محبوب نگر میں حالات کشیدہ

26/جنوری حیدرآباد ایس۔این۔بی

ضلع محبوب نگر مستقر میں ہنومان مورتی کو نامعلوم شر پسندوں کی جانب سے مبینہ طورپر نقصان پہنچائے جانے کی افواہ اور بی جے پی رکن اسمبلی کی قیادت میں سنگھ پریوار اور اس کی محاذی تنظیموں کی اشتعال انگیزی نے محبوب نگر کی پرامن صورتحال کو مکدر کر دیا۔ مورتی کو نقصان پہنچانے کی اطلاع کے ساتھ ہی بی جے پی رکن اسمبلی سرینواس ریڈی کی قیادت میں بی جے پی کارکنوں نے ٹاؤن پولیس اسٹیشن محبوب نگر چوراہا پر احتجاجی دھرنا منظم کیا اور اس واقعہ کیلئے مسلمانوں کو ذمہ دار قرار دیتے ہوئے ان کے خلاف اشتعال انگیز نعرے لگائے ۔ دوسری جانب بی جے پی کے اس الزام کے خلاف رامیا باؤلی یں مسلمانوں نے شدید احتجاج کیا۔ بی جے پی قائدین کے اس الزام کے خلاف مسلمانوں کے احتجاج اور بی جے پی کارکنوں کی اشتعال انگیزی نے دونوں فرقوں کے مابین کشیدگی پیدا کر دی۔ ذرائع نے بتایا کہ پولیس نے جہاں حالات کو مزید سنگین ہونے سے بچانے کی کوشش کی وہیں اقلیتی فرقہ کے ساتھ پولیس کی جانب سے امیتازی رویہ اختیار کیا گیا۔ دریں اثناء ضلع ایس پی نے متاثرہ علاقہ کا دورہ کرتے ہوئے حالات کا جائزہ لیا۔ اکثریتی اور اقلیتی طبقہ کے علاقوں میں پولیس کو چوکس کر دیا گیا ہے ۔

Clashes between two groups in Mahboob Nagar on Idol damage in hanuman temple