باسو چٹرجی - حقیقت سے قریب فلموں کا تخلیقی ہدایتکار

مضمون رشید انجم

باسو چٹرجی (پ: 10/جنوری 1930 ، اجمیر - م: 4/جون 2020 ، ممبئی)
اپنی کھٹی میٹھی فلموں کے ذریعہ فلم بینوں کے دلوں پر ناقابل فراموش شناخت قائم کرنے والے معروف فلم ساز، ہدایتکار و مکالمہ نویس بعمر 90 سال دنیا سے وداع ہو گئے۔ پیا کا گھر (1972)، اس پار (1974)، چت چور (1976)، کھٹا میٹھا (1978)، چکرویوہ (1978)، باتوں باتوں میں (1979)، شوقین(1982)، ایک رکا ہوا فیصلہ (1986) اور چمیلی کی شادی (1986) جیسی یادگار ہندی فلموں کے لیے مشہور باسو چٹرجی نے بنگالی فلموں کی بھی ہدایتکاری دی تھی۔
رشید انجم کی کتاب "جہانِ فلم" سے ماخوذ مضمون پیش خدمت ہے۔

ہندی فلموں کا بنگالی نژاد ہدایتکار ایک عرصہ تک بمبئی سنیما میں اپنا مقام حاصل کیے رہا۔
باسو چٹرجی ہلکی پھلکی عام فہم فلمیں بنانے میں اپنا ثانی نہیں رکھتے تھے۔ وہ رشی کیش مکرجی کی مانند ہی نیم کمرشیل سنیما کے قائل تھے۔ ان کی فلمیں بیک وقت نئے سنیما کے نزدیک بھی رہیں اور کمرشیل سنیما کے قریب بھی۔
1930ء میں اجمیر (راجستھان) میں پیدا ہوئے اور 50ء کی دہائی میں وہ قسمت آزمانے بمبئی آ گئے۔ 18 سال کی عمر میں ان کے بنائے ہوئے کارٹون ہفت روزہ "بلٹز" میں شائع ہوتے رہے۔ 1959ء میں انہوں نے "فلم فورم سوسائٹی" کے قیام میں اہم کردار ادا کیا۔ 1966ء میں شیلندر مرحوم کی کلاسک فلم "تیسری قسم" میں فلم کے ہدایت کار باسو بھٹاچاریہ کے معاونِ خاص باسو چٹرجی ہی تھے۔ فیڈریشن فلم سوسائٹی آف انڈیا کی مغربی شاخ کے لیے انہوں نے کئی نمایاں تعمیری کام انجام دئے۔ ایڈیٹوریل بورڈ پر ان کا مضمون "کلوز اَپ [Close up]" فلم فورم نے 1970 کی دہائی میں شائع کیا تھا۔

بمبئی آنے کے بعد باسو چٹرجی کو جلد ہی فلم ہدایت کرنے کا موقع مل گیا۔ نئے سنیما کی لہر سارے ملک کو اپنی لپیٹ میں لے چکی تھی۔ باسو چٹرجی نے اس لہر کا بھرپور فائدہ اٹھایا اور 1969ء میں ان کی تجرباتی فیچر فلم "سارا آکاش" ریلیز ہو گئی۔ فلم نہ صرف کامیاب ہوئی بلکہ اسے کے۔کے۔مہاجن کی لاجواب فوٹوگرافی کی وجہ سے اعزاز یافتہ بھی کیا گیا تھا۔ ان کی دوسری فلم "پیا کا گھر" (راج شری پروڈکشن بمبئی) مراٹھی فلم "بمبئی چاجوائی (1970)" کی کہانی پر مبنی تھی۔ جیا بہادری اور انل دھون نے اس فلم میں متوسط طبقے کی بھرپور عکاسی کی تھی۔ اس فلم میں بمبئی کے ان درمیانی لوگوں کی زندگی کو پیش کیا گیا تھا جو سب کچھ ہوتے ہوئے ایک کشادہ گھر کی تمنا میں ساری عمر ایک کمرے میں گزار دیتے ہیں۔ یہ حساس فلم تھی۔ پھر انہوں نے کم بجٹ کی پرمزاح فلموں کی جانب رخ کیا اور امول پالیکر کو لے کر "رجنی گندھا" اور "چھوٹی سی بات" جیسی دلچسپ فلمیں بنائیں۔ ایسی ہی دلچسپ اور مزاح سے بھرپور مگر انسانی مسائل پر انہوں نے کئی فلمیں تخلیق کیں اور کامیاب رہے۔
اپنی نجی زندگی میں بھی باسو چٹرجی بےحد دلچسپ اور یار باش انسان مانے جاتے تھے۔ وہ کمال کے ہدایتکار تھے۔ انہوں نے فارمولہ فلموں میں بھی جذبات و احساسات کی نمائش بہت سلیقے سے کی۔ 1985 سے 1990 کے درمیان باسو چٹرجی نے چار ٹی۔وی سیرئیل تیار کر کے دوردرشن نیشنل چینل پر ٹیلی کاسٹ کیے تھے۔ ان کے فلمانے کی خوبی یہ تھی کہ وہ اپنے ہر سیریل کا مکمل سیٹ اپ تیار رکھتے تھے۔ شوٹنگ شروع کرتے اور محض دو دن میں 30 اقساط تیار کر لیتے تھے۔

