ماہنامہ کھلونا دہلی - سالنامہ 1971 - پی۔ڈی۔ایف ڈاؤن لوڈ

تعارف رسالہ ٹی۔این۔بی

ادارہ "شمع" (نئی دہلی) کے رسائل میں جہاں فلمی و ادبی رسالہ "شمع" ، خواتین کا ماہنامہ "بانو" ، جاسوسی ادب کا نمائندہ رسالہ "مجرم" شامل تھے وہیں 1948 سے بچوں کے لیے ماہنامہ "کھلونا" بھی جاری کیا گیا تھا جس نے ادب اطفال کی ترویج کے میدان میں اپنی نمایاں شناخت قائم کی۔ اپنے دور کے مشہور و مقبول ادیب و شعرا نے "کھلونا" میں بچوں کے لیے بہت کچھ لکھا تھا۔
"کھلونا" کا ایک یادگار سالنامہ (فروری-1971) تعمیر نیوز کے ذریعے پیش خدمت ہے۔ 163 صفحات کی اس پی۔ڈی۔ایف فائل کا حجم تقریباً 10 میگابائٹس ہے۔
رسالہ کا ڈاؤن لوڈ لنک نیچے درج ہے۔

فروری 1971 کے کھلونا کے اس سالنامے میں جہاں اپنے دور کے مشہور و مقبول ادیب جیسے عصمت چغتائی، واجدہ تبسم، بلونت سنگھ، رام لعل، کوثر چاندپوری، صالحہ عابد حسین، سراج انور، م م راجندر، اظہر افسر، سلامت علی مہدی، غلام احمد فرقت کاکوروی، عادل رشید، م ک مہتاب، ہاجرہ نازلی، ڈاکٹر کیول دھیر وغیرہ نے بچوں کے لیے دلچسپ کہانیاں لکھی ہیں وہیں احمد جمال پاشا، فکر تونسوی اور کنہیا لال کپور جیسے نامور مزاح نگاروں کی مزیدار کہانیاں اور علامہ اقبال، احمد ندیم قاسمی، ساحر لدھیانوی، سلام مچھلی شہری، پریم وار برٹنی، شفیع الدین نیر، رئیس امروہوی، جگن ناتھ آزاد، حسرت جےپوری کا شعری کلام بھی شامل ہے۔ اس کے علاوہ معروف ادیب خواجہ احمد عباس نے بچوں کے چاچا نہرو کے حوالے سے ان کی زندگی کا ایک یادگار واقعہ بھی کہانی کی شکل میں بیان کیا ہے۔

کھلونا کے اس سالنامے کے اداریے میں "اپنی باتیں" کے تحت لکھا گیا ہے ۔۔۔

جب گھر کی فضا عجیب بھید بھری سی ہو جائے۔ گھر کے ایک دو تین آدمی سازشیوں کے سے انداز میں الگ تھلک رہنے لگیں۔ ان کے چہروں پر خوشی کی چاندنی کھلے لیکن زبان سے وجہ ظاہر نہ ہو، وہ الگ کمرے میں کئی کئی گھنٹے گزاریں، سرگوشیوں کے انداز میں ان کی 'واہ واہ' اور ہنسی ابھرے، اور کسی "غیر" کے پہنچتے ہی وہ چپ سادھ لیں ۔۔۔
ہاں، جب گھر کا انداز کچھ ایسا ہو جائے تو اس سے یہ نہ سمجھنا چاہیے کہ ان کا دماغ چل گیا ہے، بلکہ اس کا مطلب صرف یہ ہے کہ یہ "سال نامہ" گھر میں آ چکا ہے اور جن کے ہاتھ پہلے لگ گیا ہے وہ دوسروں کی چھین جھپٹ سے بچنے کے لیے اسے چوری چھپے پڑھ رہے ہیں۔ مزے کی بات یہ ہے کہ ایسی حرکتیں کرنے میں بڑے بچوں سے بھی بازی لے جاتے ہیں۔ سچ پوچھیے تو اس میں ان کا (یا کسی کا بھی) قصور نہیں ہے۔ جب تک شوقین لوگ اپنا اپنا پرچہ الگ نہ خریدیں یہ تو ہونا ہی ہے۔
اردو کے اتنے بڑے بڑے لکھنے والوں نے سال نامے کی محفل میں شرکت کی ہے۔ راگ رنگ، ہنسی مذاق، معلومات، تربیتی تفریح اور اصلاح دل لگی کی ایسی پھلجھڑیاں اس کے ورق ورق پر چھوٹ رہی ہیں کہ ہر ایک کا دل پہلے خود لطف اٹھانے (اور کچھ سیکھنے) کو مچل اٹھتا ہے۔
بعض لکھنے والوں نے ذرا دیر سے اپنے فن پارے بھیجے، پھر گنجائش کا مسئلہ بھی آڑے آتا رہا، اس لیے جی مار کر کئی اچھی اچھی چیزیں روکنی پڑیں۔ انہیں تم آنے والے پرچوں میں پڑھ سکو گے۔
سال نامہ پڑھنے کے بعد اپنی رائے لکھنا نہ بھولنا۔ ہم نے تو اپنی بساط بھر اسے اچھے سے اچھا بنا کر پیش کیا ہے، لیکن اصل فیصلہ تو تمہارا ہے۔۔۔
سال نامہ تمہارے لیے ہی نہیں، تمہارے دوستوں کے لیے بھی بےمثال سوغات ہے۔ اپنے عزیز ترین دوست کو سال میں بارہ بار اپنی محبت بھری یاد دلانے کے لیے 'کھلونا' کی سالانہ خریداری کا تحفہ دو۔ اس کے لیے تمہیں بس یہ کرنا ہے کہ آٹھ روپے 95 پیسے منی آرڈر سے ہمیں بھیج دو اور تحفہ پانے والے کا نام، پتہ لکھ دو۔ سال نامہ رجسٹرڈ ڈال سے بھیج دیا جائے گا اور اس کے بعد بھی گیارہ مہینے تک 'کھلونا' تمہارے خلوص اور پیار کی نشانی بن کر پہنچتا رہے گا۔

