چین میں نیوزی لینڈ کی دودھ مصنوعات پر پابندی

ممکنہ طور پر انسانی صحت کے لیے انتہائی خطرناک بیکٹیریا کی موجودگی پر نیوزی لینڈ سے خشک دودھ کی درآمد پر چین اور روس نے پابندی عائد کر دی ہےتین ماہ پہلے کی ان برآمدات میں نقص کے تعلق سے کمپنی کو یہ بات معلوم ہوئی کہ چھوٹے بچوں کے دودھ اور کھیلوں کے مشروبات کے فارمولے میں جو وھے نامی پروٹین [whey protein] استعمال ہوتی ہے وہ بوٹلزم [botulism] کا باعث بن سکتی ہے۔ نیوزی لینڈ کے وزیراعظم نے متعلقہ کمپنی کی طرف سے کسی بھی ردعمل میں اس تاخیر کو حیرت انگیز قرار دیا ہے۔ دوسری طرف کمپنی کا یہ بھی کہنا ہے کہ پروٹین کی یہ کھیپ مئی 2012 میں تیاری کے بعد دنیا بھر میں موجود صارفین کو ارسال کی گئی تھی تاہم اس حوالے سے ابھی تک کوئی شکایت موصول نہیں ہوئی۔ یہ کھیپ آسٹریلیا ، چین ، ملائشیا ، ویت نام ، تھائی لینڈ اور سعودی عرب میں بھیجی گئی تھی۔ کمپنی کی جانب سے مزید کہا گیا تھا کہ اس کھیپ کے تین بیج ایسے تھے جن میں یہ زہریلا بیکٹیریا کلوسٹریڈم بوٹولینم [Clostridium botulinum] موجود تھا۔ یہ بیکٹیریا بولٹزم کا باعث بن سکتا ہے۔ جس کی ابتدائی علامات میں متلی ، قئے ، اسہال اور فالج شامل ہیں اور علاج میں تاخیر جان لیوا بھی ثابت ہو سکتی ہے۔ چین اور روس نے بہرحال نیوزی لینڈ کی ڈیری مصنوعات کی درآمد پر فوری طور پر پابندی عائد کر دی ہے۔ یہ اطلاع نیوزی لینڈ کے سرکاری حکام نے دی ہے۔