بٹلہ ہاؤس میں بنیادی سہولتوں کی عدم فراہمی سے لوگ پریشان - Taemeer News | A Social Cultural & Literary Urdu Portal | Taemeernews.com

2014-09-22

بٹلہ ہاؤس میں بنیادی سہولتوں کی عدم فراہمی سے لوگ پریشان

نئی دہلی
پی ٹی آئی
جنوبی دہلی کے مسلم اکثریتی علاقہ میں بٹلہ ہاؤز انکاؤنٹر کے واقعات کو گزرے 6سال ہوچکے ہیں۔ لیکن اس علاقہ میں مناسب سڑکیں ، پانی کی سپلائی اور دیگر ضروریات کے مسائل پر کسی کی توجہ نہیں ہے ۔ یہاں کے لوگوں کا احساس ہے کہ سیاست داں بارہا مطالبات کے باوجود بنیادی سہولتیں فراہم کرنے پر کبھی اپنی توجہ نہیں دی ۔ جب کہ سیاست داں ان بنیادی مسائل کو حل کرنے کے بجائے سیاسی فائدہ اٹھانے میں اپنی دلچسپی دکھاتے ہیں۔19ستمبر2008کو جامعہ نگر کے بٹلہ ہاؤز کے فلیٹ نمبر1-18میں انکاؤنٹر کا واقعہ پیش آیا تھا ، جب کہ6روز قبل دہلی میں سلسلہ وار بم دھماکوں میں26افراد ہلاک اور133زخمی ہوگئے تھے ۔ انکاؤنٹر میں عاطف امین اور محمد ساجد ہلاک ہوگئے تھے ۔ دہلی پولیس کے انسپکٹر محمد چندشرما، انکاؤنٹر میں زخمی ہوگئے تھے ، تاہم وہ بعد میں زخموں سے جانبر نہ ہوسکے تھے ۔
کانگریس قائد ڈگ وجئے سنگھ نے اس انکاؤنٹر کو جعلی قرار دیتے ہوئے ایک تنازعہ کھڑا کردیا تھا ۔ اس کے بعد بی جے پی اور کانگریس کے درمیان لفظی جھڑپ شروع ہوگئی تھی ۔ جامعہ ملیہ اسلامیہ کے ایک طالب دنیش ورما ، جو اس علاقہ میں رہتے ہیں کا کہنا ہے کہ6سال گزرنے کے باوجود ہمیں پولیس ہراسانی کا سامنا ہے ، انکاؤنٹر کا بھوت ابھی بھی ہمارا پیچھا کررہا ہے۔ علاقہ کے ایک اور فرد پروین کا کہنا ہے کہ ایم پی فنڈ کا سب سے کم خرچ یہاں ہوتا ہے ۔ انکاؤنٹر کے بعد کئی مقامی نوجوانوں کو گرفتار کیا گیا ، جس کے نتیجہ میں کئی تنظمیں احتجاج پر مجبور ہوگئی تھیں ۔ علاقہ میں ترقیاتی کاموں کے تعلق سے بابو سنگھ سجوال نے کہا کہ علاقہ میں پانی کی سپلائی انتہائی ناقص ہے ، حالانکہ انتظامیہ کو اس تعلق سے بار بار متوجہ کیا گیا ۔ سڑکیں انتہائی خراب حالت میں ہیں ۔ دکان اور کھانے پینے کی ہوٹلوں کے سبب سڑکوں کی چوڑائی کم ہوگئی ہے ۔

Locals cry for basic amenities on 6th anniv of Batla encounter

کوئی تبصرے نہیں:

ایک تبصرہ شائع کریں