افغانستان میں ہندوستان اور پاکستان اہم حلیف - امریکہ

واشنگٹن
(پی ٹی آئی )
امریکہ نے اعتراف کیا کہ جنگ زدہ ملک افغانستان میں امن واستحکام کے حوالہ سے ہندوستان اور پاکستان اس کے اہم حلیف ہیں ۔ اسٹیٹ دپارٹمنٹ نائب ترجمان میری ہارف نے کہا کہ افغان زیر قیادت مفاہمت میں پیشترفت سے متعلق پاکستانی مساعی کا ہمیں احساس ہے ۔ افغانستان کو محفوظ اور مستحکم بنانے ہماری کوششوں میں پاکستان ہمارا اہم شراکت دار ہے ۔ محفوط ،پر امن اور مستحکم افغانستان خطہ کی سلامتی وتحفظ کے لیے ضروری ہے ۔ بے شک ہمیں اس سلسلہ میں ہندوستانی مساعی کا بھی اعتراف ہے کہ ہندوستان بھی ایسی کوششوں میں ہمارا ساتھ دینے میں کسی سے پیچھے نہیں ۔ انہوں نے مزید کہا کہ امریکہ دونوں جنوب ایشیائی پڑوسیوں کے ساتھ افغانستان میں امن مساعی جاری رکھے گا ۔ خصوصی طور پر 2014کے اختتام تک اس پالیسی پر عمل آوری جاری رہے گی ۔ پاکستان کی سیکیورٹی صورتحال اور دہشت گردی کے خطرات سے متعلق ایک سوال کا جواب دیتے ہوئے خاتون نائب ترجمان نے بتایا کہ امریکی حکومت کے علاو ہ حکومت پاکستان بھی اس سے متعلق تشویش کا شکار ہے ۔
حقیقی معنوں میں دہشت گردی سے پاکستانی عوام سے زیادہ کوئی اور متاثر نہیں ۔ انسداد دہشت گردی اقدامات پر حکومت پاکستان کے ساتھ تبادلہ خیال ہوتا رہتا ہے ۔ خطرات سے نبردآزمائی کی صلاحیتوں میں فروغ پر بھی توجہ مرکوز رہتی ہے ۔
India and Pakistan important allies in Afghanistan: US