85 لاکھ روپے سے زائد کی تاریخی خریداری کے ساتھ مالیگاؤں اردو کتاب میلے کا اختتام - Taemeer News | A Social Cultural & Literary Urdu Portal | Taemeernews.com

2014-01-13

85 لاکھ روپے سے زائد کی تاریخی خریداری کے ساتھ مالیگاؤں اردو کتاب میلے کا اختتام

malegaon-urdu-book-fair
12جنوری2014مالیگاؤں سوسائٹی آف ایجوکیشن ممبئی اور باسبانِ ادب ممبئی کے اشتراک سے قومی کونسل برائے فروغ اردو زبان کے تحت چلنے والا دس روزہ اردو کتاب میلہ تاریخی کامیابی کے ساتھ اختتام پذیر ہوا،جوجوش و خروش کتاب میلے کے پہلے دن دیکھاگیا وہ آج بھی دیکھا گیا ۔آج کتاب میلے کے آخری دن قومی کونسل کی جانب سے کونسل کے ڈائریکٹرپروفیسر خواجہ محمداکرام الدین ،پروفیسر عتیق اللہ،پروفیسر انتخاب حمید اور میلے میں شریک ہوئے اور اہلیانِ مالیگاؤں کاشکریہ ادا کیا۔اپنے خطاب میں انھوں نے قومی کونسل کی اسکیموں کے تعلق سے عوام و خواص اور اداروں کو متوجہ کیا اور زیادہ سے زیادہ استفادہ کی درخواست کی،اس موقع سے انھوں نے کتاب میلے کا دورہ کیا ،کتب فروشوں سے ملاقات کی اور قومی کونسل کے نظم و ضبط کا جائزہ لیا۔اسی موقع سے کتب فروشوں نے ان کا پرجوش خیر مقدم کیا اور بہتر نتائج کے لئے کونسل کے اقدامات کی ستائش کی۔اہالیانِ شہر کی کثیر تعداد اس دوران ان کے ہمراہ تھی ۔میزبان اسکول کے چےئر مین جناب نہال احمد ،انصاری محمد سر،امتیاز خلیل اور دیگر عمائدین نے انھیں مالیگاؤں میں اردو اسکول،ذریعہ تعلیم ،تعلیمی و ثقافتی سرگرمیوں کے بارے میں بتایا۔اس موقع سے مالیگاؤں سوسائٹی آف ایجوکیشن کے مالیگاؤں صدر دفتر میں ذمہ داران سوسائٹی نے سوسائٹی آف ایجوکیشن کے تعلیمی مقاصد پر روشنی ڈالی اور بتایا کہ سوسائٹی نادار بچوں کی فیس اور تعلیمی مصارف برداشت کرتی ہے۔اس نشست میں قومی کونسل کے ڈائریکٹر پروفیسر خواجہ محمد اکرام الدین نے حکومتی اسکیموں کے ضمن میں طلبہ وطالبات کی کونسلنگ پر زور دیا۔انھوں نے ڈراپ آؤٹ کے مسائل کے حل کے لئے NIOSسینٹر کے قیام پر زور دیا۔جے اے ٹی اسکول کے چےئر مین نہال احمد نے بتایا کہ ہم ڈراپ آؤٹ طلبہ اور کام کاجی طلبہ کیلئے شبینہ؍ نائٹ اسکول بھی چلاتے ہیں تاکہ ان کی ضروریات بھی پوری ہوں اور ان کے تعلیمی تقاضے بھی متاثر نہ ہونے پائیں ۔وہیں ڈائریکٹر قومی کونسل نے ووکیشنل کورسسز اور اسکل ڈیویلپمنٹ کے تحت پاور لوم صنعت پر ایک سرٹیفکیٹ کورس ڈیزائن کرنے کی ضرورت کی جانب بھی اشارہ کیا۔
