علی سردار جعفری - شخصیت اور فن - تعارف و تبصرہ

31/مارچ تعارف و تبصرہ کتاب راشد اشرف

نام کتاب : علی سردار جعفری - شخصیت اور فن
مرتبہ: عقیل عباس جعفری
اشاعت: مارچ 2015 ء

اژدہام "کتب" سے انفرادیت کی نوا آئی
اک نئی صدا آئی
راہ شوق میں جیسے راہ رو کا خوں لپکے
اک نیا "جنوں" لپکے

جی ہاں، مکرمی عقیل عباس جعفری کی زیر تذکرہ کتاب پر کی گئی محنت کو دیکھ کر بے اختیار ن م راشد کو یاد کیا۔ اگلی سطور میں بھی تحریف کرکے خیال آتا ہے کہ۔۔۔ ع۔۔ آدمی کا اس کتاب کو پڑھنا تو بعد کی بات ہے، دیکھ کر ہی کیوں نہ سیر ہوجائے۔۔۔۔۔ اور پھر اردو کے معدوم ہونے، کتب بینی کے مٹنے کا غم جاتا رہے۔
آدمی ہنسے دیکھو ، "کتب خانے" پھر بسے دیکھو
تم ابھی سے ڈرتے ہو ؟

صاحبو! بات سیدھی سی ہے۔ کتاب لکھنا اور مرتب کرنا، دو علاحدہ علاحدہ باتیں ہیں۔ مگر موخر الذکر معاملے میں بسا اوقات دیکھا گیا ہے کہ محنت زیادہ درکار ہوتی ہے۔ مگر اس کا ایک فائدہ اور غالباً سب سے اہم یہ ہوتا ہے کہ "ایک ہی چھت" کے نیچے آپ کو اپنی پسندیدہ شخصیت کے بارے میں قیمتی مواد پڑھنے کو مل جاتا ہے۔ مضامین جمع کرنا، ان کا جائزہ لینا، شمولیت کا فیصلہ، لوگوں سے رابطے، اور سب سے بڑھ کر حواشی کا لکھنا اور پھر آخر میں دیدہ ریزی کے مسائل۔ ان مراحل سے بدقت تمام نمٹیے، طباعت کرایے تب کہیں جاکر قاری کو ایک عمدہ کتاب کا تحفہ میسر آتا ہے۔ ان سب سے عہدہ براں ہونے کے بعد مرتب کے حصے میں طمانیت کا احساس تو آتا ہی ہے۔ محنت ٹھکانے لگتی ہے، محققین کو آسانی رہتی ہے، تحریروں کی تلاش میں در در بھٹکنا نہیں پڑتا۔

کتاب کا سرورق بھی منسلک ہے اور فہرست مضامین بھی، اسے تو آپ یقیناً دیکھیں گے مگر گزشتہ کل یعنی 29 مارچ 2015 کی صبح جب عقیل صاحب نے راقم کو کتاب کا نسخہ "پہلا نسخہ" لکھ کر دیا تو جی باغ باغ ہوا۔ دوسرا نسخہ بھی سید معراج جامی صاحب کے لیے گویا پہلا ہی تو تھا۔ "سردار جعفری - شخصیت اور فن" کے حصول کے لیے ہم پرانی کتابوں کے اتوار بازار سے کراچی کی معروف فوڈ اسٹریٹ برنس روڈ کا رخ پہلے ہی کرچکے تھے جہاں لذت کام و دہن کا پورا پورا انتظام تھا۔ انگریزی محاورے کے مصداق ہم نے اس کتاب کا دیدار over a cup of tea کیا تھا۔

