راہل گاندھی کو کانگریس کا وزارت عظمیٰ امیدوار بنائے جانے کا امکان

16/دسمبر نئی دہلی پی۔ٹی۔آئی

لوک سبھا انتخابات کیلئے حکمت عملی تیار کرنے آل انڈیا کانگریس کمیٹی کا یہاں 17 جنوری کو ایک اجلاس منعقد ہوگا جس کے اعلان کے ساتھ ہی یہ قیاس آرائیاں شروع ہوگئی ہیں کہ اس اجلاس میں راہول گاندھی کو پارٹی کا وزارت عظمی امیدوار بنانے کا اعلان کیا جاسکتا ہے۔ راجستھان، مدھیہ پردیش، چھتیس گڑھ اور دہلی کے حالیہ اسمبلی انتخابات میں کانگریس کی سخت ہزیمت کے بعد پارٹی کے جنرل سکریٹری جناردھن دیویدی نے آج اس اجلاس کا اعلان کیا۔ بی جے پی نے ستمبر میں ہی نریندر مودی کو اپنا وزارت عظمی کا امیدوار بنانے کا اعلان کردیا تھا جب کہ کانگریس پر یہ تنقیدیں کی جارہی ہیں کہ وہ اپنے وزارت عظمی امیدوار کو نامزد کرنے سے پس و پیش کررہی ہے۔ اسمبلی انتخابات کے نتائج کے بعد پارٹی صدر سونیا گاندھی نے کہا تھا کہ پارٹی مناسب وقت پر اپنے وزارت عظمی امیدوار کا اعلان کرے گی۔ آج کانگریس کور گروپ کی میٹنگ کے بعدانہوں نے نامہ نگاروں کے اس سوال کو نظر انداز کردیا کہ آیا اے آئی سی سی اجلاس میں راہول گاندھی کو وزارت عظمی امیدوار بنایا جائے گا۔ دیویدی نے ان سوالات کو غیرمنطقی قرار دیتے ہوئے مسترد کردیا کہ یہ میٹنگ راہول گاندھی کو وزارت عظمی امیدوار بنانے کے اعلان کیلئے طلب کی جارہی ہے۔ انہوں نے کہاکہ کانگریس ورکنگ کمیٹی اے آئی سی سی میٹنگ کا ایجنڈہ طے کرتی ہے جو میٹنگ میں پیش کی جانے والی مسودہ قرارداروں کو بھی قطعیت دیتی ہے۔ جاریہ سال جنوری میں جئے پور میں کانگریس کا "چنتن شیور" منعقد کیا گیا تھا جس میں راہول گاندھی کو پارٹی کا نائب صدر بنایا گیا تھا۔ اس کے بعد سے اے آئی سی سی کا کوئی اجلاس منعقد نہیں کیا گیا تھا۔ آل انڈیا کانگریس کمیٹی کے اجلاسوں میں ملک کی موجودہ سیاسی صورتحال اور دیگر اہم مسائل پر غور و خوص کیا جاتا ہے۔ یہ میٹنگ ایک ایسے وقت طلب کی گئی ہے جب کانگریس کو مودی کے ایک بڑی طاقت کے طورپر ابھرنے کے مسئلہ کا سامنا ہے۔ دوسری طرف یوپی اے کی بعض حلیف جماعتیں یہ اشارے دے رہی ہیں کہ وہ لوک سبھا انتخابات میں اس کا ساتھ نہیں دیں گی۔ حال ہی میں ڈی ایم کے نے یہ واضح کردیا ہے کہ وہ لوک سبھا انتخابات میں کانگریس کا ساتھ نہیں دے گی۔ این سی پی سربراہ شردپوار نے بھی کانگریس قیادت کو شدید تنقید کا نشانہ بناتے ہوئے کہاکہ لوگ کمزور لیڈروں کو پسند نہیں کرتے۔

Rahul gandhi may be anointed congress pm candidate at aicc meet