161 سال پہلے ممبئی سے تھانے کے درمیان ملک کی پہلی ریل گاڑی کا ٹرائل رن

18/نومبر ممبئی ایجنسیاں

زیادہ تر لوگ یہ جانتے ہیں کہ 16/ اپریل 1853 میں ممبئی تھانے کے درمیان ملک کی پہلی ریل سروس کی شروعات ہوئی تھی لیکن یہ معلومات بہت ہی کم لوگوں کو ہوگی کہ آج سے ٹھیک 161 سال پہلے 18/ نومبر 1852کو ممبئی سے تھانے کے درمیان ملک کی پہلی ریل گاڑی کو ٹرائل رن بھی ہوا تھا۔ یہ پہلی بار تھا جب لوہے کی پٹری پر کوئی ٹرین ہمارے ملک میں دوڑی تھی۔ اس دوران ممبئی کے لوگ لوہے کی پٹریوں پر ڈبہ نما لوہے کے کوچ اور اسے کھینچنے والے بھاپ کے انجن کو دیکھ حیرت میں پڑگئے تھے۔ ممبئی سے تھانے تک چلنے والی یہ پہلی ٹرین ملک کے لوگوں کو انگریزوں کی طرف سے دی گئی ایک بڑی سوغات تھی۔
ملک کی پہلی ٹرین کے لیے پہلا ریل پل بھی 1852 میں بنا یا گیا تھا۔ 16/اپریل کے دن ہندوستان میں پہلی مسافر ٹرین ممبئی سے تھانے کے درمیان 34 کلومیٹر کا سفر مکمل کرنے کے دوران اس پل سے گزری تھی۔ اسی لیے یہ پل ہندوستانی ریل کی تاریخ کی وراثت بن گیا ہے۔ ریل کو ہندوستان میں لانے کا کام سال 1850 میں شروع ہوا اور تقریبا دوسال کے بعد1852میں پہلے ریل کا انجن تیار کر پٹریوں پر دوڑایا گیا۔ جب اس کا تجربہ کامیاب رہا اور تمام معیار کی جانچ کے بعد پہلی ٹرین کی شروعات 16/اپریل 1853میں بمبئی کے بوری بندر سے تھانے کے درمیان ہوئی۔
اس دوران ٹرین نے 34 کلو میٹر کا سفر طے کیا تھا۔ ٹرین کو بوری بندر سے دوپہر 3:30 بجے تھانے کے لیے روانہ کیا گیا تھا۔ دلچسپ بات یہ ہے کہ جیسے ہی ٹرین پلیٹ فارم سے باہر نکلی تو اسے 21 توپوں کی سلامی دی گئی۔ اس ٹرین کو چلانے کا کریڈیٹ انڈین پننسلا ریلوے ( جی ای پی ریلوے) کو جاتا ہے، جس کا آزادی کے بعد نام تبدیل کرکے سینٹرل ریلوے کردیا گیا۔

India's first train trial run turns 161 today