U.S. House of Representatives passed new laws limiting NSA collecting phone records of people
امریکی ایوان نمائندگان نے خفیہ ادارے نیشنل سیکوریٹی ایجنسی(این اایس اے) کی جانب سے امریکی شہریوں کے ٹیلی فون ڈاٹا کی بڑے پیمانے پر ریکارڈنگ محدود کرنے سے متعلق ایک قانون منظور کرلیا ہے ۔’’یو ایس اے فریڈم ایکٹ‘‘ نامی مجوزہ قانون کی حمایت کرنے والے ارکان کانگریس کاموقف ہے کہ اس کے نتیجے میں نجی زندگی کے احترام اور قومی سلامتی کے تحفظ کے درمیان توازن قائم رکھنے میں مدد ملے گی ۔ کل ہوئی رائے شماری میں ایوان نمائندگان نے مجوزہ قانون کو121کے مقابلہ میں303ووٹوں کی بھاری اکثریت سے منظور کرلیا ۔ قانون کی حمایت میں ووٹ دینے والوں میں ڈیمو کریٹس کے ساتھ ساتھ ری پبلکن ارکان بھی شامل تھے جس کے باعث اس تاثر کو تقویت ملی ہے کہ دونوں جماعتیں خفیہ اداروں کی جانب سے عام شہریوں کی نجی زندگی میں مداخلت کو قاعدہ قانون کا پابند بنانا چاہتی ہیں۔ این ایس اے کے سابق کنٹراکٹر ایڈورڈ اسنوڈین کی جانب سے کئے گئے انکشافات کے بعد امریکہ میں اس ضمن میں ہونے والی یہ پہلی قانون سازی ہے۔ بل کے حامی ارکان کا موقف ہے کہ اس نوعیت کی قانون سازی کے نتیجہ میں جہاں ایک جانب امریکی اداروں کی انٹلی جنس کارروائیوں کا تحفظ ہوسکے گا وہیں نجی زندگیوں میں سرکاری اداروں کی بے جا مداخلت کا راستہ بھی روکا جاسکے گا تاہم بل تجویز کرنے والے ایک قانون ساز سمیت ایوان کے کئی ارکان کا موقف ہے کہ بل کو منظوری کے لئے ایوان میں پیش کرنے سے قبل کمیٹیوں میں بحث کے دوران مسودہ میں شامل کئی اہم دفعات کو نکال دیا گیا ہے جس سے قانون کی افادیت کم ہوگئی ہے۔ قانون کے تحت ٹیلی فون کمپنیوں کو امریکی شہر یوں کا ٹیلی فون ریکارڈ18ماہ تک محفوظ رکھنے کا پابند کیا گیا ہے ۔ ان کمپنیوں کو دہشت گردی سے متعلق تحقیقات کے دوران عدالتی حکم پر این ایس اے کو اس ریکارڈ تک رسائی بھی دینی ہوگی ۔ اس سے قبل یہ ڈاٹا این ایس اے کے پاس محفوظ ہوتا تھا اور ٹیلی فون کمپنیاں تمام ڈاٹا ایجنسی کو فراہم کرنے کی پابند تھیں ۔ صدر بارک اوباما بھی اس مسودہ قانون کی حمایت کرتے رہے ہیں تاہم ماضی میں اس بل کی حمایت کرنے والی ٹیکنالوجی کمپنیاں اور شہری آزادیوں کے تحفظ کی انجمنیں اب اس کی حمایت سے دستبردار ہوگئی ہیں ۔ ان کمپنیوں اور انجمنوں کا موقف ہے کہ سخت گیر نظریات کے حامل ارکان کانگریس کی حمایت کے حصول کی غرض سے بل کی کئی اہم شقیں قربان کردی گئی ہیں ۔ ایوان نمائندگان سے منظوری کے بعد اب قانون سینیٹ میں پیش کیا جائے گا جہاں امکان ہے کہ اس پر ایک بار پھر نئے سرے سے بحث و مباحثہ کا آغاز ہوگا۔
کوئی تبصرے نہیں:
ایک تبصرہ شائع کریں