آج کے اختتامیہ جلسۂ تقسیم انعامات کی تقریب کی صدارت منور پیر بھائی نے فرمائی جبکہ اس میں مہمانانِ خصوصی کی حیثیت سے پروفیسر عتیق اللہ ،حفظ الرحمن انجینئر ،پروفیسر امان اللہ خان، جناب پرساد ہیرے، جناب پرشانت دادا ہیرے ،جناب اقبال درانی ،جناب سنیل کڈاسنے اور جناب جمیل زر والے شریک تھے۔ اس موقع سے قومی کونسل کے ڈائریکٹر جناب خواجہ محمد اکرام الدین نے بیسٹ سیل اور بیسٹ ڈیکوریٹیڈ اسٹال کے تحت ادارہ کتاب الشفاء نئی دہلی اور بیسٹ کلیکشن کے لئے ادرہ الحسنات بکس پرائیویٹ لمیٹیڈ کو انعامات سے نوازا،اس موقع سے اس دس روزہ کتاب میلے کے ثقافتی اور ادبی پروگراموں میں انعام حاصل کرنے والے طلبہ و طالبات کو بھی انعامات سے نوازا گیا۔اس موقع سے قومی کونسل کے ڈائریکٹر جناب خواجہ محمد اکرام الدین نے جے اے ٹی گرلس ہائی اسکول و جونےئر کالج اوراے ٹی ٹی ہائی اسکول اینڈ جونےئر کالج کو مدعو کیااور کہا کہ آپ حضرات ہمارے کمپیوٹر سینٹر کے لئے درخواست دیں، قومی کونسل مالیگاؤں میں اپنی اسکیم کے ذریعے کمپیوٹر مراکز قائم کرے گا۔انھوں نے مزید کہا کہ مالیگاؤں سوسائٹی آف ایجوکیشن کو ہم اردو ؍ عربی سینٹر کے قیام کے لئے مدعو کرتے ہیں کہ آپ ہماری اسکیموں کے تحت ان اردو/عربی مراکز کے لئے درخواست دیں ۔مالیگاؤں اردو لائبریری کو قومی کونسل نے اپنی جملہ دستیاب مطبوعات دینے کاجو وعدہ کیا تھا، اس کی دفتری کاروائی کا حکم دے دیا گیا ہے،وہ کتابیں جلد ہی لائبریری کو مہیا کرا دی جائیں گی۔مالیگاؤں میں صحافت کی تربیت اور خطاطی کی نمائش ،بھی قومی کونسل کے ضابطے کے مطابق زیرِ غور ہے ۔
مالیگاؤں میں اردو کی خدمت پر مامور لائبریریوں کو ہم مدعو کرتے ہیں کہ وہ ہمارے یہاں مفت کتابوں کی اسکیم کے تحت درخواست دیں ،ہم حسبِ ضابطہ کتب کی فراہمی کو یقینی بنائیں گے۔ ہم اور ہماری ٹیم نے ممکن حد تک قومی کونسل کی اسکیموں کا جو تعارف مالیگاؤں میں پیش کیا ہے، اس کی جملہ معلومات ہماری ویب سائٹ پر موجود ہے،مزید ہم نے کونسل کی بیشتر کتب کو بھی اپنی ویب سائٹ پر ڈال دیا ہے،اس سے بھی آپ حضرات مستفید ہو سکتے ہیں۔
قومی کونسل کے تحت اس کتاب میلے میں اب تک کی سب سے تاریخی فروخت (85لاکھ روپئے سے زائد)پر خوشی کا اظہار کیا۔انھوں نے اظہارِ تشکر کے بعد مالیگاؤں سوسائٹی آف ایجوکیشن ممبئی، مالیگاؤں شاخ، پاسبان ادب ممبئیکے میلہ کوآرڈینیٹرجناب امتیاز خلیل اور میلہ کنونیر جناب انصاری محمد سر صاحب ، جناب عبید اعظم اعظمی صاحب اور میزبان اسکول چیئرمین ، اراکین واساتذہ اور اسٹاف، جدید انجمن تعلیم (جے اے ٹی) اور صدر و اراکین، اساتذہ و اسٹاف، انجمن ترقی تعلیم (اے ٹی ٹی) و شہر و اطرافِ شہرسے آئے اردو اسکولوں کے طلبہ ، طالبات، اساتذہ، ذمہ داران اور اراکین (بطور خاص دھولیہ ، جلگاؤں، اورنگ آباد، شہادہ، ایولہ، اکل کواں)، شہر کے جملہ تعلیمی، رفاہی اور اصلاحی انجمنیں ،ادارے اور لائبریریوں، شہری انتظامیہ، کارپوریشن، کمشنر، میئر، ڈپٹی میئر، جملہ کارپوریٹرس، تحصیل دار، پولیس انتظامیہ اور اے ایس پی سنیل کڈاسنے صاحبان کاشکریہ ادا کیا ،آج کا پروگرام کل ہند مشاعرہ کے ساتھ اختتام کو پہنچا۔

malegaon urdu book fair ended

کوئی تبصرے نہیں:

ایک تبصرہ شائع کریں