سوشل میڈیا پر ملیالم اداکارہ کی تصویر وائرل

12/فروری ممبئی ایجنسیاں

سوشل میڈیا پر اس وقت ایک حسین دوشیزہ کی تصاویر اور ویڈیو کلپس وائرل ہو رہی ہیں۔ کہا جا رہا ہے کہ دوشیزہ کی آنکھوں میں عشق کا نشہ جھلک رہا ہے۔ اس کی ادائیں اس قدر پسند کی جا رہی ہیں کہ انسٹاگرام پر کچھ ہی گھنٹوں میں اس دوشیزہ کے چار لاکھ سے زیادہ کے فالوورز بن چکے ہیں۔ علاوہ ازیں ٹوئٹر پر بھی اس کا نام ٹاپ ٹرینڈ میں آ گیا ہے۔ صارفین کی جوش و جذبہ دوشیزہ کی تصاویر کی مقبولیت کو ظاہر کر رہا ہے۔
یہ دوشیزہ کوئی گمنام اسکول طالبہ نہیں بلکہ نوجوان ملیالم اداکارہ پریہ پرکاش وارئر (Priya Prakash Varrier) ہے۔ 18 سالہ پریہ کیرالہ کے شہر تھریسور (Thrissur) کی متوطن ہیں۔ وہ ان دنوں تھریسور کے وملا کالج سے بی۔کام کر رہی ہیں۔ ان کی سب سے پہلی فلم اورو آدار لو (Oru Adaar Love) کے نغمے "مانکیا مالاریا" کی ایک ویڈیو کلپ سوشل میڈیا پر مقبولیت کے معراج طے کر رہی ہے۔ یہ گانا اسکول کے نوعمر طلبا کے درمیان فلمایا گیا ہے، جس کی موسیقی شان رحمان اور گلوکاری ونیت سرینواسن کی ہے۔ فلم کی ہدایت عمر لولو نے دی ہے۔ یوٹیوب پر یہ نغمہ اب تک تقریباً 4 لاکھ مرتبہ دیکھا جا چکا ہے۔

Priya Prakash Varrier Video Clip Viral In Valentine Week