اپنی خاموشی توڑتے ہوئے وارٹن اسکول نے وارٹن انڈیا اکنامک فورم کی تنظیمی کمیٹی کی جانب سے چیف منسٹر گجرات نریندر مودی کا خطاب منسوخ کرنے کی تائید کی ہے لیکن پروگرام میں تبدیلی کے نتیجہ میں پیدا ہونے والی الجھن پر اظہار افسوس بھی کیا ہے ۔ وارٹن اسکول نے کل اپنے بیان میں کہاکہ آئندہ وارٹن انڈیا اکنامک فورم کے طلباء منتظمین نے اعلان کیا ہے کہ انہوں نے نریندر مودی کا مجوزہ کلیدی خطاب منسوخ کر دیا ہے ہم طلباء کی کوششوں کی ستائش کرتے ہیں جنہوں نے اس تقریب کے انتظامات کو پیش نظر رکھا اور پروگرام میں تبدیلی کی وجہہ سے پیدا ہونے والی الجھن پر اظہار معذرت کرتے ہیں ۔ مودی کو خطاب کی دعوت منسوخ کرنے پر احتجاجاً شیوسینا کے قائد اور پروگرام کے فینانسردونوں نے دستبرداری اختیار کر لی ہے لیکن ہندوستانی نژاد پروفیسر اور سابق طلباء اپنے مطالبہ پر اٹل رہے کہ جب نریندر مودی کو امریکہ کی وزارت خارجہ نے امریکہ کے دورہ کیلئے ویزا جاری کرنے سے انکار کر دیا ہے کیونکہ وہ 2002ء کے گجرات مسلم کش فسادات میں ملوث ہیں ۔ اسی لئے وارٹن انڈیا اکنامک فورم انہیں اپنی سالانہ کانفرنس کے افتتاحی اجلاس میں کلیدی خطبہ دینے کیلئے کیسے مدعو کر سکتا ہے ۔ چنانچہ وارٹن انڈیا نے مودی کی دعوت منسوخ کر دی اور مبینہ طورپر کجریوال کو مدعو کرنے کا فیصلہ کیا ہے ۔