مڈ ڈے میل - مرکز اجتماعی ذمہ داری کا خواہاں

20/جولائی نئی دہلی پی۔ٹی۔آئی

بہارکے ایک سرکاری اسکول میں پیش آئے مڈ ڈے میل المیہ پر مرکز اور حکومت بہار کے درمیان ایک دوسرے کو مورد الزام ٹھہرانے کی کوششوں کے دوران مرکزی وزیر فروغ انسانی وسائل ایم ایم پلم راجو نے کہاکہ اب وقت آگیا ہے کہ بیدار ہوتے ہوئے اجتماعی ذمہ داری قبول کی جائے۔ انہوں نے کہا کہ مرکزی حکومت چاہتی ہے کہ اس اسکیم پر موثر عمل آوری کی جائے۔ اس مقصد کیلئے ایک جائزہ کیمیٹی تشکیل دی گئی ہے جو پروگرام کے معیار کا جائزہ لے گی۔ مسٹر پلم راجو نے اخباری نمائندوں سے بات چیت کرتے ہوئے کہاکہ ملک کے تمام سرکاری اسکولوں میں مڈ ڈے میل اسکیم پر موثر عمل آوری کیلئے میکانزم کو مستحکم بنایا جارہا ہے۔ انہوں نے کہاکہ بہار المیہ کے بارے میں انہیں سارن اسکول انتظامیہ کی رپورٹ موصول ہوئی ہے جس میں غذا کا ذخیرہ کرنے کے طریقہ کار میں خامیوں کی نشاندہی کی گئی ہے اور بتایا گیا ہے کہ اس ایک عنصر سے کس طرح یہ بدبختانہ واقعہ پیش آیا۔ احتیاطی تدابیر کیلئے وزارت کی طرف سے کسی انتباہی نوٹ کی وصولی کے بارے میں حکومت بہارکی تردید کے متعلق مسٹر پلم راجو نے کہاکہ "میں جانتا ہوں کہ ایک نگران میکانزم کمیٹی ہے جس کا کام خامیوں اور نقائص کا پتہ چلانا ہے۔ اس کمیٹی نے خاص طورپر 12اضلاع کی نشاندہی کی تھی" تاہم انہوں نے فوراً یہ وضاحت بھی کردی کہ اب یہ سوال نہیں رہا کہ کس نے کیا کیا ہے"۔

Mid-day meal: Centre says need for collective responsibility