وہ جو آسودۂ ساحل ہیں انہیں کیا معلوم ۔۔۔

8/اپریل مضمون زبیر شیخ حسن

شیفتہ کا برقی پیام آیا ۔۔ لکھ بھیجا ۔۔۔۔ "بھا ئی صاحب قریب المرگ ہیں اور خود احتسابی کے مرحلے میں ہیں ، ایک عدد گواہ چاہتے ہیں، شام ڈھلے گھر آئیے گا" ۔۔۔۔ قریب المرگ اور شام ڈھلے میں عجیب و غریب مطابقت تھی۔۔۔۔۔۔ پڑھکر قنوطیت طاری ہو گئی - یہ خیال گزرا کہ شیفتہ بر صغیری کو اکثر بھا ئی صاحب کہہ کر بلاتے ہیں، کہیں انکا ہی چل چلاو نہ ہو، لیکن انکے قریب المرگ ہونے کے آثار تو نظر نہیں آتے! در اصل مرگ کا کیا ہے، وہ کب کسی سے دور ہوتی ہے، پتہ نہیں کس نے قریب المرگ کی اصطلاح متعارف کرا ئی۔۔۔۔۔ الکشن سب کے سر پر سوار ہے، سوچا برصغیری تو ہٹے کٹھے ہیں، حب الوطنی کے جذبہ سے شرا بور، الیکشن کے نشے میں چور، معاشی بد حالی سے رنجور اور جھو ٹی امیدوں کے نشے میں مخمور- ہم میں سے ایسے کتنے ہونگےبقول علامہ جنہیں یہ کہا جا سکتا ہے کہ ۔۔۔۔ اس سراب رنگ و بو کو گلستاں سمجھا ہے تو۔۔۔۔۔۔آہ ! اے ناداں قفس کو آشیاں سمجھا ہے تو۔۔۔۔۔۔ خیالات کے انہیں نشیب و فراز سے گزر کر ہم شیفتہ کے گھر جا پہنچے – بھا ئی صاحب کو دیکھتے ہی پتہ چلا وہ تو شیفتہ کے حقیقی بڑے بھا ئی ہیں۔۔۔۔اور بستر سے لگے ہیں- شاید ہمارا غائبانہ تعارف رکھتے تھے- ہمیں دیکھتے ہی انکے کتابی چہرے پر کئی رنگ آئے اور گئے، لبوں پر ایک تبسم آمیز لکیر آکر ٹہر گئی- ۔۔۔مانوں جیسے کتاب زیست پر خط تنسیخ کھینچنے کی کوشش کی ہو - ہمیں جرم ضعیفی اور مرگ مفاجات سے لے کر مکافات تک سب کچھ یاد آگیا - ہم نے شیفتہ کی طرف استفہامیہ نظروں سے دیکھا اور وہ ہمارا اشارہ سمجھ کر اپنے بھائی صاحب سے مخاطب ہویے - اب کہہ بھی ڈالیے جو کچھ کہنا ہے ۔۔۔۔۔ اور ساتھ ساتھ کلمہ بھی پڑھتے جائیے۔۔۔۔۔۔ بھا ئی صاحب نے رک رک کر کہنا شروع کیا ۔۔۔۔۔ دو روپے چار آنے اسکول کے باہر۔۔۔۔۔۔۔۔ خوانچہ لگانے والی بڑھیا کی طرف سے خیرات کرنا ہے۔۔۔ اس کا ہم پر بقایہ ہے ۔۔۔۔۔۔ بچپن میں ایک بار اسکے پھل اور بیر چرا کر کھائے تھے۔۔۔۔۔۔ اس لئے پورے تین روپے دے دینا۔۔۔ اس بڑھیا کی طرف سے کچھ درورد و سلام بھی ہم نے بھیجے ہیں ۔۔۔۔۔