بحیثیت وزیر اعلیٰ دہلی کجریوال کی حلف برداری تقریب

14/فروری نئی دہ لی آئی اے این ایس

قائد عام آدمی پارٹی (اے اے پی) اروند کجریوال نے آج یہاں رام لیلا میدان میں منعقدہ ایک شاندار اور متاثر کن تقریب میں چیف منسٹر دہلی کی حیثیت سے اپنے عہدہ اور رازداری کا حلف لیا اور شہر دہلی کو ملک کا رشوت ستانی سے پاک پہلا شہر بنانے کا وعدہ کیا ۔ اس تقریب میں ہزاروں افراد نے شرکت کی ۔ رام لیلا میدان شرکاء سے کھچا کھچ بھرا ہواتھا۔ کجریوال نے دہلی ایک کو ایک مکمل ریاست کا درجہ دینے کی ضرورت پرزور دیا ۔ لیفٹنینٹ گورنر دہلی نجیب جنگ نے کجریوال اور ان کے6کابینی رفقاء کو عہدہ اور رازداری کے حلف دلائے ۔46سالہ کجریوال نے چیف منسٹر دہلی کی حیثیت سے دوسری بار حلف لیا ہے۔ انہوں نے بتایا کہ وہ دہلی کو ترقی دلانے کے طریقوں پر بی جے پی اور کانگریس کے قائدین سے وقتاً فوقتاً مشورے کرتے رہیں گے ۔ کجریوال اور ان کے رفقاء کے حلف لینے کے بعد سارا میدان تالیوں کی زبردست شور سے بار بار گونجتا رہا ۔ کجریوال نے زور دار تالیوں کی گونج کے بیچ کہا کہ’’ اقتدار پر ہمارے پہلے49دنوں کے بعد اب ہمیں یہ اعتماد ہے کہ ہم دہلی سے رشوت ستانی کا صفایا کردیں گے ۔ ہمیں دہلی کو ملک کا رشوت ستانی سے پاک پہلا شہر بنانا ہے ۔ چیف منسٹر نے اپنے وزراء اور ارکان مقننہ و نیز اے اے پی رفقاء پر بار بار زور دیا کہ وہ حکمراں پارٹی کے ارکان کی حیثیت سے ذرا بربر بھی تکبر یا گھمنڈ نہ دکھائیں ۔ یہ تکبرہی تھا جس نے کانگریس اور بی جے پی کو تباہ کردیا۔ ہمیں مسلسل اپنا محاسبہ کرتے رہنا ہوگا ۔ اگر ہمارے اندر گھمنڈ پید اہوجائے تو ہم اپنے مشن کی تکمیل نہیں کرسکیں گے ۔‘‘کجریوال نے جو گذشتہ چندروز سے بخار میں مبتلا ہیں، تالیوں کی گونج کے بیچ بتایا کہ وہ کروسین(کی گولی) کھاکر یہاں آئے ہیں ۔ کجریوال نیدہلی کے انتخابات میں سنسنی خیز کامیابی کے بعد بعض اے اے پی قائدین کے دئیے گئے ان بیانات پر تنقید کی کہ اب یہ پارٹی بہت جلد ، دیگر ریاستوں میں پھیل جائے گی۔ انہوں نے کہاکہ ان ریماکس سے بھی تکبر کی بو آتی ہے ۔’’خدا نے ہمیں حکم دیاہے، دہلی کے عوام نے ہمیں خدمت کا حکم دیا ہے ۔ آنے والے تمام5 برسوں میں ہم دہلی کے عوام کی خدمت ہی کریں گے ۔‘‘ انہوں نے کہا کہ دہلی پولیس اگرچہ ہمارے کنٹرول کے تحت نہیں آتی، انہیں یقین ہے کہ اس پولیس کی مدد سے ہماری حکومت، دہلی کو تمام مذاہب اور فرقہ جات کے لوگوں کے لئے ایک محفوظ شہر بناسکے گی ۔ کجریوال نے حالیہ عرصہ میں دہلی میں چرچوں پر حملوں کا ذکر کرتے ہوئے ایسے واقعات پر فکر مندی کااظہار کیا۔ چیف منسٹر نے کہا کہ میں نے وزیر اعظم نریندر مودی سے کہا ہے کہ اے اے پی ، مرکزی حکومت کے ساتھ ’’تعمیری تعاون‘‘ کی علمبردار ہے اور اب وقت آچکا ہے کہ دہلی کو مکمل ریاست کا درجہ دیاجائے۔ کجریوال نے بتایا کہ وہ کرن بیدی کا حد درجہ احترام کرتے ہیں اور انہیں اپنی بڑی بہن سمجھتے ہیں۔ انہیں کافی انتظامی تجربہ ہے ، ہم انہیں ساتھ لے کر چلیں گے اور وقتاً فوقتاً ان سے رہنمائی حاصل کرتے رہیں گے۔( یہاں یہ تذکرہ بے جا نہ ہوگا کہ بی جے پی نے کرن بیدی کو امید وار چیف منسٹری کی حیثیت سے پیش کیا تھا لیکن بیدی کو حلقہ کرشنا نگر سے شکست ہوگئی) کجریوال نے کہا کہ وہ اجئے ماکن سے بھی رہنمائی حاصل کرتے رہیں گے کیونکہ وہ ایک سابق مرکزی وزیر کی حیثیت سے دہلی وک ترقی دینے کے معاملہ میں تجربہ رکھتے ہیں ۔(اجئے ماکن نے دہلی انتخابات میں کانگریس کی قیادت کی تھی ۔)

