اقلیتی کالجوں میں مسلم طلبا کو ترجیحاً داخلہ دینے کی ہدایت - حکومت مہارشٹرا

18/جون ممبئی پی۔ٹی۔آئی

حکومت مہاراشٹرا نے سینئر عہدیداروں کو ہدایت دی ہے کہ وہ امدادی اور غیر امدادی اقلیتی کالجس کا وقتاً فوقتاً دورہ کریں اور اس بات کا نگرانی کریں کہ ان کالجوں میں اقلیتی طلبہ کو داخلوں میں ترجیح دی جارہی ہے یا نہیں۔ وہ اقلیتوں سے متعلق قوانین کی پاسداری کررہے ہیں یا نہیں۔ مہاراشٹرا کے وزیر اقلیتی ترقیاتی نسیم خان نے نامہ نگاروں سے بات چیت کرتے ہوئے کہاکہ اڈیشنل چیف سکریٹری اور جوائنٹ سکریٹری کو ہدایت دی گئی ہے کہ وہ اقلیتی اداروں پر کڑی نگرانی رکھیں۔ اگر وہ قوانین کی خلاف ورزی کررہے ہوں تو ان کا اقلیتی موقف برخواست کریں۔ حکومت مہاراشٹرا نے امدادی اور غیر امدادی کالجوں کو ہدایت دی ہے کہ وہ اقلیتی طلبہ کیلئے کوٹہ مختص کریں۔ اس قانون کی اگر خلاف ورزی کی گئی تو ان کے خلاف کارروائی کی جائے ۔ قانون کے مطابق امدادی تعلیمی اداروں کیلئے لازمی ہے کہ وہ 51فیصد اقلیتی طلبا کو اپنے اداروں میں داخلہ دیں۔ غیر امدادی کالجس کیلئے بھی یہی شرط رکھی گئی ہے۔ اگر اقلیتی طلبہ کی تعداد کم ہوتو اس صورت میں اقلیتی ادارے حکومت سے خصوصی درخواست حاصل کرسکتے ہیں تاکہ وہ غیر اقلیتی طلبہ کو داخلہ دے سکیں۔ حکومت کی اجازت کے بغیر وہ اپنے اداروں میں غیر اقلیتی طلبہ کو داخلے دینے کے مجاز نہیں ہیں۔

Minority students' admission: Minister seeks checking of colleges