اور کچھ اذکار بھی اسکے نام کر دیے ہیں ۔۔۔۔۔۔ اس کا اجر اسے ملے تو کچھ گلو خلاصی کے امکانات ہونگے - رب ہماری مغفرت کرے گا- حساب کتاب میں کچھ تو توازن ہوگا ۔۔۔ اور ہاں کالج کی کینٹین والے کے دس روپے نو آنے ہم پر بقایا ہیں۔۔۔۔۔۔۔ اب تو وہ بھی مرحومین میں شامل ہو چکا ہوگا - کہیں ہمارے وہاں پہنچتے ہی تقاضا نہ کر بیٹھے۔۔۔۔ حالانکہ خراب باسی سینڈویچ دیا کرتا تھا کمبخت ۔۔۔۔۔لیکن ہم نے اسے معاف کر دیا ہے۔۔۔ اب تک تو اسے پتا بھی چل گیا ہوگا۔۔۔۔۔۔۔ ہاں اسکی چائے لاجواب ہوتی تھی۔۔۔۔۔ یا پھر شاید جوانی اور کالج کے ماحول میں ہر ایک چیز لا جواب نظر آتی ہوگی۔۔۔۔۔ اسکی طرف سے گیارہ روپے اسی کے محلہ میں۔۔۔۔ بچوں میں تقسیم کردینا ۔۔۔ اب کیا کریں حقوق کی ادائیگی کسی طور ہو، ورنہ ان بقایاجات کے حقدار تو انکے رشتے دار ہی ہوتے ہیں۔۔۔۔۔۔۔لیکن انہیں کہاں ڈھونڈنے جائیں گے- دین میں رعایت تو ہے نا ۔۔۔۔ ہاں ہم کہیں بھول نہ جائیں۔۔۔۔۔۔۔۔ ہمارے مرحوم پڑوسی دوست ۔۔۔۔۔۔صالح کی طرف سے اسکول کے بچوں کو کتاییں خرید کر دینا نہ بھولنا۔۔۔ اسکے روپے الگ سے رکھے ہیں۔۔۔۔۔ ہمارا دوست ایک کلاس ہم سے آگے تھا، اور ہر سال با قاعدہ اپنی پرا نی کتابیں ہمیں دیا کرتا تھا۔۔۔۔ وہی کتابیں ہم اگلے برس بغل والے پڑوسی کو دے دیا کرتے تھے۔۔۔۔۔ جو اکثر امتحان میں ناکام ہوجاتا تھا ، اس لئے پتہ نہیں ہماری اس نیکی کا اجر ملے نہ ملے۔۔۔ بلکہ اس کمبخت کی امتحان میں نا کا می کے ذمہ دار ہم نہ ٹہریں ۔۔۔۔۔۔۔ ویسے صالح کے لئے تو ہم اکثر دعا کرتے ہی رہتے ہیں۔۔۔۔ لیکن پھر بھی حساب تو حساب ہے نا۔۔۔۔۔۔۔ ان حسابات کے علاوہ کچھ غیبتیں، کچھ خرافاتی باتیں، کچھ کچھ بے فایدے کا لکھنا پڑھنا بھی ہوا ہے۔۔۔کچھ دیکھی ان دیکھی بھی ہوئی ہے ۔۔۔۔ کچھ اپنوں پرایوں کے ساتھ نا انصافیاں بھی ہوئی ہیں ۔۔۔۔کچھ زوجہ کے حقوق ۔۔۔کچھ والدین کے اور کچھ اولاد کے ۔۔۔کچھ پڑوسیوں کے بھی تھے۔۔۔۔۔۔ اور کچھ صاحب الجنب کے ۔۔کچھ اغیار کے بھی ۔۔۔۔۔۔ بہر حال حق تلفی ہو ئی ہے۔۔۔۔ چاہے جو بھی ہو ۔۔۔۔۔۔ اور ہاں کچھ احسانات بھی ہیں ۔۔۔ بس کیا کہیں کہ ایک ذرا سی زندگی میں کیا کچھ ہے اور کتنا کچھ ہے ۔۔۔۔۔۔۔ اور خسارہ زیادہ نظر آتا ہے ۔۔۔ اپنے ہی ہاتوں میں میزان کانپتی ہے۔۔۔۔ وہاں جانے کیا ہو ۔۔۔۔۔۔۔ ان سب کا ازالہ کیسے ہو ۔۔۔۔اب وقت بھی بلکل نہیں رہا ۔۔۔۔۔۔بھئی سب کچھ گزرے کل کی بات محسوس ہوتی ہے ۔۔۔۔اور ہر ایک کو محسوس ہوتی ہے ۔۔۔۔۔۔۔۔۔ یہ کہتے کہتے انہوں نے شیفتہ سے نظریں اٹھا کر کہا۔۔۔۔۔۔۔ ذرا کھڑکی سے پردہ ہٹانا ۔۔۔ اور پردہ سرکتے ہی ایک نظر کھڑکی کے پار ڈالی اور پھر گویا ہوئے ۔۔۔۔ ظالم دنیا کسقدر حسین ہے۔۔۔۔۔۔ کتنی کشش رکھتی ہے۔۔۔۔ اور وہ شیطان کمبخت اسے اور بھی خوشنما اور پر کشش بنا کر دکھا رہا ہے ۔۔۔۔چاہتا ہے جاتے جاتے بھی دل یہیں الجھا رہے ۔۔۔۔بد بخت نے بچپن میں کھیل کود میں الجھائے رکھا ۔۔۔۔ جوانی میں مختلف دیوانگی اور مسائل میں ۔۔اور ۔ اب ۔۔۔۔۔۔ہماری مغفرت کے درمیان رخنہ ڈال رہا ہے ۔۔۔۔۔۔۔۔ اور ہاں۔۔۔ ہم تو بھول ہی گیے۔۔۔۔۔۔ ہماری آخری ملازمت جس کمپنی میں تھی۔۔۔۔۔ ان کے مالکان کی طرف سے چالیس پچاس صفحات کی زیروکس کاپیوں کی رقم۔۔۔۔۔۔۔ بلکہ کچھ زیادہ ہی ہو تو بہتر ہے۔۔۔ غریبوں میں بانٹ دینا ۔۔۔۔۔۔۔ اب کیا کریں ذاتی کاغذات کی کچھ نقل فوری درکار تھی۔۔۔۔۔۔۔۔۔ اور ایک دن ہم نے دفتر میں ہی نقل تیار کروالی تھی ۔۔بلا اجازت ۔۔۔۔۔۔۔ بس اب اسکا بھی حساب صاف ہو جائے تو بہتر ہے۔۔۔۔۔۔۔ ویسے دفتر کے مالکان کے لئے ہم دعائیں کرتے رہے ہیں۔۔۔۔۔۔۔ بھئی پیارے شیفتہ آپ سب لکھ رہے ہیں نا۔۔۔۔شیفتہ نے کہا جی جی ۔۔۔جی ہاں۔۔۔۔۔

ہم نے سوچا ۔۔۔ کل ملا کر چار پانچ سو روپوں کا حساب بنتا ہے ، یا زیادہ سے زیادہ ایک ہزار سکہ رائج الوقت کے تحت نکلتا ہوگا۔۔۔۔ لیکن جس زمانے کے یہ بقایاجات ہیں اس زمانے میں ایک ہزار روپے میں پگڑی پر گھر مل جاتے تھے ۔جو آج لاکھوں روپوں کے ہیں۔۔۔۔ ایک ہزار میں اب ایک مناسب لباس بھی نہیں آتا ۔۔۔ بھائی صاحب کو کیا پتہ۔۔۔۔۔ الله ان پر رحم کرے۔۔۔کیسے حساب دے پائیں گے ۔۔۔۔ پتہ نہیں اپناکیا ہوگا ۔۔۔۔ لاکھوں کا جوڑ توڑ ۔۔۔ اور پھر اپنے میزان میں تو ابھی عبد کے ساتھ ساتھ معبود کے بے شمار حقوق ہیں جو ادا نہ ہوسکے ۔۔۔۔۔

