجد اور خاتم بھی تھے۔ انہوں نے ہر موضوع پر لکھا، شاید ہی کوئی ایسا موضوع ہو جس پر ان کی کوئی تحریر نہ ملے۔ انہوں نے آپ بیتی بھی لکھی، سفرنامے بھی لکھے، سفرنامہ حجاز مصر و شام، سفرنامہ ہندوستان، سفرنامہ پاکستان، قابل ذکر کتابیں ہیں۔ 'گاندھی نامہ'، 'محرم نامہ' اور 'یزید نامہ' بھی ان کی اہم کتابوں میں سے ہیں۔
خواجہ حسن نظامی نے اسلامی تاریخ کو مختصر طور پر پانچ کتابچوں میں تحریر کیا تھا: میلاد نامہ، محرم نامہ، یزید نامہ اور دو حصے عباسیہ سلطنت کی تاریخ پر۔ اس سیریز کی دوسری کتاب "محرم نامہ" میں آنحضرتؐ کی وفات سے واقعۂ کربلا تک کے تاریخی حالات تحریر کیے گئے ہیں۔ تعمیرنیوز کے ذریعے اسی یادگار، اہم اور تاریخی کتابچہ کا تعارف پیش خدمت ہے۔

اہم نوٹ:
خواجہ صاحب کی اس کتاب میں حضرت امیر معاویہ رضی اللہ عنہ کا تذکرہ غیرمستند اور جھوٹی روایتوں کے ذریعے بیان ہوا ہے۔ چونکہ آج کے ترقی یافتہ دور میں تاریخ و حدیث کی ہر کتاب ہر زبان میں بآسانی دستیاب ہے، لہذا درست موقف تک پہنچنا قاری کی تلاش و تحقیق پر منحصر ہے۔ اسی ضمن میں دو عدد متعلقہ تحریروں کے حوالے بھی قارئین کی سہولت کے لیے پیش کیے جا رہے ہیں۔

اس کتاب کے دیباچہ میں صاحبِ کتاب خواجہ حسن نظامی لکھتے ہیں ۔۔۔

محرم نامہ - اسلامی تاریخ کا دوسرا حصہ ہے۔ پہلے حصے کا نام "میلاد نامہ" ہے جس میں تاریخی انداز سے محمد رسول اللہ صلی اللہ علیہ وسلم کی پیدائش سے وفات تک کے پورے تاریخی حالات بیان کیے گئے ہیں اور اس کتاب 'محرم نامے' میں وفات سے لے کر چاروں خلافتوں کا بیان ہے اور جنگ جمل اور جنگ صفین اور بنی امیہ کی سلطنت کی ابتدا اور کربلا کا تاریخی تذکرہ ہے۔
اس کتاب کے دس ایڈیشن چھپ چکے ہیں اور اب 1363ھ مطابق 1943ء میں گیارہواں ایڈیشن شائع کیا جاتا ہے۔ اس کتاب کا نام "محرم نامہ" اس لیے رکھا گیا ہے کہ اس میں محرم کے غم ناک تاریخی حالات کا بیان زیادہ ہے۔ اس تاریخی سلسلے کے پہلے حصے کا نام "میلاد نامہ" بھی اسی وجہ سے رکھا گیا تھا کہ اس میں آنحضرتؐ کی ولادت کا بیان زیادہ تھا۔
اس کتاب محرم نامے میں ان چاروں خلافتوں کا تاریخی حال بیان کیا گیا ہے جس سے شیعہ سنی فرقے پیدا ہوئے ہیں۔ مگر میں نے یہ کتاب دونوں فرقوں کی ضد اور طرفداری سے بچ کر عربی کی معتبر تاریخوں سے محض سچے حالات لکھ دئیے ہیں، کسی فرقہ کی حمایت یا مخالفت نہیں کی۔ یہی وجہ ہے کہ ہر فرقہ کے ہر انصاف پسند لوگ اس کتاب کو اور اس کے پہلے، تیسرے اور چوتھے حصوں کو بہت پسند کرتے ہیں اور میری یہ کتابیں بہت زیادہ مقبول ہیں اور بار بار چھاپی جاتی ہیں۔
اس کتاب کا تیسرا حصہ "یزید نامہ" ہے جس میں امیر معاویہ اور یزید سے لے کر بنی امیہ کے آخری بادشاہ مروان المحمار تک کے تاریخی حالات ہیں۔ اور چوتھے پانچویں حصوں میں بنی عباس کی حکومت کے شروع سے آخری بادشاہ تک کے تاریخی حالات ہیں اور جس کا نام 'عباسیہ سلطنت کی تاریخ' ہے۔

یہ بھی پڑھیے ۔۔۔

• بیگمات کے آنسو - 1857 غدر کی کہانیاں - خواجہ حسن نظامی
• دنیائے ادب کا درویش - خواجہ حسن نظامی
• امیر معاویہ رضی اللہ عنہ کے کہنے پر سیدنا حسن رضی اللہ عنہ کو زہر دینے کا واقعہ صحیح سند سے ثابت نہیں ہے
• سیدنا حسن رضی اللہ عنہ کو زہر دینے کا سیدنا معاویہ رضی اللہ عنہ کی طرف منسوب جھوٹا واقعہ

اس کتاب/رسالہ کا تعارف، اشاعتی کوائف، فہرستِ مضامین اور دیگر معلومات علمی، ادبی اور تحقیقی استفادے کے لیے پیش کی جا رہی ہیں۔

***
نام کتاب: محرم نامہ - (آنحضرتؐ کی وفات سے واقعۂ کربلا تک کے تاریخی واقعات)
تصنیف: خواجہ حسن نظامی
تعداد صفحات: 131
Muharram Nama- Khwaja Hasan Nizami

فہرست مضامین
نمبر شمار	عنوان	صفحہ نمبر
1	رسول اللہؐ کی وفات کا بیان	3
2	خلافت کا بیان	5
3	حضرت ابوبکرؓ کی خلافت کا بیان	9
4	حضرت عمرؓ کی خلافت کا بیان	11
5	حضرت عثمانؓ کی خلافت کا بیان	13
6	حضرت علیؓ کی خلافت کا بیان	20
7	شروع اسلام کے چھ شہید	24
8	حضرت عثمانؓ کی شہادت	27
9	حضرت علیؓ کی شہادت	40
10	حضرت امام حسنؓ کی شہادت	43
11	جنگ جمل یعنی حضرت عائشہؓ اور حضرت علیؓ کی لڑائی	47
12	جنگ صفین یعنی حضرت علیؓ اور حضرت معاویہؓ کی لڑائی	64
13	حضرت علیؓ اور معاویہؓ کا صلح نامہ	75
14	خارجیوں کا خروج	76
15	عمرو بن عاصؓ کا بیان	81
16	یزید کی تخت نشینی	86
17	حضرت مسلمؓ کی شہادت	91
18	حضرت مسلمؓ کے بچوں کی شہادت	94
19	حضرت امام حسینؓ کا سفر کوفہ	99
20	کربلا کی لڑائی کا بیان	108
21	حضرت علی اکبرؓ کی لڑائی	116
22	حضرت علی اصغرؓ کی شہادت	118
23	حضرت امام حسینؓ کی شہادت	121
24	فاطمی قیدی	124
25	یزید کے دربار میں قیدیوں کی پیشی	126