ترمیمات شامل کرنے پر فوڈ سیکوریٹی بل کی تائید - ڈی ایم کے

یوپی اے کے باوقار فوڈ سکیورٹی بل پر اپنا موقف واضح کرتے ہوئے ڈی ایم کے نے آج کہاکہ وہ صرف اس وقت اس بل کی تائید کرے گی اگر اس میں مختلف سیاسی پارٹیوں کی جانب سے طلب کردہ تمام اہم ترمیمات شامل کی جائیں اور وہ اس بل کی موجودہ شکل میں تائید نہیں کرے گی۔ اگر بل مختلف سیاسی پارٹیوں کی جانب سے طلب کردہ تمام اہم ترمیمات کے ساتھ لایا جائے تب ڈی ایم کے اس کی تائید کرے گی۔ اگر مرکز اس بل کو اس کی موجودہ شکل میں لانے پر اٹل رہے تب ڈی ایم کے اس کی مخالفت کرے گی۔ پارٹی صدر ایم کروناندھی نے آج یہاں ایک بیان میں یہ بات کہی۔ کل اس مسئلہ پر چیف منسٹر جیہ للیتا کے سوالات کا جواب دیتے ہوئے انہوں نے کہاکہ ان کی پارٹی کے پارلیمانی لیڈر ٹی آر بالو 7 اگست کو پارلیمنٹ میں ضروری ترمیمات پیش کرچکے ہیں۔ ان کے تبصرہ پر کہ ان کے سابقہ بیان میں کہیں بھی انہوں نے یہ نہیں کہا کہ ڈی ایم کے اس بل کی مخالفت کرے گی۔ انہوں نے استفسار کیا کہ اس بیان میں کہیں بھی یہ کہا گیا ہے کہ ڈی ایم کے ابل کی تائید کرے گی۔ انہوں نے یہ بھی نشاندہی کی کہ وزیراعظم کو چیف منسٹر کے مکتوب میں صرف یہ کہا گیا ہے کہ اس بل میں درکار ضروری ترمیمات کی جائیں اور اور کوئی اثر نہیں پڑے گا اگر آل انڈیا انا ڈی ایم کے اس بل کی مخالف کرے۔ یہ بتاتے ہوئے کہ اس مسئلہ پر ان کا موقف ہمیشہ واضح رہا ہے۔ انہوں نے کہا کہ ہم نے ہمیشہ کہا ہے کہ ہم اس بل کو اس وقت قبول نہیں کریں گے اگر بل اس کی موجودہ شکل میں لایاجائے۔