’’انسان سے انسان کا ہو بھائی چارہ‘‘ کجریوال کے لبوں پر مناڈے کا گیت
آئی اے این ایس
چیف منسٹر دہلی اروند کجریوال نے آج تقریب حلف برداری کے بعد اپنی تقریر کا اختتام گلوکار مناڈے کے گائے ہوئے مشہور گیت’’ انسان سے انسان کا ہو بھائی چارہ‘‘ یہی پیغام ہمارا۔‘‘ کے چند اشعار گاتے ہوئے کیا۔ کجریوال نے زبردست تالیوں کی گونج میں بڑی خوش اسلوبی سے یہ گیت گایا جس کو سامعین نے دہرایا ۔ بالی ووڈ فلم’’ پیغام‘‘ کے لئے یہ گیت کم و بیش نصف صدی قبل گیت کار پردیپ نے لکھا تھا ۔ دسمبر2013میں بھی اپنی تقریب حلف برداری کے دوران ایک گیت گاتے ہوئے کجریوال نے گویا روایت کو توڑا تھا کیونکہ اس وقت تک ہندوستان کی کسی ریاست کے چیف منسٹر نے ایسا قدم نہیں اٹھایا تھا ۔ آج پھر ایک بار انہوں نے گیت گاتے ہوئے ’’عادم آدمی‘‘ کے ساتھ اپنی یگانگت کا اظہار کیا۔

قائدین کا عام آدمی جیسا لباس
پی ٹی آئی
صد ر عام آدمی پارٹی اروند کجریوال اور ان کے وزارتی رفقاء ، جنہوں نے آج عہدہ رازداری کا حلف لیا، ایک عام آدمی کی طرح کے لباس پہنے ہوئے تھے ۔ اس طرح اس پارٹی کے فلسفہ کی عکاسی ہوتی تھی ۔ کجریوال ’’آسمانی رنگ کا سوئٹر اور بھورے رنگ کا پتلون زیب تن کئے ہوئے تھے اگرچہ آج انہوں نے اپنا ٹریڈ مارک مفلر استعمال نہیں کیا تھا۔ وہ’’مفلر مین‘‘ کی حیثیت سے بھی شہرت رکھتے ہیں ۔ آج دھوپ تھی اور موسم گرم تھا غالباً اس لئے انہوں نے مفلر استعمال نہیں کیا۔ کجریوال اور دیگر 6وزراء نے ہندی میں ایشور کے نام پر حلف لیا ۔ ہر حلف برداری پر فضا ، زبردست تالیوں کے شور سے گونجتی رہی ۔ اے اے پی وزراء ، پارٹی ٹوپیاں زیب سر کئے ہوئے تھے جن پر ہ ندی میں ’’میں عام آدمی ہوں‘‘ تحریر درج تھی ۔ 6وزراء میں منیش سسوڈیا ، ستیندر جین اور عاصم احمد خان نے شرٹس اور پتلون پہن رکھے تھے جب کہ مابقی وزراء نے سیاستدانوں کے روایتی لباس کرتا پاجامہ اور نہرو جیاکٹ پہنچ رکھے تھے ۔