بھا ئی صاحب ہماری پیشا نی پر قطرے نمودار ہوتا دیکھ کر پھر مسکرانے لگے اور گویا ہوئے۔۔۔۔ اب آپ بتائیے گا۔۔۔ کچھ حساب کتاب بہت پیچیدہ ہیں انکاکیا کریں۔۔۔ پچھلے پانچ چھ دہایوں سے الکشن میں با قاعدہ رائے شماری میں حصہ لیا ہے۔۔۔۔۔۔۔ ان میں سے کسی بھی امیدوار نے عوام کی بھلا ئی کے لئے ایمانداری سے کام نہیں کیا۔۔۔۔ بلکہ اکثر نے تو بےایمانی کی ہے اور خرد برد کیا ہے۔۔۔۔۔ اور سب سے بڑھکر ہمارے دین ایمان کو نقصان پہنچایا ہے۔۔۔ ہمارے اعتماد کا خون کیا ہے۔۔۔ اب اس حساب سے کیسے نجات پا ئیں ۔۔۔۔ کہیں یہ گواہی عذاب جاریہ نہ ہو جائے۔۔۔۔۔۔ بلکہ جوانی میں اکثر ایک سیاسی پارٹی کی دامے درمے سخنے مدد بھی کرتے رہے ہیں۔۔۔۔۔ بڑے نعرے بلند کیے تھے ۔۔اور جھنڈے لہرائے ۔۔۔۔۔۔۔ اور اب سنا ہے اسی سیاسی جماعت کی مجرمانہ خا موشی نے قوم و ملت کو در بدر ہونے پر مجبور کیا ہے۔۔۔بلکہ حقیقت تو یہ ہے کہ ہمیں اور ہم جیسوں کو بلواسطہ یا بلا واسطہ ان سیاسی پارٹیوں سے کوئی فایدہ ، سوا نقصان کے نہ ہوا۔۔۔۔۔ اس بار ہمارا ووٹ شاید آخری ہو۔۔۔۔۔۔ اور یہ بھی ممکن ہے مہلت ہی نہ ملے اور اسکی نوبت ہی نہ آئے۔۔۔۔۔ اور اگر آ ئی تو اب سوچ سمجھ کر ہی ووٹ دینگے ۔۔۔ اور اگر تمام امیدوار غیر معتبر اور نااہل ہویے تو " NOTA (none of the above) " کی رعایت کا استعمال کریں گے ۔۔۔۔۔اور ان میں سے کسی کو بھی ووٹ نہ دیں گے ۔۔۔۔۔ اہل جموریت کو پتہ تو چلے کہ اگر امیدواروں میں غیر معتبر اور نا اہل حضرات کی بھر مار ہے تو بھئی کیوں ہے؟ ۔۔اور اب کیا کیا جانا چاہیے؟ ۔ اس کا کو ئی علاج ہے بھی یا نہیں ۔۔۔۔۔۔ بقول علامہ سٹنڈل نے اس راز کو فاش کیا کہ۔۔۔۔۔ جمہوریت میں بندوں کو گنا کرتے ہیں تولا نہیں کرتے ۔۔۔۔۔لوگ باگ تو احمقانہ باتیں کر تے ہیں۔۔۔۔سیکولر وووٹ بینک کو نہ تو ڑیں ۔۔۔۔ کسی بھی طرح بھگوا پارٹیوں کو حکومت میں آنے سے روکیں اور ووٹ ضرور دیں ۔۔۔۔۔ورنہ مسلمانوں کو سانس لینا دشوار ہوجائیگا۔۔۔۔وہ اس سے پہلے بھی آکر گئے ہیں۔۔۔ جب اونٹ پہاڑ کے نیچے آیا تھا ۔۔۔۔ٹھیک ہے مناسب اور اہل امیدوار اگر ہے تو ضرورو دیں گے ۔۔