مشرف کی 4 حلقوں سے نامزدگی مسترد - انتخابی دوڑ سے باہر

16/اپریل اسلام آباد پی۔ٹی۔آئی

پرویز مشرف کے سیاسی عزائم پر ضرب لگاتے ہوئے پاکستانی الیکشن ٹریبونل نے سابق فوجی حکمران کو اس واحد پارلیمانی حلقہ سے بھی مقابلہ کرنے سے روک دیا جہاں سے ان کی پرچہ نامزدگی کو قبول کرلیا گیا تھا۔ اس طرح مشرف انتخابی دوڑ سے باہر ہوگئے ہیں۔ قبل ازیں سابق صدر کے پرچہ جات نامزدگی کو حلقہ چترال سے قبول کرلیا گیا تھا لیکن الیکشن ٹریبونل نے اس نشست سے بھی ان کی امیدواری کو مسترد کردیا ہے۔ قبل ازیں آج دن میں دیگر 2 الیکشن ٹریبونلس نے مشرف کو صوبہ پنجاب کے اسلام آباد اور قصور حلقوں سے مقابلہ کرنے سے نا اہل قرار دیا جبکہ ایک دن قبل کراچی سے ان کے پرچہ نامزدگی کے استرداد کے خلاف اپیل مسترد کردی گئی تھی اس طرح سابق فوجی حکمران کی پارلیمنٹ کی 4 حلقوں میں سے کسی بھی حلقہ سے امیدوار بننے کی خواہش پوری نہ ہوسکی۔ ہائی کورٹ کے ججوں پر مشتمل ٹریبونلس نے اسلام آباد اور قصور میں قومی اسمبلی کی 2 نشستوں کیلئے مشرف کے پرچہ جات نامزدگی مسترد کرنے کے فیصلوں کو برقرا ررکھا ہے۔ ایک دن قبل ایک اور الیکشن ٹریبونل نے جنوبی بندرگاہی شہر کے پارلیمانی حلقہ سے مشرف کے پرچہ جات نامزدگی کو مسترد کرنے کے خلاف ان کی اپیل خارج کردی تھی۔

Pervez Musharraf out of Pakistan election race