ملک کی 29 ویں ریاست تلنگانہ کی تشکیل - مزید 6 ماہ درکار

3/اکتوبر نئی دہلی پی۔ٹی۔آئی

اس بات کاامکان ہے کہ تلنگانہ کی مجوزہ نئی ریاست کی تشکیل حقیقی شکل اختیارکرنے کیلئے کم ازکم چھ ماہ لگیں گے کیوں کہ اس اقدام کیلئے کئی اقدامات کی ضرورت ہے جن میں پارلیمنٹ میں سادہ اکثریت سے ریاست کی تنظیم جدید سے متعلق بل کی منظوری بھی شامل ہے۔تشکیل تلنگانہ اور طریقہ کار کا طئے کرنے کیلئے وزارتی گروپ کی تشکیل کو مرکزی کا بینہ کی منظوری کے بعد توقع ہے کہ آنے والے ہفتوں میں کئی اقدامات کئے جائیں گے جن میں مرکزی ریاستی حکومتوں کی سطح پراقدامات شامل ہوں گے ۔اس وزارتی گروپ میں مختلف وزارتوں کے انچارج وزراء شامل ہوں گے۔وزارت فینانس مالیاتی انصرام جیسے مسائل کو خوش اسلوبی سے انجام دینے کیلئے ماہرین کی ایک کمیٹی مقرر کرے گی۔منصوبہ بندی کمیشن میں ریاست کی تنظیم جدید سے متعلق معاشی مسائل سے نمٹنے کیلئے ایک یونٹ قائم کی جائے گی جواس بات کو یقینی بنائے گی کہ بہترمالیتی انصرام عمل میں آئے۔ مرکزی وزارت داخلہ ،مرکزی کابینہ میں پیشکشی کیلئے ایک اور نوٹ تیارکرے گی۔کابینہ کے دوسرے اجلاس کے بعد وزیراعظم صدر جمہوریہ سے سفارش کریں گے مسودہ بل کووستور کے آرٹیکل3کے تحت ریاستی مقننہ سے خیالات معلوم کرنے کیلئے بھیجاجائے ۔اس کے بعد آندھراپردیش قانون سازاسمبلی اور کونسل اس بل پر غور کریں گے اور اندرون 30 دن اپنے خیالات پیش کریں گے۔ریاستی مقننہ کی سفارشات کو مسودہ میں شامل کیاجائے گا اور وزرات قانون اس معاملہ کا جائز ہ لے گی۔اس مسودہ کے بعدایک تیسرانوٹ تیارکیاجائے گااور پارلیمنٹ میں پیشکشی کیلئے منظوری کی خاطر مرکزی کابینہ کو روانہ کیاجائے گا اس کے بعد لوک سبھا اور راجیہ سبھامیں تنظیم جدید بل کی پیشکشی کیلئے ایک نوٹس دی جائے گی ۔پارلیمنٹ کے دونوں ایوانوں میں پیشکشی کے بعدبل کو سادہ اکثریت سے منظور کیا جائے گا۔

Telangana state is still 6 months away