یہ کس کا خواب تماشا ہے - شمیم حنفی کے کالم - پی۔ڈی۔ایف ڈاؤن لوڈ

تعارف کتاب ٹی۔این۔بی

شمیم حنفی (پیدائش: 17/مئی 1939 - وفات: 6/مئی 2021ء)
اردو کے مشہور ادیب، شاعر، ڈراما نگار اور نقاد ہونے کے ساتھ ساتھ مقبول کالم نگار بھی رہے ہیں۔ علی گڑھ مسلم یونیورسٹی میں تدریسی فرائض کی انجام دہی کے بعد وہ جامعہ ملیہ اسلامیہ میں اعزازی پروفیسر کے طور پر مقرر ہوئے۔ 1963ء میں جب وہ الہ آباد یونیورسٹی کے طالب علم تھے، انہوں نے اخبارات و رسائل میں لکھنے کا سلسلہ شروع کیا تھا۔ شمیم حنفی کی کالم نویسی کا سلسلہ تقریباً نصف صدی تک پھیلا ہوا ہے۔ تقریباً تمام ہی کالم معروف فکشن نگار خالد جاوید نے مرتب کر کے "یہ کس کا خواب تماشا ہے" نامی کتاب کے ذریعے پیش کیا ہے۔
شمیم حنفی کے انہی معرکۃ الآرا یادگار کالمز پر مبنی کتاب "یہ کس کا خواب تماشا ہے"، شمیم حنفی کو خراج عقیدت کے بطور باذوق قارئین کی خدمت میں پیش ہے۔ تقریباً چار سو صفحات کی اس پی۔ڈی۔ایف فائل کا حجم صرف 15 میگابائٹس ہے۔
کتاب کا ڈاؤن لوڈ لنک نیچے درج ہے۔

اپنے ان کالمز کے تعارف میں شمیم حنفی کہتے ہیں ۔۔۔

یہ کالمز زندگی کے مختلف ادوار کی یادگار ہیں۔ طالب علمی کے دور میں اس سلسلے کی شروعات ہوئی۔ کئی اردو اور ہندی اخبارات سے بالواسطہ تعلق رہا۔ گرد و پیش کی دنیا میں جو صورتحال رونما ہوتی رہتی ہے، اس کے بارے میں سوچنے کے ساتھ ساتھ اپنے ردعمل کو ظاہر کرنے کی ہوک بھی اٹھتی رہتی ہے۔ زندگی میرے لیے نہ تو خواب ہے، نہ صرف آرٹ اور ادب کے اسالیب کی گرفت میں آنے والی سچائی۔ ادیب کے لیے صحافت کا میدان بھی کھلا ہوتا ہے، بقول جارج آرویل: ہنگامی حالات میں لکھا جانے والا ادب۔ سو، یہ شغل بھی جاری رہنا چاہیے۔

احتجاج اور برہمی کے شورِ بےاماں سے لبالب بھرا ہوا ماحول بھی ہماری ہی دنیا کا حصہ ہے۔ میں نے فکشن، شاعری، ادبی تعبیر و تنقید کے ساتھ ساتھ بہت سے اعصاب شکن سیاسی، معاشی اور معاشرتی مسئلوں کے سائے میں بھی اپنے شب و روز بسر کیے ہیں۔ شاید اسی لیے یہ کالم نویسی بھی کسی نہ کسی طور پر ہمیشہ جاری رہی۔ یہ میرے سماجی سروکاروں کی دستاویز ہے۔ اور یہ کتاب اسی طول طویل روداد پر مبنی ہے۔ جو کالمز اس کتاب میں شامل ہیں بالعموم دہلی کے اخبارات 'ہجوم'، 'خبردار جدید' اور 'ہماری زبان' کے واسطے سے منظر عام پر آئے ہیں۔