کجریوال دہلی سکریٹریٹ پہنچ گئے
پی ٹی آئی
چیف منسٹر دہلی اروند کجریوال آج حلف لینے کے بعد دہلی سکریٹریٹ پہنچ گئے اور سینئر عہدیداروں و نیز اپنے وزارتی رفقاء سے بات چیت کی ۔ کجریوال کے ساتھ وزراء منیش سسوڈیا، عاصم احمد خان ، سندیپ کمار، ستیندرجین، گوپال رائے اور جتیندرسنگھ ٹومار بھی تھے۔ سمجھاجاتا ہے کہ چیف منسٹر نے اپنے دفتر میں اپنے وزارتی رفقاء کے ساتھ مستقبل کی حکمت عملی پر تبادلہ خیال کیا۔ سرکاری عہدیداروں نے کجریوال اور دیگر وزراء کی سکریٹریٹ میں آمد کا خیر مقدم کیا ۔ حلف برداری کے فوری بعد کجریوال نے رام لیلا میدان پر زبردست اجتماع سے خطاب کیا اور اپنی حکومت کی ترجیحات کا اظہار کیا ۔ ان میں رشوت ستانی اور فرقہ پرست عناصر کے خلاف اقدامات شامل ہیں ۔

بالی ووڈ اداکار بھی موجود
پی ٹی آئی
تاریخی رام لیلامیدان پر جہاں آج قائد اے اے پی اروند کجریوال نے بحیثیت چیف منسٹردہلی حلف لیا، بالی ووڈ کی کئی ممتاز شخصیتوں اور اداکاروں کو دیکھا گیا ۔ ادکارہ گل پناگ اور ادکار جاوید جعفری نے اے اے پی کے ٹکٹ پر لکھنو سے مقابلہ کیا تھا ۔ ادکار ایوب خان اور شیکھر سمن بھی رام لیلا میدان پر موجود تھے ۔ جاوید جعفری نے جو آج صبح کی اولین ساعتوں میں دہلی پہنچے تھے ، کہا کہ ’میں یہاں رام لیلا میدان پر اس لئے آیاہ وں کہ اس یاد گار لمحہ پر موجود رہوں ۔ ہم یہاں سیاست کرنے نہیں آئے ہیں بلکہ اس کو بدلنے آئے ہیں۔‘شیکھر سمن نے کہا کہ رام لیلا میدان پر ان کا دورہ ان کی دلی آواز پر مبنی ہے ۔ میں صبح نیند سے بیدار ہوا اور یہاں چلا آیا ۔ میں اس شخص(کجریوال) کو دیانتداری اور لچکدار رویہ کے سبب پسند کرتا ہوں ۔

عاپ حکومت دہلی کو گلوبل شہر بنانے کے قابل: انڈیا انکلوژیو
پی ٹی آئی
ہندوستانی صنعت نے اعتماد جتایا کہ عاپ حکومت قومی راجدھانی کو گلوبل شہر بنانے اور تجارت کرنے میں سہولت کو بڑھا کر سرمایہ داروں کو راغب کرنے کے قابل ہوگی۔ پی ایچ ڈی چیمبر نے نئے وزیر اعلیٰ اروند کریوال سے اپیل کی کہ وہ ضروریات زندگی جیسے بجلی، پانی کی قیمتوں میں کمی کرنے پر زور نہ دیں کیونکہ اس سے نقصان پہنچے گا ۔ اسوچام صدر رانا کپور نے کہا کہ کجریوال کا عام آدمی سے رابطہ لمبے عرصہ تک عوامی طاقت کی ترجمانی کرے گا جس سے صنعت اور معاش پربڑا فرق مرتب ہوگا ۔ چیمبر کے مطابق عاپ کی حکومت کاروبار کرنے کے لئے آسانی فراہم کرنے میں کامیاب ہوگی اور نئے سرمایہ داروں کو راغب کرنے میں کامیاب ہوگی کیونکہ راجدھانی میں بہترین انفراسٹرکچر مہیا ہے ۔

