ہندوستانی فوجیوں کی ہلاکت میں پاکستان ملوث نہیں

9/جنوری اسلام آباد پی۔ٹی۔آئی

پاکستانی فوج نے آج ہندوستان کے اس استدلال کو مسترد کردیا کہ پاکستانی دستوں نے ہندوستانی گشتی دستوں پر حملہ کیا اور دو سپاہیوں کو ہلاک کردیا۔ فوج نے دعویٰ کیاکہ اس نے بنیادی سطح پر دعویٰ کی تحقیق کی اور اسے واقعہ کے بارے میں کوئی پتہ نہیں چلا۔ ہندوستانی فوجیوں کی ہلاکت کے بعد پاکستانی فوج کے ڈائرکٹر جنرل ملٹری آپریشنز نے اپنے ہندوستانی ہم منصب سے ٹیلی فون پر گفتگو کرتے ہوئے اس کی تردید کی ہے کہ یہ کارروائی پاکستانی فوجیوں نے کی ہے۔ پاکستانی فوجی عہدیدار جو اپنا نام ظاہر کرنا نہیں چاہتے کہا کہ پاکستان کے ڈی جی ایم اومیجر جنرل اشفاق ندیم نے ہاٹ لائن پر اپنے ہندوستانی ہم منصب لفٹنٹ جنرل ونودبھاٹیہ سے بات چیت کی اور ہندوستانی فوج کے الزامات کو مسترد کردیا کہ پاکستانی دستوں کی جانب سے خط قبضہ کے اس پار سے فائرنگ کی گئی اور ہندوستانی سپاہی ہلاک ہوا اور کہاکہ یہ محض ہندوستانی فوج کا پروپگنڈہ ہے۔ اسی دوران پاکستان کی وزیر خارجہ حناربانی کھر نے کہا ہے کہ ہندوستانی فوجیوں کی ہلاکت میں پاکستان ملوث نہیں، ہندوستانی فوجیوں کی ہلاکت کا واقعہ ہندوستان میں ہوا، ہندوستان اس کی تحقیقات کرے۔ ہندوستانی ٹی وی کو دئیے گئے انٹرویو میں حنا ربانی نے کہاکہ پاکستان انتظامی کارروائی یقین نہیں رکھتا، ہمیں دشمنی کاماحول نہیں بنانا چاہئے۔ انہوں نے کہاکہ خط قبضہ واقعہ میں پاکستان کا کوئی ہاتھ نہیں، پاکستان نے اپنی تحقیقات مکمل کرلی ہیں ہم تیسرے فریق سے تحقیقات کیلئے تیار ہیں۔

Pakistan Army denies role in Indian troops brutal killing