شاہد احمد دہلوی نمبر - رسالہ قومی زبان جولائی 1967 - پی۔ڈی۔ایف ڈاؤن لوڈ

تعارف رسالہ ٹی۔این۔بی

مشفق خواجہ (اصل نام: خواجہ عبدالحئی) (پ: 19/دسمبر 1935 ، لاہور - م: 21/فروری 2005 ، کراچی)
اردو کے اس نامور محقق، ادیب اور شاعر کی آج 15 ویں برسی ہے۔ ان کے والد خواجہ عبدالوحید علامہ اقبال کے ہم جلیس اور کئی علمی کتب کے مصنف تھے، جبکہ ان کے چچا خواجہ عبدالمجید اردو کی معروف لغت 'جامع اللغات' کے مولف تھے۔ 1980ء کی دہائی میں مشفق خواجہ نے 'خامہ بگوش' کے قلمی نام سے ادبی کالم نگاری کا آغاز کیا جس نے پورے برصغیر میں دھوم مچا دی۔ مشفق خواجہ کی تصانیف اور تالیفات میں خوش معرکہ زیبا، پرانے شاعر نیا کلام، اقبال از احمد دین، غالب اور صفیر بلگرامی، جائزہ مخطوطات اردو، تحقیق نامہ اور کلیات یگانہ کے نام سرفہرست ہیں۔ ان کا شعری مجموعہ "ابیات" کے نام سے اشاعت پذیر ہوا تھا۔ اس کے علاوہ ان کے ادبی کالموں اور مکاتیب کے کئی مجموعے بھی شائع ہو چکے ہیں۔ انجمن ترقی اردو پاکستان سے 1957ء تا 1973ء تک کی وابستگی نے مشفق خواجہ کی شخصیت کو جلا بخشی اور انہوں نے تن تنہا کئی اہم تحقیقی کارنامے انجام دیئے۔ اسی انجمن کے رسالے "قومی زبان" کا شمارہ جولائی:1967 معروف ادیب شاہد احمد دہلوی کی یاد میں بطور خاص نمبر مشفق خواجہ کی زیر ادارت شائع ہوا تھا۔
تعمیرنیوز کی جانب سے "شاہد احمد دہلوی نمبر" کے متذکرہ شمارے کی پی۔ڈی۔ایف فائل پیش خدمت ہے۔ 110 صفحات کی اس پی۔ڈی۔ایف فائل کا حجم تقریباً 4.5 میگابائٹس ہے۔
رسالہ کا ڈاؤن لوڈ لنک نیچے درج ہے۔

محمد ایوب قادری نے اپنے مضمون "شاہد صاحب" میں شاہد احمد دہلوی سے متعلق اپنی یادداشتیں جمع کی ہیں، جن میں سے ایک دلچسپ اقتباس یہ ہے ۔۔۔