ان بکھرے ہوئے اوراق کو یکجا کرنے کی تحریک مجھے اپنے دو عزیز شاگردوں سے ملی۔ ایک تو ڈاکٹر یوسف عامر جو جامعہ ازہر (قاہرہ) میں اردو کے پروفیسر ہیں۔ دوسرے اسی کتاب کے مرتب جو ایک معروف فکشن نگار ہیں۔

پیش نظر کتاب کے دیباچہ "عرضِ مرتب" میں خالد جاوید لکھتے ہیں ۔۔۔

"یہ کس کا خواب تماشا ہے"
کی تمام تحریروں کا تعلق انسان سے ہے اور اس کے بنیادی سروکار صرف انسانی ضمیر سے ہی وابستہ ہیں۔ یہ کالم نہ تو محض سیاسی ہیں اور نہ ہی محض ادبی۔ اگرچہ موضوعات کے اعتبار سے یہ سیاسی اور ادبی دونوں کہے جا سکتے ہیں مگر ہمیں بخوبی یہ علم ہے کہ کالم میں ہمیشہ اپنے ذاتی خیال کا اظہار کیا جاتا ہے اور کوئی بھی خیال اپنے اظہار کے لیے بیان و الفاظ کا محتاج رہتا ہے۔
اگر ان کالموں کے موضوعات کے ساتھ ساتھ ان کی زبان اور اسلوب پر بھی بغور توجہ دی جائے تو ایک خصوصیت بہت واضح طور پر کھل کر سامنے آتی ہے اور وہ ہے بیانیہ میں پوشیدہ افسردگی اور ملال کی ایک کیفیت۔
افسردگی اور ملال بغیر انسان دوستی (Humanism) کے، کبھی نہیں پیدا ہوتے۔ اگر کسی تحریر کے بنیادی سروکار "انسان" سے وابستہ نہیں ہیں تو اس میں شائستگی، شوخی، طنز و مزاح اور معنویت سب کچھ ہو سکتے ہیں مگر افسردگی یا اداسی نہیں۔
شمیم حنفی کی زبان ایک زندہ وجودی تجربے کی بامعنی اور معتبر اداسی ہے جس کے بغیر انسان کا کوئی تعلق نہ تو کسی اخلاقی اقدار سے قائم ہو سکتا ہے اور نہ ہی اس کائنات سے جہاں دوسرے انسان بھی زندگی گزارتے ہیں اور بےجان اشیا بھی اپنا مقام رکھتی ہیں۔
شمیم حنفی کے یہ کالم بنیادی طور پر موجودہ سیاسی، سماجی اور اقتصادی نظام کے خلاف احتجاج سے عبارت ہیں یہاں تک کہ بعض شخصی نوعیت کے کالم بھی اس عنصر سے خالی نہیں۔ "یہ کس کا خواب تماشا ہے" کی تحریروں کو اسی لیے میں نے "معجزہ" کہا ہے کیونکہ زبان و بیان کے اعتبار سے ان کالموں کا کوئی تعلق اردو میں کالم نگاری کی روایت سے قائم نہیں ہوتا جبکہ دوسرے تمام صحافیوں اور ادیبوں کے کالم نہ صرف موضوعات کے تعلق سے بلکہ زبان و بیان کے حوالے سے بھی ایک دوسرے کا چربہ نظر آتے ہیں۔ بالکل ایک جیسا ڈکشن، ایک جیسی لفظیات اور ایک جیسے موضوعات۔ اردو کے بیشتر کالم نگاروں کی تحریروں میں سے لفظوں کی فرسودگی کی بو آتی مھسوس ہوتی ہے۔ (چند ایک کو چھوڑ کر، مثلاً فرحت احساس کے کالم)۔
شمیم حنفی کے یہ کالم اردو میں کالم نگاری کی روایت سے ماورا ہیں۔ اور اپنی الگ دنیا کی تشکیل کرتے ہیں۔

