چھلکے ہی چھلکے - فکر تونسوی کے مزاحیہ مضامین - پی۔ڈی۔ایف ڈاؤن لوڈ

9/مارچ تعارف کتاب ٹی۔این۔بی

معروف و مقبول مزاح نگار فکر تونسوی کے طنزیہ و مزاحیہ مضامین کی کتاب "چھلکے ہی چھلکے" تعمیرنیوز کے ذریعے پی۔ڈی۔ایف فائل کی شکل میں پیش خدمت ہے۔
تقریباً 300 صفحات کی اس پی۔ڈی۔ایف فائل کا حجم صرف 13 میگابائٹس ہے۔
کتاب کا ڈاؤن لوڈ لنک نیچے درج ہے۔

فکر تونسوی کا اصل نام رام لال نارائن تھا۔ وہ 7/اکتوبر 1918 کو تونسہ شریف (ڈیرہ غازی خان، پاکستان) میں پیدا ہوئے تھے۔ ان کے والد کا نام دھنپت رائے تھا جو بلوچ قبائل میں تجارت اور طب کے پیشے سے وابستہ تھے۔
گورنمنٹ ہائی اسکول تونسہ شریف سے میٹرک پاس کرنے کے بعد فکر تونسوی نے ایک سال ملتان کے ایمرسن کالج میں بھی تعلیم حاصل کی۔ ان کی ادبی زندگی کا آغاز اسکولی تعلیم کے دوران ہی شروع ہو چکا تھا۔ چھوٹے موٹے رسائل و اخبارات میں ان کا تخلیق کردہ کلام شائع ہوتا رہا۔ پھر 1942 میں جب مولانا صلاح الدین احمد کے موقر ادبی رسالے "ادبی دنیا" میں ان کی ایک نظم "تنہائی" شائع ہوئی تو وہ حلقۂ ارباب ذوق لاہور کی جانب سے سال کی بہترین نظم قرار پائی۔ اس کے بعد معروف ادبی رسائل ادب لطیف، ہمایوں، ادبی دنیا وغیرہ میں ان کی نظمیں پے بہ پے شائع ہوتی رہیں۔ 1945 میں معروف ادیب ممتاز مفتی کی مشترکہ ادارت میں انہوں نے ایک طرزِ نو کا دو ماہی میگزین "سویرا" شائع کیا جس نے بڑے بڑے ادبی رسائل کو چونکا دیا۔
1946 میں فکر تونسوی نے "ادبِ لطیف" کی ادارت کی ذمہ داری سنبھالی جو 1947 کے فرقہ وارانہ فسادات کے باعث زیادہ عرصہ چل نہ سکی اور انہیں بطور رفیوجی ہندوستان آنا پڑا۔
تقسیم ہند کے فسادات کے بعد فکر تونسوی نے شاعری ترک کر کے طنز و مزاح میں نثر لکھنا شروع کیا جو عوام میں مقبول ہوتا گیا۔ ان کی سب سے پہلی نثری تصنیف "چھٹا دریا" ہے جو فسادات پر ایک دردناک ڈائری کی شکل میں تھی۔ انہوں نے 1985 میں اردو میں ایک سو سالہ کالم نگاری پر مشتمل رسالہ "چنگاری" کا ایک ضخیم نمبر مرتب کیا۔ دہلی کے مستند ادبی رسالہ "شاہراہ" کی دو 1956-57 ، دو سال تک ادارت کا فریضہ انجام دیا۔ ریڈیو اسٹیشن جالندھر اور دہلی پر سینکڑوں ڈرامے، فیچر اور تقریریں نشر کیں۔ ان کے ایک ریڈیائی ڈرامہ "آج کا سچ" کو ہندوستان کے ہر ریڈیو اسٹیشن نے براڈ کاسٹ کیا تھا۔
دہلی کے روزنامہ "ملاپ" کا مشہور و مقبول طنزیہ کالم "پیاز کے چھلکے" فکر تونسوی نے ہی 1956 میں شروع کیا تھا جو بلاناغہ 25 برس تک جاری رہا۔
انہیں 1987 میں "غالب ایوارڈ" سے نوازا گیا۔ اس سے قبل 1983 میں "میر اکادمی ایوارڈ" اور اپنی مجموعی ادبی خدمات پر 1969 میں سوویٹ لینڈ نہرو ایوارڈ سے بھی انہیں سرفراز کیا جا چکا تھا۔ اترپردیش اردو اکادمی نے ان کی تین کتابوں (چوپٹ راجہ، فکرنامہ اور آخری کتاب) انعام کا مستحق قرار دیا ہے۔ اس کے علاوہ مختلف انعامات و اعزازات بھی انہیں حاصل ہوئے۔
12/ستمبر 1987 کو فکر تونسوی انتقال کر گئے۔