باسو چٹرجی کا سب سے بہترین سیریل "رجنی [Rajani]" تھا جو صارفین کے حقوق [Consumer rights] پر مبنی تھا۔ اس سیریل میں رجنی کا کردار مشہور مراٹھی ڈرامہ نگار وجے تنڈولکر کی اداکارہ بیٹی پریہ تنڈولکر نے نبھایا تھا اور ایسا محسوس ہوتا تھا کہ وہ پریہ تنڈولکر نہیں، رجنی ہی ہے۔ یہ سیریل اپنے دور میں بےحد مقبول ہوا تھا۔
سیریل "درپن" مختلف کہانیوں کا مجموعہ تھا۔ ہر ایک ایپی سوڈ ایک کہانی پر ختم ہوتا تھا۔ سیریل "کاکاجی کہیں" سیاست پر طنزیہ سلسلہ تھا جس میں اوم پوری نے بہاری زبان و کردار کے سہارے اپنی اداکاری کا ہنر دکھایا تھا۔ ان کا ایک اور سیریل "بیوم کیش بخشی" (ریلیز: 1993) بنگالی سراغرساں کے کردار پر مبنی تھا جس نے اپنے انوکھے پن کے سبب مقبولیت حاصل کی اور اسے دوردرشن نے برسہابرس بعد دوبارہ اسی سال مارچ میں لاک ڈاؤن ایام کے دوران پیش کیا ہے۔
باسو کی فلموں کا دور بہت مختصر تو نہیں رہا۔ 1969 سے 1993 تک ان چوبیس (24) برسوں میں انہوں نے جتنی بھی فلمیں اور ٹی وی سیریل بنائے، انہیں نہ صرف دلچسپی سے دیکھا گیا بلکہ وہ بےحد مقبول بھی رہے۔ ان فلموں نے نہ صرف عام آدمی کو متاثر کیا بلکہ اعلیٰ طبقہ بھی ان سے محظوظ ہوا۔

باسو چٹرجی کی ہندی فلمیں :: فہرست
نمبر شمار	نام (اردو)	نام (انگریزی)	سال ریلیز
1	سارا آکاش	Sara Akash	1969
2	پیا کا گھر	Piya Ka Ghar	1972
3	رجنی گندھا	Rajnigandha	1974
4	اُس پار	Us Paar	1974
5	چِت چور	Chitchor	1976
6	چھوٹی سی بات	Chhoti Si Baat	1976
7	سفید جھوٹ	Safed Jhooth	1977
8	سوامی	Swami	1977
9	پریاتما	Priyatama	1977
10	کھٹا میٹھا	Khatta Meetha	1978
11	دل لگی	Dillagi	1978
12	تمہارے لیے	Tumhare Liye	1978
13	دو لڑکے دونوں کڑکے	Do Ladke Dono Kadke	1979
14	منزل	Manzil	1979
15	چکرویوہ	Chakravyuha	1979
16	پریم وواہ	Prem Vivah	1979
17	رتن دیپ	Ratnadeep	1979
18	باتوں باتوں میں	Baton Baton Mein	1979
19	من پسند	Man Pasand	1980
20	اپنے پرائے	Apne Paraye	1980
21	جینا یہاں	Jeena Yahan	1981
22	ہماری بہو الکا	Hamari Bahu Alka	1982
23	شوقین	Shaukeen	1982
24	پسند اپنی اپنی	Pasand Apni Apni	1983
25	لاکھوں کی بات	Lakhon Ki Baat	1984
26	اک رکا ہوا فیصلہ	Ek Ruka Hua Faisla	1986
27	کرائے دار	Kirayedaar	1986
28	چمیلی کی شادی	Chameli Ki Shaadi	1986
29	شیشہ	Sheesha	1986
30	کملا کی موت	Kamla Ki Maut	1989
31	ہماری شادی	Hamari Shadi	1990
32	تریاچرتر	Triyacharittar	1997
33	گدگدی	Gudgudee	1997
34	پرتیکشا	Prateeksha	2007
35	کچھ کھٹا کچھ میٹھا	Kuch Khatta Kuch Meetha	2007

بشکریہ مصنف: رشید انجم
ماخوذ از کتاب: جہانِ فلم (سینما اور فلم کا تاریخی جائزہ، حصہ اول) (سن اشاعت: 2017)

Basu Chatterjee, veteran Indian film director passed away.