کھلونا کا ایک اور سالنامہ ڈاؤن لوڈ کیجیے:
ماہنامہ کھلونا دہلی - سالنامہ 1973 - پی۔ڈی۔ایف ڈاؤن لوڈ

***
نام رسالہ: کھلونا - (سالنامہ) فروری 1971
مدیر: الیاس دہلوی (بانی: یوسف دہلوی)
تعداد صفحات: 163
پی۔ڈی۔ایف فائل حجم: تقریباً 10 میگابائٹس
ڈاؤن لوڈ تفصیلات کا صفحہ: (بشکریہ: archive.org)
Khilauna_Feb-1971.pdf

Direct Download link:

GoogleDrive Download link:

ماہنامہ 'کھلونا' - سالنامہ فروری 1971 :: فہرست
نمبر شمار	تخلیق	تخلیق کار	صفحہ نمبر
1	شہد کی مکھی	علامہ اقبال	6
2	چاچا نہرو	خواجہ احمد عباس	9
3	؟	احمد ندیم قاسمی	13
4	یہ بزرگ	عصمت چغتائی	15
5	گیت	ساحر لدھیانوی	21
6	وہ کون تھا	واجدہ تبسم	23
7	تتلی	سلام مچھلی شہری	27
8	شکاری انکل	بلونت سنگھ	29
9	ایک سچی کہانی	رام لعل	33
10	لاڈلی	پریم وار برٹنی	39
11	نیا کھیل	کنہیا لال کپور	41
12	ہند ہمارا زندہ باد	شفیع الدین نیر	46
13	اگلی نسل کا نور	کوثر چاندپوری	51
14	کاغذ کی ناؤ	رئیس امروہوی	57
15	تمہارا اقبال	صالحہ عابد حسین	59
16	ٹینڈے دادا کا کارنامہ	فکر تونسوی	63
17	بلبل رانی کی گرفتاری اور رہائی	یکتا امروہوی	68
18	ماموں اونٹ	سراج انور	71
19	ننھے داغ اور اونچے کارنامے	کے پی سکسینہ	76
20	جنگل کے بندر	م م راجندر	79
21	بوجھو تو جانیں	جگن ناتھ آزاد	83
22	ہنسنے کی مشق	اظہر افسر	85
23	شیر اور انسان کی دوستی	سلامت علی مہدی	102
24	میرا کھلونا	شمیم کرہانی	107
25	کہاوتوں کی کہانی	غلام احمد فرقت کاکوروی	109
26	مرغا مرغی	نیاز حیدر	113
27	دل چسپ کاشت کاری	اختر علی	115
28	شبراتن بوا	عادل رشید	121
29	نئے ارادے	بسمل سعیدی	125
30	سفید جھوٹ	ڈاکٹر شکیل الرحمن	129
31	ہمارے بچے	حسرت جےپوری	134
32	جگنو میاں کی دم	م ک مہتاب	136
33	چاند کی جوت	ہاجرہ نازلی	139
34	مسٹر اسکاٹ	احمد جمال پاشا	143
35	نیا دور	ثاقب زیروی	149
36	موتی	ڈاکٹر کیول دھیر	151
37	کھلونا	خضر برنی	155

Khilauna magazine Delhi, issue: Feb 1971, pdf download.