ان کالموں میں بظاہر ایسا کچھ نہیں ہے، جو ایک باخبر آدمی پہلے سے نہ جانتا ہو۔ ظاہر ہے کہ کالم حالاتِ حاضرہ پر ہی لکھے جاتے ہیں۔ ان کالموں میں بھی وہی انسانی مسائل ہیں جنہیں ہم اخبارات میں خبروں یا اداریوں کی شکلوں میں بھی پڑھتے رہتے ہیں اور جن کا تعلق اقتصادیات، معاشیات یا سیاست اور سماج سے ہوتا ہے۔ شخصی اور تاثراتی قسم کے کالموں میں بھی یہ نکات بہرحال کسی نہ کسی طور آ ہی جاتے ہیں اور ہم ان سے واقف بھی ہوتے ہیں۔
مگر شمیم حنفی کی یہ تحریریں ہمیں باخبر کرنے کے لیے نہیں لکھی گئی ہیں، یہ ہمیں عرفان اور آگہی کا سبق دینے کے لیے لکھی گئی ہیں۔ خبر اور عرفان میں جو فرق ہوتا ہے، اس سے کون واقف نہیں، اپنی ذات کا وجودی تجربہ ہی دوسروں کے وجودی تجربے کا وسیلہ بنتا ہے۔ اس لیے راقم الحروف کے خیال میں یہ محض کالم نہیں ہیں۔ انہیں ہم اپنے اجتماعی ضمیر کی آواز پر کیے گئے شک اور اس کی اخلاقی عظمت سے انکار کے لیے ایک اعلان نامے کے بطور بھی پڑھ سکتے ہیں۔ یہ کارنامہ اکثر ایک بڑا فن پارہ ہی انجام دے سکتا ہے۔


***
نام کتاب: یہ کس کا خواب تماشا ہے (شمیم حنفی کے کالمز)
مرتب: خالد جاوید
ناشر: عرشیہ پبلی کیشنز، دہلی (سن اشاعت: 2014ء)
تعداد صفحات: 410
پی۔ڈی۔ایف فائل حجم: تقریباً 15 میگابائٹس
ڈاؤن لوڈ تفصیلات کا صفحہ: (بشکریہ: archive.org)
Ye kis ka khwab tamasha hai - Columns by Shamim Hanfi.pdf

Direct Download link:

GoogleDrive Download link:

