امریکی اپارٹمنٹ میں بندوق بردار کی اندھا دھند فائرنگ - 6 افراد ہلاک

جنوبی فلوریڈا کے اپارٹمنٹس پر مشتمل عمارت میں مقیم ایک شخص نے اپنے مکان کو نذر آتش کرنے کے بعد پوری عمارت میں فائرنگ کرتے ہوئے چکر لگائے جس کی وجہ سے کم از کم 6 افراد ہلاک ہو گئے۔ بعد ازاں پولیس نے اس شخص کو گولی مار کر ہلاک کر دیا۔
عمارت کے مکینوں نے بتایا کہ اس دوران وہ سب اپنے مکانات میں بند ہو گئے تھے اور ٹیلی فون پر پولیس کو اطلاع دے دی گئی تھی۔ جس کے بعد انہوں نے بندوق بردار اور پولیس کے درمیان بات چیت اور فائرنگ کے تبادلے کی آوازیں سنیں۔ سرکاری عہدیداروں اور عینی شاہدین کے بیان کے بموجب ہفتہ کی رات دیر گئے 42 سالہ پیڈرا وارڈاس نے بندوق کی نال پر دو افراد کو یرغمال بنا لیا تھا اور انہیں ان کے اپارٹمنٹ میں تین گھنٹوں تک حبس بےجا میں رکھا جبکہ اعلیٰ سطحی پولیس ٹیم عمارت میں داخل ہوئی اور اسے گولی مار کر ہلاک کر دیا۔ یرغمالیوں کو کوئی نقصان نہیں پہنچا۔ ہیالیش کی پانچ منزلہ عمارت کے اپارٹمنٹس میں ملازم پیشہ افراد کی اکثریت ہے اور یہ عمارت میامی کے شمال مغربی مضافات سے شہر سے چند میل کے فاصلے پر واقع ہے۔