جین فرقہ کو اقلیتی موقف - Taemeer News | A Social Cultural & Literary Urdu Portal | Taemeernews.com

2014-01-21

جین فرقہ کو اقلیتی موقف

لوک سبھا انتخابات سے قبل جین فرقہ کو آج مرکزی حکومت نے اقلیتی موقف عطا کیا جس کے تحت سرکاری اسکیمات اور پروگراموں میں فوائد حاصل ہوں گے۔ مرکزی کابینہ کے ایک اجلاس میں تقریباً 50لاکھ نفوس پر مشتمل فرقہ کو اقلیتی موقف دینے کا فیصلہ کیا گیا۔ ایک دن قبل ہی کانگریس کے نائب صدر راہول گاندھی نے یہ مسئلہ وزیراعظم منموہن سنگھ سے رجوع کیاتھا۔ جین فرقہ کے ایک گروپ نے کل راہول سے ملاقات کرتے ہوئے انہیں اقلیتی موقف دینے کے دیرینہ مطالبہ کے سلسلہ میں نمائندگی کی تھی۔ راہول نے ان کی تائید میں وزیراعظم منموہن سنگھ سے بات چیت کی تھی۔ جین، مسلمانوں، عیسائیوں، سکھوں، بدھسٹوں اور پارسیوں کے بعد اقلیتی موقف حاصل کرنے والا چھٹا فرقہ ہوگا۔ وزیراقلیتی امور کے رحمن خان نے پی ٹی آئی کو بتایاکہ ان کی وزارت عنقریب اس سلسلہ میں نوٹیفکیشن جاری کرے گی۔ اقلیتی فرقہ کی حیثیت سے تسلیم کئے جانے کے بعد جین فرقہ کو اقلیتوں کیلئے مختص اسکالرشپس اور فلاحی پروگراموں کی مد میں مرکزی فنڈس حاصل ہوسکیں گے۔ وہ اپنے طورپر تعلیمی ادارے چلا سکیں گے۔ اترپردیش، مدھیہ پردیش، چھتیس گڑھ اور راجستھان جیسی بعض ریاستوں میں اس فرقہ کو پہلے ہی اقلیتی موقف حاصل ہے۔ مرکزی کابینہ نے بہار میں ریلوے پراجکٹس کو بھی منظوری دی۔ کابینہ نے نالندہ یونیورسٹی کیلئے مالی امداد کو بھی منظوری دی۔

Jains in India get minority status

کوئی تبصرے نہیں:

ایک تبصرہ شائع کریں