ارریا میں تبلیغی اجتماع - لالو پرساد یادو کی آمد

14/اپریل ارریا ایس۔این۔بی

تبلیغی اجتماع گاہ میں سابق وزیر ریل اور آر جے ڈی سپریمو لالو پرساد یاد پہنچے اور لوگوں سے ملاقات کی۔ اس کے بعد مشورہ گاہ جا کردہلی سے آئے امام اور علماء ا کرام سے ملاقات کر کے صورتحال کی جانکاری حاصل کی۔ مشورہ گاہ میں کسی بھی میڈیا اہلکار کو جانے کی اجازت نہیں تھی اور فوٹو کھینچنے پر پر بھی پوری طرح پابندی تھی۔ جیسے ہی لالو یادو مشورہ گاہ میں پہنچے لوگوں کی بھیڑامڈ پڑی۔ سبھی لوگ لالو یادو کو دیکھنے کے لئے بے قرار رہے ۔ دور سے ہی میڈیا اہلکاروں کو بتایا کہ اجتماع گاہ میں دعا کیلئے حاضر ہوا ہوں ۔ ہمارا مقصد آپسی بھائی چارہ برقرار رکھنے کا ہے ۔ حالانکہ بہت سارے سوالوں کا جواب انہوں نے صرف ایک لائن میں دیا کہ تبلیغی اجتماع صرف ہندوستان کے لوگوں کیلئے نہیں بلکہ پوری دنیا کیلئے ایک اچھی چیز ہے اور اس خاموشی اور سنجیدہ دعوت سے زندگیاں بدل رہی ہیں ۔ اجتماع میں اچھی باتیں کہی جاتی ہیں اور برے کاموں سے روکا جاتا ہے ۔ واضح رہے کہ لالو پرساد سابق وزیر محمد عظیم الدین کے انتقال کے بعد ان کی رہائش گاہ پر بھی پہنچنے اور ان کے ورثاء کو تسلی دی۔

تبلیغی اجتماع کے موقع پر کٹہیار میڈیکل کالج اور ماتا گجری میموریل میڈیکل کالج کی میڈیکل ٹیم عقیدت مندوں کی خدمت میں مصروف ہے ۔ حالانکہ محکمہ صحت کی جانب سے بھی میڈیکل کیمپ لگائے گئے ہیں ۔ جبکہ غیر سرکاری تنظیموں کی جانب سے بھی اس سلسلے میں خدمات پیش کی جا رہی ہے ۔ پرائیوٹ ڈاکٹروں میں ڈاکٹر نئیر حبیب، ڈاکٹر شیوکمار، ڈاکٹر حیدر اپنی خدمات انجام دے رہے ہیں ۔ کٹہیار میڈیکل کالج اور ایم جے ایم میڈیکل کالج سے آئے تمام ڈاکٹر دن رات مریضوں کی خدمات میں تعینات ہیں ۔ ان میڈیکل کیمپوں میں کافی بھیڑدیکھی گئی۔ ان کیمپوں میں تمام ضروری دواؤں کے ساتھ ساتھ سلائن اور آکسیجن کا خاص نظم رکھا گیا ہے اور یہاں مفت دوائیاں دی جا رہی ہیں ۔ اطلاع کے مطابق 24گھنٹے کی ڈیوٹی کیلئے 15ڈاکٹر اور پارا میڈیکل ڈاکٹروں کو تعینات کیا گیا ہے ۔ کٹہیار میڈیکل کالج کے چیرمین احمد اشفاق کریم اور ایم جی ایم میڈیکل کالج کے ڈائرکٹر ڈاکٹر دلیپ کمار جیسوال نے بتایاکہ یہ صرف اﷲ کی خوشنودی حاصل کرنے کیلئے ہے ۔ اس نیک کام کو انجام دینے میں روحانی خوشی ملی ہے اور ہماری کوشش ہے کہ یہ میڈیکل کیمپ عقیدت مندوں کی پریشانی کو دور کرنے میں کامیاب ہو۔

--