محراب اردو ڈائجسٹ - کتاب نمبر 1971 - تعارف رسالہ

سلامت علی مہدی - ہندوستان کے ایسے مقبول عام ادیب رہے ہیں جنہوں نے متعدد جاسوسی، پراسرار اور ہیبت ناک کہانیاں اور ناول تحریر کیے ہیں۔ ادارۂ "شمع" کے خواتین کے رسالے "بانو" میں ان کی سلسلہ وار پراسرار اور ہولناک کہانیاں بعنوان ایک بت ، ایک کھوپڑی ، ایک بلی اور ایک روح۔۔۔ بیسویں صدی کی پانچویں تا ساتویں دہائی میں اشاعت پذیر ہوئی تھیں۔ انہی میں سے ایک کہانی "ایک بت" تعمیرنیوز پر چوبیس قسطوں میں شائع کی جا چکی ہے۔
سلامت علی مہدی نے بطور مدیر اور ناشر چند رسالے بھی طبع کیے جو زیادہ عرصہ جاری نہ رہ سکے۔ انہی رسائل میں سے ایک رسالے "محراب" ڈائجسٹ کے ایک خاص نمبر "کتاب نمبر" (سن اشاعت: 1971ء) کا تعارف تعمیرنیوز کی جانب سے پیش خدمت ہے۔

مدیر رسالہ سلامت علی مہدی اداریہ میں لکھتے ہیں ۔۔۔

محراب کے اس کتاب نمبر کے صفحات میں اللہ کی بنائی ہوئی دنیا کی تاریخ موجود ہے، اس میں اس کے برگزیدہ بندوں کے لہو کی سرخی جھلک رہی ہے۔ اس میں ان شیطانوں کی کہانیاں ہیں جو انسان سمجھے جا رہے تھے۔ اور اس نمبر میں ایسی سچی داستانیں ہیں جو مردِ مومن کے دل کو گرما دیتی ہیں اور روح کو تڑپا دیتی ہیں۔۔۔
اس خاص نمبر میں بین الاقوامی ادب سے منتخب شدہ 16 اہم کتابوں کی بھرپور تلخیص شائع کی گئی ہے۔ ان میں محمد علی جناح، امام ابن تیمیہ، اخوان المسلمین، غازی عبدالکریم مراقشی، نپولین بوناپارٹ، الجیریا کی تحریکِ آزادی، خان عبدالغفار خاں، ٹیپو سلطان، ابن بطوطہ وغیرہ پر لکھی گئیں کتب شامل ہیں۔

اس کتاب کا تعارف، اشاعتی کوائف، فہرستِ مضامین اور دیگر معلومات علمی، ادبی اور تحقیقی استفادے کے لیے پیش کی جا رہی ہیں۔

***
نام رسالہ: محراب - کتاب نمبر 1971
مدیر: سلامت علی مہدی
تعداد صفحات: 260
Mehraab Kitab Number 1971