چیف منسٹر دہلی کجریوال کوئی قلمدان نہیں رکھیں گے
پی ٹی آئی
رام لیلا میدان میں چیف منسٹر دہلی کی حیثیت سے حلف لینے کے فوری بعد عام آدمی پارٹی سربراہ اروند کجریوال نے آج اپنے کابینی وزراء کو قلمدان الاٹ کیے اور اپنے قریبی رفیق منیش سسوڈیا کو ڈپٹی چیف منسٹر مقررکیا ۔ چیف منسٹر کی زیر صدارت دہلی سکریٹریٹ میں منعقدہ اجلاس کے بعد سسوڈیا نے کہا کہ مجھے ڈپٹی چیف منسٹر کی حیثیت سے کامکرنے کے لئے کہا گیا ہے ۔ میں ان وزارتوں پر بھی نظر رکھوں گا جو کسی اور وزیر کوالاٹ نہیں کی گئی ہے ۔ کجریوال نے میڈی سے خطاب نہیں کیا کیوں کہ ان کی طبیعت ٹھیک نہیں ہے ۔ سسوڈیا محکمۂ فینانس و منصوبہ بندی، تعلیم، شہری ترقی اورمحکمہ مال کی زمہ داری سنبھالیں گے ۔ انہوں نے بتایا کہ گوپال رائے کو ٹرانسپورٹ ، ترقی ، لیبر ، جنرل ایڈ منسٹریشن اور روزگار کی(وزارتوں کی)ذمہ داری دی گئی ہے ۔ ستیندر جین، وزارت برقی، صحت ، صنعت ، پی ڈبلیو ڈی و آبپاشی اور سیلاب پر قابو پانے کے محکمہ کے انچارج ہوں گے ۔ سسوڈیا نے بتایا کہ جتیندر سنگھ تومار کو وزارت قانون و انصاف ،داخلہ، سیاحت آرٹ، اینڈ کلچر کی ذمہ داری دی گئی ہے ۔ سسوڈیا نے مزید کہا کہ عاصم احمد خان، تغذیہ و سیول سپلائی ، ماحولیات و جنگلات اور انتخابی محکموں کے ذمہ دار ہوں گے ۔ سندیپ کمار کو وزارت برائے ترقی و بہبود خواتین و اطفال ، زبان ، ایس سی، ایس ٹی کو ترقی کی وزارتیں الاٹ کی گئی ہیں۔ سسوڈیا نے کہا کہ کجریوال نے اپنے لئے کوئی وزارت نہیں رکھی ہے ۔ وہ ہر وزارت اور محکمہ کی کارکردگی کی نگرانی کریں گے ۔ ڈپٹی چیف منسٹر نے مزید کہا کہ کجریوال ، تین اہم شعبوں کے انچارج ہوں گے ۔ وہ وزارتوں کی موثر کارکردگی اور ان کی نگرانی ، عصری ٹکنالوجی استعمال کرتے ہوئے نظام میں تبدیلی لانے اور دہلی کے عوام سے راست طور پر مربوط ہونے کے کام کے انچارج ہوں گے ۔ سسوڈیا نے کہا کہ چیف منسٹر دہلی ، نظام میں تبدیلی لانے کے لئے کام کرنا چاہتے ہیں ۔ کجریوال کی تمام تر توجہ آئندہ پانچ سال تک موثر انداز میں حکومت چلانے پر مرکوز رہے گی۔

ٹیم کارکن کے چیف منسٹر دہلی بننے پر فخر: انا ہزارے
اسی دوران رالے گان سدھی سے موصولہ اطلاع کے مطابق انسدادِ رشوت ستانی جہد کار انا ہزارے نے آج اروندکجریوال کو مبارکباد دی اور کہا کہ انہیں اس بات پر فخر ہے کہ ان کا ایک کارکن، دہلی کاچیف منسٹر بن گیا ہے۔ انا ہزارے نے یہاں نامہ نگاروں کو بتایاکہ میں نے ووٹوں کی گنتی کے دن بھی کجریوال کو مبارکباد دی تھی ۔ میں چیف منسٹر دہلی کی حیثیت سے حلف لینے پر انہیں ایک بار پھر مبارکباد دیتا ہوں ۔ مجھے فخر ہے کہ ہمارے ایک کارکن نے دہلی میں حکومت بنائی ہے ۔

Delhi chief Arvind Kejriwal swears to end 'VIP culture'