آسامی مسلمانوں کے قتل کے لئے مودی ذمہ دار - عمر عبداللہ

3/مئی سرینگر پی۔ٹی۔آئی

جموں و کشمیر کے چیف منسٹر عمرعبدالہ نے آسام میں تشدد جس میں32مسلمان ہلاک ہوگئے کے لئے آج نریندر مودی کو ذمہ دار قرار دیا ۔ عمر عبداللہ نے بارہمولہ حلقہ لوک سبھا میں واقع تنگ مارگ میں ایک انتخابی جلسہ سے خطاب کرتے ہوئے کہا کہ آسام میں30مسلمانوں کا قتل کیا گیا ۔ کیوں؟ اس لئے کہ بی جے پی کے وزارت عظمیٰ کے امیدوار نریندر مودی نے وہاں تقریر کرتے ہوئے مسلمانوں کے خلاف عوام کو بھڑکانے کی کوشش کی ۔ یہ ایک حقیقت ہے ، س سچائی کی تردید نہیں کی جاسکتی ۔ مودی نے 3روز قبل آسام میں اپنی انتخابی تقریر میں اس ریاست میں مقیم تمام مسلمانوں کو بنگلہ دیشی قرار دیا تھا جس کے نتیجے میں ان پر حملے گئے گئے۔ انہوں نے کشمیری پنڈتوں کی نقل مکانی کے لئے نیشنل کانفرنس کے قائدین کو ذمہ دار قرار دینے کے ضمن میں مودی کے بیان کا حوالہ دیتے ہوئے کہا کہ بی جے پی قائدین ملک کے تمام کشمیریوں کی اہانت پر تلے ہوئے ہیں۔ عمر نے بی جے پی پر الزام عائد کیا کہ وہ جموں و کشمیر کو تین حصوں میں تقسیم کرنا چاہتی ہے ۔ واضح رہے کہ بارہمولہ اور لداخ لوک سبھا حلقوں میں7مئی کو ووٹنگ مقرر ہے۔

دریں اثناء پی ٹی آئی کی ایک علیحدہ اطلاع کے بموجب بی جے پی نے آج آسام میں تشدد کے لئے ریاست اور مرکزی کانگریس حکومتوں کی ووٹ بینک سیاست کو ذمہ دار ٹھہرایا اور الزام لگایا کہ انہوں نے قبل ازیں ایسے ہی دو واقعات کے بعد فسادات کو روکنے کے لئے بروقت مناسب اقدامات نہیں کئے۔ پارٹی نے وزیر اعظم منموہن سنگھ پر سوال اٹھایا کہ انہوں نے ریاست میں موثر نظم و قانون کو یقینی بنانے کے لئے گزشتہ 10سال میں کیا کیا ہے؟ جہاں بوڈو اور بنگلہ دیشی تارکین وطن کے درمیان کئی بار جھڑپوں کے واقعات پیش آئے ۔ منموہن سنگھ راجیہ سبھا میں آسام کی نمائندگی کرتے ہیں ۔ بی جے پی لیڈر روی شنکر پرساد نے صحافیوں کو بتایا کہ بی جے پی کل ہونے والے تشدد کی پرزور مذمت کرتی ہے جس میں کئی جانیں ضائع ہوئی ہیں ۔ قصورواروں کو گرفتار کیاجانا چاہئے ۔ اس دوران کولکتہ سے موصولہ اطلاع کے مطابق بنگلہ دیشی تارکین وطن کے بارے میں نریندر مودی کے تبصرہ کی وضاحت کرتے ہوئے بی جے پی نے کہا کہ پارٹی مرکز میں اقتدار پر آنے کے بعد بنگلہ دیش کے تمام غیر قانونی مسلم تارکین وطن کو ملک سے باہر کردے گی ۔ بی جے پی کے قومی ترجمان سدھارتھ ناتھ سنگھ نے صحافیوں کو بتایا کہ بنگلہ دیش میں اکثریت مسلمانوں کی ہے اگر وہ ہندوستان میں غیر قانونی طور پر داخل ہوتے ہیں تو انہیں غیر قانونی تارکین وطن سمجھا جائے گا اور انہیں16مئی کے بعد ہندوستان سے باہر کردیا جائے گا۔ مودی نے یہی کہا ہے۔

Assam violence: Omar Abdullah blames Modi