شاہد صاحب پرانی تہذیب اور نئی تہذیب کی درمیانی کڑی تھے۔ مگر مشرقیت ان کے مزاج میں رسی بسی تھی، وہ جاگیردارانہ اور سرمایہ دارانہ دم توڑتے ہوئے مسلم معاشرے کی یادگار تھے۔ جہاں ان میں مروت، اخلاص۔ ملنساری بدرجہ اتم تھی وہیں بعض منفی پہلو بھی تھے۔ "خطائے بزرگاں گرفتن خطا است" کے وہ سختی سے قائل تھے، خاندان اور بزرگوں کا بھرم قائم رہے، ان روایات کو آنچ نہ آئے۔
ہوا یہ کہ جوش ملیح آبادی صاحب نے ان کے دادا جان مرحوم ڈپٹی نذیر احمد دہلوی کی کتاب "منتخب الحکایات" کی زبان و بیان کو زمانہ حال کے مطابق کر دیا یا شاہد صاحب کے الفاظ میں اس کتاب کی غلطیاں نکالیں۔ یہ بات شاہد صاحب کو سخت ناگوار ہوئی، بلکہ ان کے دل میں جوش صاحب کی طرف سے گرہ پڑ گئی۔ اور جب صہبا لکھنوی نے رسالہ "افکار" کا "جوش نمبر" نکالا تو شاہد صاحب نے بھی مدیر افکار کی درخواست پر ایک دلچسپ مضمون سپرد قلم کر دیا جس میں دیدہ کم اور شنیدہ زیادہ تھا اور زبان کے تو کہنے ہی کیا۔ بقول شخصے چومکھی لڑی تھی اور جوش صاحب کے سلسلے میں کوئی کون کسر باقی نہیں رکھی تھی۔
یہ مضمون افکار کے جوش نمبر میں شائع ہوا۔ پھر کیا تھا، جوش صاحب کو بھی یار لوگوں نے بھرے پر چڑھایا ، انہوں نے بھی ایک "جواب نامہ" رقم فرمایا جس میں جوش صاحب نے اپنی صفائی پیش کی اور اشارے کنائے میں دو چار باتیں ایسی بھی کہہ گئے جو شاہد صاحب کے خون کھولانے کا سبب بنیں اور انہوں نے اس کے انتقام میں رسالہ "ساقی" کا "جوش نمبر" نکالا۔ اس کے لیے انہوں نے دہلی کا سفر اختیار کیا، پاکستان و ہند کے علمی و ادبی حلقوں سے ربط قائم کر کے ہر وہ اخبار، رسالہ، مضمون، کاغذ اور پرزہ حاصل کیا جس میں جوش صاحب کے خلاف کچھ لکھا گیا تھا اور اس طرح شاہد صاحب نے اپنے دل کی بھڑاس نکالی۔
ہمارے نقطۂ نظر سے اس کا ایک روشن پہلو یہ بھی ہے کہ "جوشیات" کے سلسلے کا جو منفی ادب تھا، وہ شاہد صاحب کی کوششوں سے سب یکجا ہو گیا اور آنے والی نسلوں کے لیے ایک اچھی خاصی دستاویر مہیا ہو گئی۔ اس میں ان کے مشرقی رکھ رکھاؤ، خاندانی وقار اور ٹھسے کا سوال تھا، جس کا شاہد صاحب نے بھرم رکھا۔
حالانکہ کراچی اور لاہور کے اکثر ادیبوں اور دانشوروں نے پوری پوری کوشش کی کہ ساقی کا "جوش نمبر" نہ نکلے مگر شاہد صاحب کے عزم و ارادہ یا انتقامی جذبے کے سامنے کسی کی پیش نہ گئی چاہے وہ پیر حسام الدین راشدی ہوں یا جمیل جالبی۔ اس نمبر کے سلسلے میں میں نے بھی بعض چیزوں کی نشاندہی کی اور ایک دو چیزیں فراہم کر کے بھی دیں۔

یہ بھی پڑھیے:
خامہ بگوش کے شگفتہ ادبی کالم (تعمیرنیوز پر)

***
نام رسالہ: شاہد احمد دہلوی نمبر، جریدہ قومی زبان (کراچی) - جولائی 1967
مدیران : مشفق خواجہ، جمیل الدین عالی
تعداد صفحات: 110
پی۔ڈی۔ایف فائل حجم: تقریباً 4.5 میگابائٹس
ڈاؤن لوڈ تفصیلات کا صفحہ: (بشکریہ: archive.org)
Shahid Ahmed Dehlvi Number_Qaomi Zaban_Jul-1967.pdf

Archive.org Download link:

GoogleDrive Download link:

شاہد احمد دہلوی نمبر، جریدہ قومی زبان (کراچی) :: فہرست
نمبر شمار	تخلیق	تخلیق کار	صفحہ نمبر
ب	اثر لکھنوی	ادارہ	5
شاہد احمد دہلوی کی یاد میں
1	نگاہ اولیں	شاہد احمد دہلوی	6
2	خود نوشت	شاہد احمد دہلوی	7
3	بیاد شاہد	احمد ندیم قاسمی	12
4	ادیب اور ادیب گر	جمیل الدین عالی	13
5	اس کے مرنے سے مر گئی دلی	انتظار حسین	18
6	شاہد صاحب	محمد ایوب قادری	21
7	چند یادیں	مشتاق احمد	29
8	مدتوں روئے گی شاہد کو زبانِ اردو	نصر اللہ خاں	33
9	داغ فراق	سید یوسف بخاری	36
.
10	عبالرحیم خاں	محمد معین الدین دردائی	37
11	1967 کی مطبوعات	اکرام احمد	44
12	میر علی اوسط رشک	ڈاکٹر انصار اللہ نظر	45
13	افادات اکبر	ادارہ	59
14	اشاریہ اختر شہنشاہی	عابد رضا بیدار	67
15	اردو ادب کے غیر ادبی مآخذ (اویماق مغل)	تحسین سروری	77
16	سحر عشق آبادی	ویریندر پرشاد سکسینہ بدایونی	91
17	نئی کتابیں	ادارہ	95
18	نئے خزانے	ابوسلمان شاہجہانپوری	97

Shahid Ahmed Dehlvi Number, Qaomi Zaban magazine, July-1967, pdf download.