BJP to boycott Sushilkumar Shinde's public program
بی جے پی نے آج فیصلہ کیا کہ مرکزی وزیر داخلہ سشیل کمار شنڈے کے تمام عوامی پروگراموں کا بائیکاٹ کیا جائے گا اور بی جے پی کے اعلیٰ قائدین کے نام بحیثیت قائد لوک سبھا کے کسی بھی مواصلات کا جواب نہیں دیا جائے گا یہاں تک کہ وہ ہندوتوا دہشت گردی کے بارے میں تبصرہ پر معذرت خواہی نہ کریں ۔ بی جے پی کے کور گروپ اجلاس میں یہ فیصلہ کیا گیا جس کی صدارت بحیثیت صدر راجناتھ سنگھ نے اپنے انتخاب کے بعد پہلی بار کی۔ بی جے پی کے جنرل سکریٹری اننت کمار نے اجلاس کے بعد پریس کانفرنس سے خطاب کرتے ہوئے پارٹی کے فیصلے کا انکشاف کیا اور کہاکہ بی جے پی آئندہ بجٹ اجلاس کے دوران اہم مسائل پر تبادلہ خیال کیلئے شنڈے کے مکتوبات کا کوئی جواب نہیں دے گی۔ تاہم راجناتھ سنگھ نے کہاکہ پارٹی کا ارادہ پارلیمنٹ میں شنڈے کا بائیکاٹ کرنے کا نہیں ہے اور نہ وہ پارلیمنٹ کی کار روائی میں خلل اندازی کرے گی جب شنڈے اجلاس سے خطاب کرتے ہوں گے تو ایسے وقت بھی بی جے پی کی جانب سے کوئی خلل اندازی نہیں کی جائے گی۔ مبینہ طورپر پارٹی کے چند ارکان اس مسئلہ پر پارلیمانی کار روائی میں خلل اندازی کے مخالف ہیں ۔ چنانچہ پارٹی نے اپنے موقف میں نرمی پیدا کر دی ہے ۔ بصورت دیگر پارٹی میں پھوٹ پڑجانے کا اندیشہ تھا۔
کوئی تبصرے نہیں:
ایک تبصرہ شائع کریں