وزیر اعظم مودی کی بھوٹان کے راجہ سے ملاقات

وزیر اعظم نریندر مودی نے آج بھوٹان کے راجہ جگمے کھیسر نمکیل وانگ چک سے ملاقات کی اور ان دونوں قائدین نے انفرادی اور خصوصی باہمی تعلقات کو مضبوط بنانے پر بات چیت کی ۔ تقریباً ایک گھنٹے تک جاری رہنے والی اس ملاقات کے دوران وزیر اعظم نریندر مودی نے بھوٹان کے راجہ اور ان کی اہلیہ جٹسن پیما کو ہندوستان آنے کی دعوت دی ۔ ذرائع نے اس ملاقات کو کافی بہتر قرار دیا ۔ ملاقات کے بعد ان دونوں قائدین نے مصافحہ کرتے ہوئے اپنا مشترکہ فوٹو گراف کھنچوایا ۔ بعد ازاں اس گروپ فوٹو میں راجہ کی اہلیہ پیما اور وزیر امور خارجہ سشما سوراج بھی قائدین کے ساتھ شامل ہوگئیں ۔ ملاقات سے قبل نریندر مودی کا محل میں گرمجوشانہ اور وایتی رقص کے ساتھ استقبال کیا گیا۔ بعد ازاں انہیں گارڈ آف ہانر بھی پیش کیا گیا اور دونوں ممالک کے قومی ترانے گائے گئے۔ وزیر اعظم مودی کی محل میں آمد سے قبل زبردست بارش ہوئی جس کے بعد یہ اندیشہ پیدا ہوگیا تھا کہ کھلے آسمان تلے گارڈ آف آنر کی تقریب منعقد کی جاسکے گی یا نہیں۔ مودی وزیر اعظم کی حیثیت سے اپنا پہلا بیرونی دورہ کررہے ہیں۔ ان کے ساتھ سشما سوراج ، قومی سلامتی مشر اجیت دوول اور معتمد خارجہ سجاتا سنگھ بھی موجود ہیں ۔ وزیر اعظم نے اپنے پہلے بیرونی دورہ کے طور پر بھوٹان کا اس لئے انتخاب کیا ہے کیونکہ چین نے حالیہ عرصہ کے دوران بھوٹان کے ساتھ سفارتی تعلقات کو فروغ دینے کی کوشش کی ہے ۔