بیجنگ انٹرنیشنل ائرپورٹ پر معذور شخص کا دھماکہ

چین میں ایک معذور شخص نے مبینہ طورپر پولیس ظلم پر برہمی کا اظہار کرتے ہوئے آج بیجنگ انٹرنیشنل ایرپورٹ پر دھماکہ کیا جس کے نتیجہ میں وہ خود زخمی ہوگیا اور یہاں سنسنی پھیل گئی۔ 34سالہ جی زہونگ مبینہ طورپر پولیس کی زدوکوب سے معذور ہوگیا تھا۔ اس نے پٹاخوں میں استعمال ہونے والے اجزاء سے دھماکو آلہ تیار کیا۔ اس نے اپنی شکایات پر مبنی ورقیہ حوالے کرنے کی کوشش کی لیکن اسے روک دیا گیا جس پر اس نے بم دھماکہ کردیا۔ سرکاری ٹی وی پر کہا گیا کہ دھماکے فوری بعد تشددسے متاثرہ صوبہ ژنجیانگ سے تعلق رکھنے والے ایغور مسلمانوں کو ایرپورٹ پر سفر سے روک دیا گیا۔ چین میں گذشتہ چند سال سے یہ صوبہ فسادات کا گڑھ بنا ہوا ہے اور ایغور مسلمانوں کو نشانہ بنایا جاراہ ہے۔ چین کی پولیس نے حال ہی میں دعویٰ کیا تھا کہ علیحدہ پسند مشرقی ترکستان اسلامک موومنٹ نے اغواء کی کوشش کی جسے ناکام بنادیا گیا۔ یہ تنظیم حالیہ عرصہ کے دوران صوبہ میں سرگرم ہے۔