ہندوستان اور مسلم دنیا کے درمیان تعاون ضروری - Taemeer News | A Social Cultural & Literary Urdu Portal | Taemeernews.com

2013-02-16

ہندوستان اور مسلم دنیا کے درمیان تعاون ضروری

گلوبلائزیشن کے بڑھتے رول اور ہندوستان کی شاندار خارجہ پالیسیوں کے مدنظر انڈو مسلم ورلڈ کے درمیان تعاون کے میکانزم کو مضبوط کرنے پر زور دیا گیا ہے ۔ مرکزی وزیر برائے آبی وسائل ہریش راوت اور مرکزی وزیر برائے اقلیتی امور کے رحمان خان سمیت خارجہ امور کے ماہر اسکالروں نے مسلم دنیا سے بڑے پیمانے پر رابطہ بنانے کو ضروری قرار دیا ہے ۔ انہوں نے آج یہاں کانسٹی ٹیوشن کلب میں انسٹی ٹیوٹ آف آبجیکٹیو اسٹڈیز(آئی او ایس) کے زیر اہتمام "اکیسوی صدی میں ہندوستان اورمسلم دنیا "کے موضوع پر منعقد دو روزہ بین الاقوامی کانفرنس کی افتتاحی اجلاس کے دوران اظہار خیال کرتے ہوئے کہا کہ اس تعاون سے بہترین اثرات مرتب ہوں گے ۔ مرکزی وزیر برائے اقلیتی امور کے رحمان خان نے کہا یہ وقت کی اہم ضرورت ہے کہ ہندوستان اور مسلم دنیا کے موضوع پر دونوں خطوں کے ماہرین اور دانشوران کے علاوہ اہم ذمہ داران غوروخوض کریں ۔
انہوں نے کہا کہ اس کانفرنس سے توقع ہے کہ ہندوستان اور مسلم دنیا کو قریب تر لانے میں عملی راہیں سامنے آئیں گی ۔ انہوں نے کہا کہ ہندوستان کی سب سے بڑی خصوصیت یہ ہے کہ یہ معتدد مذاہب و مکاتب فکر کا مالک ہے اور اس تعلق سے یہ انوکھا ہے مرکزی وزیر نے کہا کہ سعودی عرب ہی نہیں بلکہ پوری مسلم دنیاکو ساتھ لے کر ہندوستان کو چلنا ہے اور مختلف میدانوں میں معاہدے کر کے روابط تعلقات کو مزید مستحکم کرنا ہے ۔ مرکزی وزیر نے سعودی ممالک سے اپیل کرتے ہوئے کہا کہ عرب ممالک امن کے قیام میں اہم و کلیدی رول ادا کریں ۔ سعودی عرب کی وزارت برائے اسلامی امور میں زیریں سکریڑی عبدالرحمن غمام الغمام نے ہندوستان اور سعودی عرب کے ذریعہ مشترکہ طور پر عالمی امن کی بحالی کے لیے ڈائیلاگ شروع کرنے کی وکالت کرتے ہوئے کہا کہ سعودی عرب اور ہندوستان کے درمیان جو روابط و تعلقات موجود ہیں ان کی تاریخی حیثیت ہے لہذا اسے لے کر چلنا ہی نہیں ہے بلکہ اس کے بل پر اکیسویں صدی میں عالمی امن کی بحالی میں اہم رول ادا کرنا ہے ۔

ماہر اسٹڈیز اور جواہر لال نہرو یونیورسٹی کے استاد پروفیسر آفتاب کمال پاشا نے تفصیل سے ہندوستان اور مسلم دنیا کے درمیان روابط کی بنیاد پر وشنی ڈالی ۔ انہوں نے کہا کہ ہندوستان شروع سے فلسطین کے کاز کی تائید و حمایت کرتا آرہا ہے اور آج 130 ممالک ایسے ہیں جو اس کاز کے حامی ہیں ۔ لہذا آج ضرورت اس بات کی ہے کہ ہندوستان روایتی ناوابستہ تحریک کی خارجہ پالیسی کو آگے بڑھائے ۔ معروف اسلامی دانشور ، عربی جریدہ البعث الاسلامی کے مدیر اور انٹیکرل یونیورسٹی لکھنؤ کے چانسلر ڈاکٹر سعید اعظمی ندوی نے کہا کہ دینی تعلیم ہویا دنیوی تعلیم دونوں میں ہندوستان اور مسلم دنیا کے درمیان گہرے تعاون کی ضرورت ہے ۔۔ آئی او ایس چیئرمین ڈاکٹر محمد منظور عالم نے اپنے صدرارتی خطبہ میں کہا کہ ہندوستان اور مسلم دنیا کا ایک دوسرے سے مزید قریب آنا وقت کی اہم ترین ضرورت ہے ۔

India and muslim world in 21st century - international conference by institute of objective studies

کوئی تبصرے نہیں:

ایک تبصرہ شائع کریں