مراٹھا مندر میں فلم دل والے دلہنیا لے جائیں گے کی نمائش بند

ممبئی
آئی اے این ایس
اداکار شاہ رخ خان اور اداکارہ کاجول کے درمیان رومانی لمحے، ایک سخت گیر والد کا کردار، ہندوستانی شادیوں کا جوش و خروش اور ہنسی مزاح سے بھرپور ٹرین کا سفر فلم ’’دل والے دلہنیا لے جائیں گے‘‘کا حصہ ہیں ، تاہم اب فلم بین اس سے محروم رہیں گے، کیونکہ ممبئی کی مشہور تھیٹر مراٹھا مندر نے تقریباً20سال بعد اس مشہور فلم کی نمائش بند کردینے کا فیصلہ کیا ہے ۔ مراٹھا مندر کے ڈائرکٹر منوج دیسائی نے بتایا کہ یہ بات سچ ہے کہ ہم نے یہ شو بند کردیا ہے ۔ آج(جمعرات) کی صبح مراٹھا مندر میں ’’د ل والے دلہنیاں لے جائیں گے‘‘ کا آخری شو پیش کیا گیا ۔ واضح رہے کہ اس واحد پر دہ والی تھیٹر میں گزشتہ 20سال سے صبح11:30بجے اس فلم کی نمائش کی جاتی رہی ہے ۔ 1996ء کے فلم فیئر ایوارڈ س تقریب میں اس فلم کو10ایوارڈس حاصل ہوئے تھے ، جن میں بہترین فلم ، بہترین اداکار ، بہترین اداکارہ اور بہترین ڈائرکٹر کے ایوارڈ شامل ہیں ۔ اکتوبر1995ء میں پہلی مرتبہ مراٹھا مندر میں فلم کی نمائش کی گئی تھی اور اس وقت سے اس مشہورسنیما گھر میں فلم کی نمائش مسلسل جاری تھی ۔ وجوہات دریافت کرنے پر منوج دیسائی نے بتایا کہ پہلے ناظرین کی کثیر تعداد اس فلم کا مشاہدہ کرتی تھی جن میں بیرونی ممالک کے لوگ بھی شامل ہوتے تھے ، لیکن اب ناظرین کی تعداد کافی کم ہوچکی ہے ۔ تھیٹر میں1105نشستیں ہیں اور بمشکل100تا200نشستیں پرہورہی تھیں ، جس کی وجہ سے اسے چلانا بے معنی ہوگیا تھا ۔ اس فلم کا ٹکٹ20روپے، 17روپے اور15روپے مقرر کیا گیا تھا جو عام ملٹی پلکسوں کی ٹکٹ شرح سے کافی کم ہے ۔