ISIS has 3 Times More Fighters than Previously Estimated
امریکی خفیہ ادارہ سی آئی اے کا کہنا ہے کہ خفیہ اطلاعات کے مطابق داعش کے جنگجوؤں کی تعداد تقریباً31ہزار ہے جو سابقہ اندازہ کے مقابلہ میں کوئی تین گنا زیادہ ہے ۔ سی آئی اے کے ایک ترجمان نے کہا کہ مئی سے اگست کے دوران خفیہ اطلاعات کے تجزیوں کی بنیاد پر یہ کہاجاسکتا ہے کہ داعش جنگجوؤں کی تعداد31ہزار تک ہوسکتی ہے ۔ جو اندازے سے تین گنا زیادہ ہے اور یہ دولت اسلامیہ میں بھرتی ہونے والوں کی تعداد میں تیزی سے اضافے کا نتیجہ ہے ۔ دولت اسلامیہ نے عراق میں وسیع علاقے پرقبضہ کیا ہوا ہے اور اس نے دو امریکی صحافیوں سمیت متعدد افراد کے سر قلم بھی کیے ہیں جن کے بعد امریکہ کی جانب سے اسے فضائی حملوں میں نشانہ بنانے کے واقعات میں تیزی آئی ہے ۔ سی آئی اے کے ترجمان رائن تراپانی کا کہنا ہے کہ ادارے کے سابقہ اندازوں کے مطابق دولت اسلامیہ کے ارکان کی تعداد دس ہزار کے لگ بھگ تھی ۔ انہوں نے کہا کہ یہ نئی تعداد جون کے بعد دولت اسلامیہ میں بھرتی ہونے والوں کی تعداد میں تیزی سے اضافے کا نتیجہ ہے اور اس کی وجہ خلافت کا اعلان اور حکومتی افواج کے خلاف مختلف محاذوں پر کامیابی ہوسکتی ہے ۔ امریکی خفیہ ادارے کی جانب سے دولت اسلامیہ کے جنگجوؤں کی تعدا د میں اضافے کا اندازہ صدر بارک اوباما کی جانب سے اس گروہ کے خلاف کارروائی کی حکمت عملی کے اعلان کے ایک دن بعد ہی سامنے آیا ہے ۔ حالیہ مہینوں میں دولت اسلامیہ نے شام کے مشرقی علاقوں میں اپنی پوزیشن مضبوط کی ہے جب کہ عراق میں مزید قصبات ، فوجی اڈوں اور ہتھیاروں پر قبضہ کیا ہے۔ ادھر امریکہ نے دولت اسلامیہ کے خلاف ممکنہ عالمی عسکری کارروائی کے لئے ریٹائرڈ جنرل جان ایلن کو رابطہ کا ر مقرر کردیا ہے ۔د ریں اثناء امریکہ کے وزیر خارجہ جان کیری ان دنوں دولت اسلامیہ کے خلاف کارروائی کی حمایت حاصل کرنے کے لئے مشرق وسطیٰ اور عرب ممالک کے دورے پر ہیں۔
کوئی تبصرے نہیں:
ایک تبصرہ شائع کریں