رامپور - 250 سالہ قدیم شہرت یافتہ عالیہ لائیبریری پر وزیر کی توجہ مرکوز

11/اپریل رام پور آئی۔این۔این (ذیشان مراد)

آخر کار وہ لمحہ آہی گیا جب رامپور کے علمی و ادبی و دانشور طبقہ نے راحت محسوس کی ۔ 2500 سال قدیم شہرت یافتہ مدرسہ عالیہ کی لائبریری میں برباد ہورہی نادر و نایاب کتب کی جانب سے وزیر برائے شہری ترقیات محمد اعظم خان نے اپنی توجہ مرکوز کی اور قومی، علمی و ادبی ورثہ کے تحفظ کیلئے احکامات جاری کئے۔ اعظم خان کے اس اقدام سے اہل علم، ادب و دانش کو ذہنی اذیب سے نجات حاصل ہوئی ہے۔ جو وقت وقت پر ان نادر و نایاب کتب کے تحفظ کیلئے فکرمندی کا اظہار کرتے رہے ہیں۔ کابینی وزیر کے احکامات کے بعد مدرسہ ہذا اور دیگر مدارس کے اساتذہ کے ذریعہ کتب کی صفائی، ورق گردانی اور موضوع کے اعتبار سے فہرست سازی کا کام شروع ہوگیا ہے۔ مدرسہ عالیہ کے استاذ رحمن لطیف خان کے مطابق ان کتب میں بہت ہی قدیم نادر و نایاب نسخے موجود ہیں جو ملک میں کسی دوسری جگہ دستیاب نہیں۔ واضح رہے کہ گذشتہ اتوار کی شب میں کابینی وزیر اچانک مدرسہ عالیہ پہنچے اور جب پرنسپل سے لائبریری کھلواکر دیکھا تو حیرت زدہ رہ گئے کہ نادر و نایاب کتب کو دیمک چاٹ رہی ہے۔ انہوں نے پرنسپل ہمانشو گپتا کو احکامات دئے کہ لائبریری کی کتاب کو دیگر مدارس کے اساتذہ کے تعاون سے درست کرائیں۔ ورق گردانی کے بعد دھوپ دکھائی جائے بعدازاں فہرست سازی کرکے سلیقہ سے الماریوں میں رکھا جائے۔ اعظم خان نے کہاکہ کتابوں کو الماریوں میں رکھنے سے قبل اچھی طرح سے کمرے والماریوں کی صفائی کرائی جائے اور دیمک کی دوا بھی چھڑکی جائیں۔ پرنسپل نے اگلے روزسے کام کا آغاز کرادیا جو جاری ہے۔ آج اسکول انسپکٹر مایا دیوی یادو اور ضلع اقلیتی بہبود افسر آر پی سنگھ مدرسہ عالیہ پہنچے اور اساتذہ کے ذریعہ تحفظ کتب کے تعلق سے کئے جانے والے کام کا جائزہ لیا۔ محمد اعظم کے ذریعہ اٹھائے جارہے اس قدم کی اہل ادب اور اردو داں حضرات نے ستائش کی ہے لیکن ساتھ ہی کچھ لوگوں کا یہ بھی کہنا ہے کہ اس کے مکمل تحفظ کیلئے کیٹلاکنگ کرائی جائے اور لائبریری میں آنے والے اخراجات کیلئے خاطر خواہ رقم بھی مدرسہ عالیہ کو دی جائے تاکہ لائبریری کی مکمل حفاظت ہوسکے اور آئندہ یہ کتابیں محفوظ رہ سکیں۔

Minister Azam Khan ordered the safety steps for Aliah library Rampur