1950 سے 1987 تک طنز و مزاح پر مبنی ان کی 16 درج ذیل تصانیف شائع ہو چکی ہیں:

1. تیرنیم کش - 1953
2. پروفیسر بدھو - 1954
3. ماڈرن الہ الدین - 1955
4. خد و خال - 1955
5. ساتواں شاستر - 1956
6. ہم ہندوستانی (ہندی) - 1957
7. بدنام کتاب - 1958
8. آدھا آدمی - 1959
9. آخری کتاب - 1961
10. فکر نامہ - 1966
11. پیاز کے چھلکے - 1972
12. چھلکے ہی چھلکے - 1973
13. فکر پانی - 1982
14. گھر میں چور - 1983
15. میں (آپ بیتی حصہ اول) - 1987
16. میری بیوی (آپ بیتی حصہ دوم) - 1987

نامور مزاح نگار دلیپ سنگھ نے فکر تونسوی کے فن اور شخصیت کے تذکرے کے ذیل میں لکھا ہے:

فکر کی اپنے قارئین میں بےپناہ مقبولیت کی وجہ یہ تھی کہ اس نے وہی زندگی جی جس کا وہ داستان گو بنا۔ بہت کم لوگوں کو یہ صلاحیت عطا ہوتی ہے کہ اس دنیا میں رہ کر وہ نہ صرف دوسروں کے اندر جھانک سکیں بلکہ خود کو اس طرح بےنقاب کر سکیں کہ بدن پر سے چمڑی تک اتر جائے۔ فکر ان بہت ہی کم لوگوں میں سے تھا۔ اس نے اپنی آپ بیتی میں جس فکر کی رونمائی کی ہے شاید وہ کوئی دشمن بھی نہ کر سکتا۔ آپ بیتی میں قریباً تین چوتھائی جھوٹ کی ملاوٹ کا برا نہیں مانا جاتا۔ لیکن فکر نے اس تسلیم شدہ حق کا بھی فائدہ نہیں اٹھایا۔ اس نے اپنے ایک مضمون "قبر سے واپسی" میں ایک ایسے جلسے کا ذکر کیا ہے جو اس کی فرضی موت کے بعد اس کی یاد میں کیا گیا۔ فکر کی دوربینی اور شخص آشنائی کی اس سے بہتر کیا مثال دی جا سکتی ہے کہ فکر کی حقیقی موت کے بعد جو تعزیتی جلسے ہوئے ان اکثر جلسوں میں مجھے احساس ہوا کہ لوگ وہی تقاریر کر رہے ہیں جن کی امید فکر ان سے کیے ہوئے تھا۔
فکر اگرچہ کسی سیاسی جماعت کا رکن نہیں تھا، لیکن اس کے دماغ میں ایک ایسے نظام کا نقشہ ضرور تھا جس میں انسانی زندگی پنپ سکتی ہے۔ اسے اس بات کا بھی شدت سے احساس تھا کہ قارئین اس کے مضامین سے لطف اندوز تو ہو رہے ہیں ، مستفید نہیں ہو رہے۔ مجھے یاد ہے کہ ایک بار جامعہ ملیہ کے ماس کمیونکیشن ڈپارٹمنٹ کے صدر نے کچھ ادیبوں کو بلا کر ان سے درخواست کی تھی کہ ہم لوگ دیہات سدھار کے مسئلہ پر کچھ پروگرام لکھیں۔ فکر نے وہاں بیٹھے بآواز بلند کہا کہ میں نہیں لکھوں گا۔ صدر صاحب نے قدرے متعجب ہو کر پوچھا: "فکر صاحب، ایسا کیوں؟" فکر نے جواب دیا: "پہلے جو اتنا لکھ چکا ہوں، اس پر کون سا عمل ہو رہا ہے؟"
فکر کی ادبی صلاحیتوں کا اس سے بہتر کیا ثبوت ہو سکتا ہے کہ اس نے اخبار کے کالموں کو ادبی شان عطا کی اور سیاسی طنز کو بامِ عروج تک لے آیا۔ طبقاتی کشمکش کی بات تو ہر سیاستداں کرتا ہے لیکن فکر نے اس کرب کو جس سطح پر محسوس کیا ، کسی اور نے نہیں کیا۔
فکر کو اپنی زندگی میں بےحد شہرت ملی لیکن اس نے کبھی اس کا فائدہ اٹھانے کی کوشش نہیں کی ، کبھی میں نے اسے اپنی شہرت کے کندھے پر بیٹھ کر اپنا قد اونچا کرتے ہوئے نہیں دیکھا۔
فکر نے اردو میں لکھنا شروع کیا۔ تقسیم ملک کے بعد جب اردو کے کئی اور ادیبوں نے زیادہ معاوضے کی خواہش میں دوسری زبانوں کی طرف رجوع کیا ، فکر اردو سے ہی جڑا رہا۔ اردو زبان کے لیے فخر کی بات ہے کہ فکر کی ادبی صلاحیت کی وجہ سے فکر کی شہرت کم ہونے کے بجائے اردو کا نام بلند ہوا۔

