دہشت گرد کے رشتہ دار کو پاسپورٹ اجرائی سے انکار نہیں کیا جا سکتا

سری نگر۔
(یو این آئی)
جموں و کشمیر ہائی کورٹ نے آج اپنے ایک اہم اور تاریخی فیصلہ میں کہاکہ کسی قسم کی غیر قانونی سرگرمیوں میں ملوث شخص کے رشتہ دار کو پاسپورٹ جاری کرنے سے انکار نہیں کیا جاسکتاہے۔ ریجنل پاسپورٹ آفیسر‘ سری نگر کے ایک حکم کو کالعدم کرتے ہوئے عدالت نے کہاکہ اگر ’اے‘ نے جرم کا ارتکاب کیا ہے تو ’بی‘ کو اس کی سزا نہیں دی جانی چاہئے۔ پاسپورٹ آفیسر نے ایک شخص اور اس کی اہلیہ کو اس بنیاد پر پاسپورٹ جای کرنے سے انکار کردیا تھا کہ اُس کا بھائی ایک عسکریت پسند ہے اور پاک مقبوضہ کشمیر میں رہتا ہے۔ جسٹس علی محمد ماگرے نے شمالی کشمیر میں ضلع سوپور کی بلال کالونی کے رہنے والے عمر علی اور اُن کی اہلیہ سمیرہ نظیر کی جانب سے پیش کردہ درخواست پر پاسپورٹ حکام کو یہ ہدایت جاری کی۔ کامرس میں ماسٹرس ڈگری رکھنے والے عمر روزگار کے سلسلہ میں اپنی اہلیہ کے ساتھ باہر جانا چاہتے ہیں لیکن آر پی او نے عمر کے بھائی عبدالمجید صوفی کے عسکریت پسند ہونے کی بنیاد پر اُن کے خلاف سی آئی ڈی کی منفی رپورٹ پر انہیں پاسپورٹ جاری کرنے سے انکار کردیا۔ عمر اور ان کی اہلیہ نے پاسپورٹ حکام کواجرائی پاسپورٹ کی ہدایت دینے کی التجا کرتے ہوئے ہائی کورٹ میں درخواست داخل کی تھی۔ درخواست گذاروں نے 3مارچ 2012ء کو پاسپورٹ کیلئے درخواست دی تھی۔ عدالت نے انسپکٹر جنرل پولیس سی آئی ڈی کو ہدایت دی کہ درخواست گذاروں کے معاملہ پر ایک درخواست گذار کے بھائی کی عسکریت پسندی سے وابستگی سے متاثر ہوئے بغیر معروضی انداز میں نظر ثانی کی جائے اور آر پی او کو اندرون دو ہفتے درخواست گذاروں کی شخصی سرگرمیوں کی روشنی میں مناسب رپورٹ جاری کی جائے۔

Unlawful to deny passport because of relative’s offence: HC