کیا غیر بھگوا پارٹیوں میں بھگوا ذہنیت کے حامل نہیں ہیں ۔۔۔ان میں کون دودھ کا دھلا ہے ۔۔۔سب مادیت پرستی کا کھیل ہے اور لوگ جان کر انجان بن رہے ہیں ۔۔۔۔۔۔بھئی اب دنیا کے لئے آخرت تو داؤ پر نہیں لگا ئی جا سکتی نا۔۔ ان سیاستدانوں کا کیا ہے۔۔۔۔ جمہوریت کے تالاب کے کنارے اگے ہوئے سوکھے درختوں کی مانند ہیں۔۔۔جن کا عکس تالاب میں نظر آتا ہے۔۔۔ اب بھلا عکس کے مسلسل پانی میں رہنے سے تو درخت ہرے بھرے نہیں ہوتے نا !۔۔۔ علامہ نے خوب کہا۔۔۔۔ نہ ہو طبیعت ہی جنکی قابل، وہ تربیت سے نہیں سنورتے۔۔۔۔۔۔۔۔۔۔ ہوا نہ سر سبز رہ کے پانی میں عکس سرکنار جوکا۔۔۔۔۔۔۔۔۔ ہاں تو اب بتایئے ان تمام رائے شماریوں میں ہم نے جو گواہی دی ہے اور جو نا کردہ گناہ ہیں ان کا کیا کریں؟۔۔۔ ہم بھی سب کی طرح آسودۂ ساحل رہے ۔۔۔۔۔۔اور حالات پر قانع ۔۔۔۔ آنے والی نسلوں کے لئے بس ایک صبر و قناعت کا جھوٹا مفہوم چھوڑ کر جا رہے ہیں۔۔۔۔ کبھی اس خیال پر غور نہیں کیا کہ۔۔۔۔۔۔۔" وہ جو آسودہ ساحل ہیں انہیں کیا معلوم ۔۔۔ اب کے موج آ ئی تو پلٹے گی کنارے لے کر"۔۔۔۔۔ ہما ری طرح ہزاروں کی عمر یوں ہی گزر گئی۔۔۔۔۔۔ اور ہماری آنکھوں نے موجوں کوآ آ کر کناروں سے ٹکراتے دیکھا ۔۔۔۔۔۔ ہم تو بچ کر نکلتے رہے ۔۔۔ لیکن آنے والی نسلوں کو ڈوبنے سے بچانے کے لئے کچھ بھی نہ کیا ۔۔۔ اب اس کا ازالہ کیوں کر کریں۔۔۔اور ہاں قوم و ملت کے استبداد و استحصال کی جو سازش ر چی جا رہی تھی ۔۔۔۔ اور جس پر مختلف حیلے بہانوں سے جوخا موشی اختیار کر رکھی تھی ۔۔۔ اس کا بھی کچھ ازالہ ہونا چائیے نا ۔۔۔۔۔۔ بھگوا تنظیمیں اور انکے پروردہ ۔۔۔۔ اب کھل کر کھیل کر رہے ہیں۔۔۔۔ اپنے منشور میں ۔۔۔۔ ہندوتوا کا لائحہ عمل یکساں سول کوڈ کے لبادے میں تیار کر رکھا ہے ۔۔۔۔۔۔۔۔ آرٹیکل 370 اور مسجد کی جگہ کو غصب کر مندر میں تبدیل کرنے کا کھلا اظہار بھی کر چکے ہیں - شا ہنوازوں ، مختاروں ، نجماؤں اور اکبروں کو ہما ری شناخت بنا کر پیش کیا جا رہا ہے ۔۔۔۔۔۔