***
نام کتاب: چھلکے ہی چھلکے
مصنف: فکر تونسوی
تعداد صفحات: 296
پی۔ڈی۔ایف فائل حجم: تقریباً 13 میگابائٹس
ڈاؤن لوڈ لنک: (بشکریہ: archive.org)
ChilkeHiChilkeFikrTaunsvi.pdf

Direct Download link:
https://archive.org/download/ChilkeHiChilkeFikrTaunsvi/ChilkeHiChilke_FikrTaunsvi.pdf

چھلکے ہی چھلکے - از: فکر تونسوی :: فہرست مضامین
نمبر شمار	عنوان	صفحہ نمبر
1	ہیونگ سانگ دہلی میں	7
2	ریٹائرمنٹ	61
3	اور پھر بڑھاپا آ گیا	72
4	یہ نعمتیں خدا کی	79
5	غلطی آشو ڈاکیے کی	91
6	کلچر پیسے کا	99
7	؟؟	109
8	میرے دوست کا کتا	114
9	بھانت بھانت کے لوگ	120
10	الہ الدین کی دیوالی	125
11	دھرم کرم شاہ	130
12	تین دنوں کی ڈائری	135
13	ماچس کا بارٹر سسٹم	140
14	تقریر بے سر و پیر کی	145
15	ایک بچے نے کہا	150
16	میں کہ ایک بزدل ہوں!	155
17	بلیک لوٹنے والے	160
18	ہمارا پہناوا	166
19	مجھ سے انٹرویو	171
20	جیو جیو تنہا تنہا	176
21	کتابیں پڑھنا	181
22	ایک سو روپیہ میں لاش	186
23	اوٹ پٹانگ باتیں	191
24	تین کانے	201
25	ہندوستان کے سیاستداں	207
26	گو گو گو گو گوبند!	211
27	ناطہ چڑی چھکے کا	216
28	میں کی ایک اور کہانی	222
29	میں نے پوچھا!	228
30	میں کی کہانی	233
31	سڑک	239
32	ایک شاعر کی سمسیا	245
33	فیملی پلاننگ پر ایک تقریر	250
34	ووٹر	256
35	قطار میں آئیے!	262
36	غالب بنام فکر	267
37	جس کا کام اسی کو ساجھے	275
38	بالائی آمدنی	280
39	میں نے شیو کی	285
40	آج کا عنوان - خط	292

Chhilke hi chhilke, a collection of Urdu humorous Essays by Fikr Taunsvi, pdf download.