Rajnath Singh hits back at Congress, says it divides on religious lines
بی جے پی کو فرقہ پرست قرار دینے پر صدرنشین یوپی اے سونیا گاندھی کو نشانہ تنقید بناتے ہوئے پارٹی صدر راجناتھ سنگھ نے آج کانگریس پر الزام عائد کیا کہ وہ عوام کو مذہبی خطوط پر بانٹنے کی سیاست کررہی ہے۔ انہوں نے وزیراعظم منموہن سنگھ کو بھی ان کے اس تبصرہ کے سلسلہ میں نشانہ تنقید بنایا کہ اگر نریندر مودی ملک کے وزیراعظم بنتے ہیں تو یہ تباہ کن ہوگا۔ راجناتھ سنگھ نے کہاکہ دراصل منموہن سنگھ کی معیاد تباہ کن رہی ہے جب کہ مودی کی زیر قیادت گجرات ایک مثالی ریاست بن گئی ہے۔ راجناتھ سنگھ نے بی جے پی کے قومی کونسل اجلاس سے خطاب کرتے ہوئے کہاکہ میں سونیا گاندھی کو یاد دلانا چاہوں گا کہ وہ منموہن سنگھ ہی تھے جنہوں نے کہا تھا کہ ہندوستان کے وسائل پر اولین حق مسلمانوں کا ہے۔ اگر کوئی پارٹی مذہبی بنیادوں پر فیصلے لیتی ہے تو وہ کانگریس ہے۔ اگر کوئی پارٹی فرقہ پرست ہے تو وہ کانگریس ہے۔ انہوں نے مزید کہاکہ وزیر داخلہ سشیل کمار شنڈے ہی وہ شخص ہیں جنہوں نے ہندو دہشت گردی کے بارے میں بیان دیا تھا۔ یہاں یہ تذکرہ مناسب ہوگاکہ سونیا گاندھی نے کل اے آئی سی سی اجلاس میں اپنے خطاب میں کہا تھا کہ بی جے پی انتشار پسند اور فرقہ پرست نظریات رکھتی ہے۔ راجناتھ سنگھ نے یہاں پارٹی کارکنوں سے خطاب کرتے ہوئے کہاکہ کانگریس کے نائب صدر راہول گاندھی، لوک پال بل کی منظوری کا سہرا اپنے سر لینے کی کوشش کررہے ہیں جب کہ سماجی جہد کار انا ہزارے کی کوششوں کی وجہہ سے یہ قانون سازی کی گئی اور بی جے پی قائدین نے بھی حکومت پر دباؤ ڈالا تھا۔ بی جے پی صدر نے کہاکہ کانگریس زیر قیادت حکومت عوام کی توقعات پر پورا اترنے میں ناکام ہوگئی ہے۔ جب کہ معیشت کی حالت ابتر ہے۔ انہوں نے کہاکہ کانگریس یہ چاہتی ہے کہ مرکز میں کمزور حکومت قائم ہو کیونکہ مودی کے تحت مضبوط حکومت اس کے مستقبل کو خطرے میں ڈال سکتی ہے۔
کوئی تبصرے نہیں:
ایک تبصرہ شائع کریں