دبئی ثالثی کے بغیر سونا براہ راست خریدا جائے - ہند کا سعودی سے مطالبہ - Taemeer News | A Social Cultural & Literary Urdu Portal | Taemeernews.com

2014-01-31

دبئی ثالثی کے بغیر سونا براہ راست خریدا جائے - ہند کا سعودی سے مطالبہ

saudi-india-gold
ہندوستان نے سعودی تاجروں سے مطالبہ کیا ہے کہ دبئی کی ثالثی کے بغیر ہندوستان سے براہ راست سونا خریدیں۔ سونے کے زیورات کے سعودی تاجر ہندوستانی تاجروں سے دبئی کے توسط سے سامان خرید رہے ہیں۔ اترپردیش میں الماس اور زیورات کی برآمدات کی حوصلہ افزائی کرنے والی کونسل کے چئرمین انل سنکوال نے سعودی اخبار "الاقتصادیہ" کو بتایا کہ ہم چاہتے ہیں کہ سعودی تاجر دبئی کے بجائے براہ راست ہندوستان سے سونا اور سونے کے زیورات کا لین دین کریں۔ انہوں نے خواہش ظاہر کی کہ دونوں ملکوں کے عہدیدار اس ضمن میں میٹنگ کریں۔ خصوصاً سعودی ایوان ہائے صنعت و تجارت کونسل اس معاملے کو ٹھوس بنیادوں پر حل کرنے کے لیے کاروائی کرے۔
انل نے سعودی تاجروں سے دریافت کیا کہ آخر آپ لوگ ہندوستانی سونا خریدنے کے لیے دبئی کیوں جاتے ہیں۔ آپ براہ راست ہندوستان کیوں نہیں آتے؟ جو کاروبار بلاواسطہ ہو سکتا ہے ، اس کے لیے واسطوں کے چکر میں کیوں پڑا جائے؟ انہوں نے یہ بھی بتایا کہ سونے کی 24 فیصد برآمدات کا تعلق خلیج سے ہے۔ سعودی عرب ہندوستانی برآمدات کے حوالے سے ہند کا چوتھا بڑا شریک ہے۔ علاوہ ازیں ہندوستان سعودی برآمدات کے حوالے سے پانچواں بڑا شریک مانا جاتا ہے۔
انل سنکوال نے توجہ دلائی کہ ہندوستان پوری دنیا میں الماس کی صنعت میں قافلہ سالار کی حیثیت رکھتا ہے۔ عالمی سطح پر چمکائے ہوئے الماس کا بازار قیمت کے حساب سے ہندوستان کے پاس 70 فیصد تک کا ہے۔ ہندوستان کے قونصل جنرل فیض احمد قدوائی نے کہا کہ قونصلیٹ کے عہدیدار سونے کے زیورات کی نمائش میں ہندوستان جانے کے خواہشمند سعودی تاجروں کو تمام سہولتیں فراہم کرنے کے پابند ہیں۔ اس حوالے سے انہیں جو مشکلات پیش آئیں گی ، انہیں ممکنہ حد تک دور کیا جائے گا۔

Buy gold direct - India demands Saudi Arabia

کوئی تبصرے نہیں:

ایک تبصرہ شائع کریں