ریل اور عام بجٹ منظور

نئی دہلی۔(یو این آئی) لوک سبھا میں آج 2013-14 کا مالیاتی بل بحث کے بغیر منظور کرلیا گیا کیونکہ اس وقت پوری اپوزیشن نے ایوان کا بائیکاٹ کیا۔ حکومت نے متعدد ترمیمات کے ساتھ بل پیش کیا۔ اس میں ایک ترمیم شق 51 میں تھی جس کے تحت زرعی زمین کو دولت ٹیکس سے مستثنیٰ کردیاگیا۔ بل پیش کرتے ہوئے وزیر خزانہ پی چدمبرم نے یہ بات واضح کردی کہ حکومت کی نیت زرعی زمین پر دولت ٹیکس نافذ کرنے کی کبھی نہیں تھی اور بعض حلقوں میں اس طرح کے اندیشوں کو رفع کرنے کیلئے وہ اس شق میں ترمیم پیش کررہے ہیں۔ مسٹر چدمبرم نے کہاکہ یہ قانون 1993ء میں بنا تھا اور تب سے ایسا ہی ہے کیونکہ اس کا تعلق میونسپل علاقہ کی زمین سے نہیں ہے جس پر قانون کے تحت تعمیرکی اجازت نہیں۔ یہ ترمیم محض اس لئے لائی گئی ہے کہ اگر اس سوال پر کسی کو شبہ ہوتو وہ بھی رفع ہوجائے۔ اس سوال پرشرومنی اکالی دل اور پنجاب سے منتخب حکمران کانگریس کے ممبروں کے درمیان نوک جھونک ہوئی۔