فہرست کالم
نمبر شمار	عنوان	تاریخ اشاعت	صفحہ نمبر
الف	عرضِ مرتب	جولائی-1980	13
1	مکالمہ مابین سواری و یکہ بان - ایک امکان	جولائی-1980	17
2	چودھری محمد نعیم - ایک سفر اپنی تلاش کا	جنوری-1981	20
3	غرض کہ ایک زوال آشکار میں بھی تھا	جنوری-1981	23
4	تمھیں چادر کے اندر پاؤں پھیلانا نہیں آتا	جنوری-1981	26
5	کس قدر پیاری زباں اور کتنی دکھیاری زباں	جنوری-1981	30
6	منہ نظر آتے ہیں دیواروں کے بیچ	جنوری-1981	33
7	یاروں نے کتنی دور بسائی ہیں بستیاں	فروری-1981	39
8	پروفیسر عبدالسلام - کچھ یادیں کچھ سوغاتیں	فروری-1981	42
9	رولس رائس سے گدھا گاڑی تک	فروری-1981	45
10	علی گڑھ - تیرا مورخ کون ہوگا؟	مارچ-1981	49
11	غالب اور غالب کے ایک عاشق کی یاد میں	مارچ-1981	53
12	رنگ منت کش آواز بھی ہے!	مارچ-1981	57
13	یہ کہاں کی دوستی ہے؟	اپریل-1981	61
14	وہ حیلہ جو کہیں رستے میں رہ گیا ہوگا	اپریل-1981	65
15	خلیق بھائی : فنا ہوئے تو کچھ ایسے کہ جیسے تھے ہی نہیں	اپریل-1981	69
16	کتاب تماری - نام اور انعام ہمارا!	اپریل-1981	73
17	ہزار چوراسی کی ماں	مئی-1981	77
18	احمد مشتاق- گردِ مہتاب کا سفر	اکتوبر-1981	81
19	دیکھئے کب ملے کہاں کوئی؟	نومبر-1981	85
20	ہوئے تم دوست جس کے۔۔۔	نومبر-1981	88
21	بانی کی یاد میں	نومبر-1981	92
22	منہ نظر آتے ہیں دیواروں کے بیچ	دسمبر-1981	95
23	حافظے کا ایک ورق : سید احتشام حسین	دسمبر-1981	98
24	ایک مردِ فقیر کا سرمایہ	دسمبر-1981	101
25	اور بھی غم ہیں زمانے میں ۔۔۔	دسمبر-1981	104
26	خوابوں سے جی ڈرتا ہے۔۔۔	جنوری-1982	107
27	ایسی چنگاری بھی یا رب اپنے خاکستر میں تھی	فروری-1982	110
28	آپ کہتے ہیں تو پھر ٹھیک ہی کہتے ہوں گے	فروری-1982	114
29	کتابوں کا کمبھ میلہ	فروری-1982	118
30	عتیق بھائی - ایسا کہاں سے لاؤں کہ تجھ سا کہیں جسے	فروری-1982	122
31	کہیں تو ہوگا لکھا اس کا نقش پا دیکھیں	فروری-1982	126
32	جوش - کچھ یادیں، کچھ باتیں	مارچ-1982	129
33	فراق صاحب	مارچ-1982	133
34	اب اور کس قیامت کا انتظار ہے؟	مارچ-1982	137
35	ڈی۔ ایل۔ آر۔ 7710	اپریل-1982	141
36	ایک صفحہ - ضمیر کے قیدیوں کے لیے	اپریل-1982	145
37	ایک اور صفحہ - ہندوستان اور پاکستان کے انسان دوستوں کے لیے	اپریل-1982	149
38	یہ کیسی تعلیم ہے؟ ایک مڈل کلاس زاویۂ نظر	اپریل-1982	152
39	قائل تیشےے چیر گئے ان ساونتوں کے جسم	جولائی-1982	156
40	فلسطین فلسطین	جولائی-1982	159
41	ایک اور ویت نام	جولائی-1982	163
42	کرکٹ، کپل دیو اور پروفیسر دیوراج	جولائی-1982	167
43	اقوام متحدہ سے ایک فلسطینی اپیل	جولائی-1982	170
44	منٹو - مقدمے - مین را	جولائی-1982	174
45	آبگینہ تندئ صہبا سے پگھلا جائے ہے	اگست-1983	178
46	عوام خوش، حکمراں بھی مزے میں	اگست-1983	182
47	واجب القتل، واجب القتل	اگست-1983	186
48	پبلک کے اصرار پر	اگست-1983	190
49	تھوڑی چالاکی، تھوڑی دنیاداری اور بہت سی بے غیرتی	ستمبر-1983	194
50	دانشوروں کا سرکس	ستمبر-1983	197
51	سلیم احمد کے انتقال پر	اکتوبر-1983	201