ذرائع ابلا غ کہیں الزامات اور تہمتوں کی رنگینیوں میں مگن ہیں تو کہیں تعصب کی سیاہی میں شرابور - مسلم سیاستداں خود غرضی اور دنیاوی مفادات کی خاطر ایمان کا سودا کر چکے ہیں، ایسے نام نہاد مسلمانوں کو اپنی آخرت کا کیا پتہ ۔۔۔۔۔۔۔اکبر تو حال ہی میں "تلواروں کی چھاوں" میں ایک کتاب تصنیف کر سمجھ بیٹھے کہ حق مسلمانیت ادا ہو گیا۔۔۔۔۔۔۔ اب جو چاہے سو کرینگے ۔۔۔۔۔۔ ایسے ادیبوں نے ہی سوشل ازم اور سیکولر ازم کے نام پر مسلمانوں کا بیڑہ غرق کیا ہے – ہماری شنا خت بن کر ہمارے ہی قلب میں خنجر گھونپا ہے ۔۔۔۔۔۔دشمن کا ساتھ دینے کے لئے کیا کیا علتیں نہیں تراشی ۔۔۔۔۔ کیسے کیسے جواز نہیں ڈھونڈے ۔۔۔۔۔۔چند تو ایسے بھی ہیں جو دشمنوں کی صف میں کھڑے ہو کر یہ دلاسہ دے رہے ہیں۔۔۔۔۔ کہ ہم قوم و ملت کی ڈھال بن رہے ہیں۔۔۔۔ دشمن بھی خوب ہنس رہا ہے ۔۔۔اب کس کس کا ذکر کریں ۔۔۔۔سیاست کے تالاب میں سب کے دامن تر ہیں۔۔۔ اور تار تار بھی۔۔۔ان میں سے اکثر کے دامن تو آگے سے تار تار ہیں۔۔۔۔ حیف کہ دعو ی یوسف مصر ہونے کا کر رہے ہیں۔۔۔۔۔۔ ویسے حقیقت یہ ہے کہ ہندوستان میں اکثریت کسی کی نہیں ہے۔۔۔۔لوگ اتنے خانوں میں بٹے ہیں۔۔۔۔۔ کو ئی احمق ہی ہوگا جو ہندو اکثریت کی بات کر رہا ہوگا ۔۔۔۔ یہاں تو ہر ایک کا اپنا ایک عقیدہ ہے اور ہر ایک کی اپنی بے بسی ، اپنی زبان، اپنی کہانی ۔۔ اپنی ماں ، اپنا بھگوان، اپنا خاندان، اپنا نیتا، اپنا مال ۔۔اور اپنے اپنے مسا ئل ۔۔۔۔۔۔۔۔ اور جو کچھ الکشن کے وقت اور فرقہ وارانہ فسادات کے وقت نظر آتا ہے وہ سارا ماحول تو بنا بنایا ہوتا ہے ۔۔۔۔روپوں کے زور پر ۔۔۔۔ طاقت کے زور پر ۔۔۔سازشوں کے زور پر ۔۔ ۔شیفتہ نے فرمایا ۔۔۔۔۔۔۔بھائی صاحب آپ کے لئے اب صرف وقت استغفار بچا ہے ۔۔۔ہاں آپ کی روداد آنے والی نسلوں تک پہنچا دی جایے ۔۔۔ بس یہی کچھ ہوسکتا ہے ۔۔۔۔۔ تاکہ وہ کچھ نصیحت لے اور آپ کی کوتاہیوں کا کچھ ازالہ ہو جائے۔۔۔۔۔۔۔۔۔بھائی صاحب نے پلکوں سے ایک موتی انگلیوں کی پوروں سے اٹھایا اور گویا ہوئے۔۔۔

اس موج کے ماتم میں روتی ہے بھنور کی آنکھ
دریا سے اٹھی لیکن ساحل سے نہ ٹکرا ئی

***
Zubair H Shaikh
zubair.ezeesoft[@]gmail.com

Those who are staying at the beach. Article: Zubair H Shaikh