52	ٹیلی وژن دیکھیے، مہذب بنیے	اکتوبر-1983	205
53	عالم خوندمیری کی یاد میں	نومبر-1983	209
54	قصہ ترقی پسند بندر کا	نومبر-1983	212
55	اردو کس کی زبان ہے	نومبر-1983	215
56	یہ کس کا خواب تماشہ ہے؟	اگست-1988	219
57	افسوس ! تم کو میر سے صحبت نہیں رہی	دسمبر-1988	223
58	میرا پیغام محبت ہے جہاں تک پہنچے	مارچ-2000	226
59	راہی معصوم رضا کہتے ہیں : اردو تہذیبی تجربے کا ہندی پیکر	اپریل-2001	231
60	کہ بکھر کے بھی یہ شیرازہ پریشاں نہ ہوا	ستمبر-2002	235
61	گجرات، ہندوستانی مسلمان اور راجندر یادو	اکتوبر-2002	241
62	مدرسے، فرقہ وارانہ دہشت گردی کے مراکز۔۔۔۔	نومبر-2002	244
63	چراغ بجھتے چلے جا رہے ہیں سلسلے وار	دسمبر-2002	248
64	جون ایلیا	دسمبر-2002	250
65	یہ آتش بازی بند ہونی چاہئے	دسمبر-2002	253
66	انجمن اسلام، ڈاکٹر اسحاق جمخانہ والا اور مسلم ادارے	جنوری-2003	259
67	کشمیر اداس ہے	جنوری-2003	262
68	دلی اب کے ایسی اجڑی گھر گھر پھیلا سوگ	فروری-2003	266
69	اس دیوار میں کہیں کوئی کھڑکی نہیں ہے	فروری-2003	269
70	ذاکر صاحب ، اردو اور سیکولر ہندوستان	مارچ-2003	273
71	جو ہم ادھر سے نہ گزریں گے کون دیکھے گا	اپریل-2003	277
72	ہوا نے دی ہے خبر رات کے گزرنے کی	اپریل-2003	280
73	جانا جاتا ہے کہ اس راہ سے لشکر گزرا	مئی-2003	283
74	یہ کیسا دلدوز موسم خزاں ہے۔۔۔	مئی-2003	288
75	زوال بغداد کی کہانی	مئی-2003	294
76	یہ کس کا خواب تماشا ہے؟	جون-2003	299
77	الہ الدین کا چراغ، ماہنامہ سائنس اوراصغر علی انجینئر	جون-2003	304
78	یہ کیسا گورکھ دھندا ہے یہ کیسا تانا بانا ہے	جولائی-2003	308
79	دیکھو! ہم نے کیسے بسر کی اس آباد خرابے میں	جولائی-2003	312
80	لب پہ حرفِ غزل، دل میں قندیل غم	اگست-2003	316
81	وہ انتظار تھا جس کا یہ وہ سحر تو نہیں	ستمبر-2003	321
82	کتنے پت جھڑ ابھی باقی ہیں بہار آنے میں	اکتوبر-2003	328
83	اوروں کا ہو پیام اور میرا پیام اور ہے	نومبر-2003	333
84	مومن کی یہ پہچان کہ گم اس میں ہیں آفاق	دسمبر-2003	340
85	گھری ہوئی ہے طوائف تماش بینوں میں	دسمبر-2003	342
86	اردو ہندی تنازعہ	دسمبر-2003	346
87	دیکھنا ان بستیوں کو تم کہ ویراں ہو گئیں	جنوری-2004	351
88	یہ ڈرامہ دکھائے گا کیا سین	جنوری-2004	356
89	تذکرہ خان صاحب اور خواجہ صاحب کا	فروری-2004	360
90	چہرے، مکان، راہ کے پتھر بدل گئے	مارچ-2004	364
91	برائے درس اب اطفالِ شہر آتے ہیں	اپریل-2004	368
92	چھٹے دریا کو پار کرتے ہوئے (پہلی قسط)	اپریل-2004	373
93	چھٹے دریا کو پار کرتے ہوئے (دوسری قسط)	مئی-2004	376
94	چھٹے دریا کو پار کرتے ہوئے (تیسری قسط)	جون-2004	380
95	چھٹے دریا کو پار کرتے ہوئے (چوتھی قسط)	جون-2004	384
96	چھٹے دریا کو پار کرتے ہوئے (پانچویں قسط)	جولائی-2004	388
97	چھٹے دریا کو پار کرتے ہوئے (آخری قسط)	جولائی-2004	393
98	میں ایک کرن تھا شب تار سے نکل آیا	مئی-2004	401
-	پوسٹ اسکرپٹ	-	406

Ye kis ka khwab tamasha hai (Columns), by: Shamim Hanfi, pdf download.