پاکستان ہو یا بھارت، اب ترقی پسندوں کا تذکرہ صرف over a cup of tea ہی ہوتا ہے۔

مگر آگے بڑھنے سے قبل جامی صاحب کے تاثرات بھی ملاحظہ کیجیے:
"آج جب میں اور راشد ریگل کے اردو بازار گئے تو تھوڑی دیر بعد یار طرح دار عقیل کا فون آیا کہ آپ لوگ ریگل پہنچ گئے ہیں۔ جواب اثبات میں سن کر بولے میری نئی کتاب علی سردار جعفری (شخصیت اور فن ) کل ہی پرنٹر سے آئی ہے اور میں آپ دونوں کے لیے نسخے لے کر آ رہا ہوں۔ ایسی خبر بلکہ خوش خبری اللہ ہمیں روز سنائے ۔ ہم دونوں نے نیایت اضطراب سے کہا بسر و چشم ۔ تھوڑی دیر بعد عقیل آگئے اور پھر ہم تینوں برنس روڈ کے ایک ہوٹل میں گرما گرم چائے کے ہمراہ آمیٹ پراٹھہ کھا رہے تھے اور کتاب کو نہایت دلچسپی اور خوش گوار حیرت سے دیکھ رہے تھے ۔ علی سردار جعفری پر یہ ایک مکمل حوالی جاتی کتاب ہے ۔ عقیل کے جمالیاتی ذوق کی بھرپور ترجمانی اس کتاب سے ہو رہی تھی ۔ اس کا سرورق ، اس کی ترتیب اور تدوین آنکھوں کو خیرہ کر رہی تھی۔ سرورق پر علی سردار جعفری کی تصویر دیکھ کر ایسا لگ رہا تھا کہ یہ تصویر جعفری صاحب نے خاص اس کتاب کے لیے کھنچوائی ہے ۔ کتاب کا سائز رسالے کا ہے ، کتابت مشینی ہے مگر خوبصورت انداز میں ، طباعت نفیس ہے ۔ غرض ہر لحاظ سے کتاب جعفری کے حسن ذوق کی ترجمانی کر رہی تھی۔ میرا اسکینر اس وقت کام نہیں کر رہا ہے ورنہ کتاب کا پورا عکس دکھاتا۔ اس کتاب کا بھرپور حسن راشد اشرف دکھائیں گے ۔ اس کتاب پر بھی عقیل نے حسب عادت بہت محنت کی ہے ۔ علی سردار جعفری کے خاندان سے روابط کرنے میں ، جگہ جگہ سے مضامین حاصل کرنے میں کتنی دقت اور مشقت اٹھانی پڑی ہے اس کو ایک محقق اور مولف ہی سمجھ سکتا ہے۔"

***
عقیل عباس جعفری نے جب سے ہوش سنبھالا، گھر میں علی سردار جعفری کا ذکر سنا، اور ایسا کیوں نہ ہوتا،
آخر سردار صاحب سے ان کی رشتہ داری بھی تو ہے۔ پھر بقول ان کے یہ ڈھونڈ ڈھونڈ کر سردار جعفری پر لکھی تحریروں کو پڑھا کیے۔ ایک زمانہ علی سردار جعفری کا اسیر تھا پھر ایسے شخص کو دیکھنا، اس سے ملنا کیا کم تھا کہ قدرت نے ایک مرتبہ یہ موقع بھی فراہم کیا کہ عقیل جعفری نے سردار جعفری کے ساتھ کراچی میں مشاعرہ بھی پڑھا۔

"علی سردار جعفری۔شخصیت اور فن" کو 2013 میں سردار جعفری کے صد سالہ جشن ولادت پر شائع ہونا تھا مگر یہ منصوبہ بوجوہ تاخیر کا شکار ہوتا چلا گیا۔ "اوور اے کپ آف ٹی" یہ قصے بھی چھیڑے گئے اور عقیل عباس نے دل کے کچھ پھپھولے بھی پھوڑے مگر چونکہ ان میں کچھ "بے پردہ نشینوں" کے بھی نام آتے ہیں لہذا اس قضیے کو یا تو کسی اور موقع کے لیے اٹھا رکھتے ہیں یا پھر آپ خود ہی عقیل صاحب سے دریافت کرلیجیے گا۔

سچ تو یہ ہے کہ "علی سردار جعفری - شخصیت اور فن" لائق مطالعہ بھی ہے اور لائق محبت بھی۔ سردار جعفری کی مختصر آپ بیتی سے یہ کتاب شروع ہوتی ہے مگر اس سے قبل سردار اور بیگم سردار کی ایک خوب صورت تصویر دیکھ کر جی کھِل اٹھتا ہے جس کا عنوان ہے:
ہر عاشق ہے سردار یہاں
ہر معشوق ہے سلطانہ

پہلا باب ہے "زندگی نامہ" جس کے تمام ہی مضامین اہم ہیں مگر سردار جعفری کی حقیقی بہن ستارہ جعفری
کا تحریر کردہ خاکہ تو لاجواب ہے۔ سردار جعفری کو دنیا ایک ایسے شخص کی حیثیت سے جانتی ہے جس نے تمام زندگی اپنے نظریات پر کاربند رہ کر اور اس کے پرچار میں گزاری مگر مذکورہ خاکے میں ہمیں ان کی نجی زندگی کے کئی دلنشیں پہلو بھی نظر آتے ہیں۔ وہ پہلو جن کو گھر کا ایک فرد ہی بیان کرسکتا ہے۔ ان کی دوسری بہن رباب جعفری کا خاکہ "میرے بھائی" بھی ایک اہم اور دل چسپ تحریر ہے۔

"زندگی نامہ" میں ڈاکٹر قمر رئیس، انور جعفری، خواجہ تصور علی حیدر اور عشرت آفرین کے مضامین و خاکے بھی لائق مطالعہ ہیں جبکہ اسی حصے میں عقیل عباس جعفری نے سردار جعفری کے سوانحی اشارے کے علاوہ دکن کی شاہانہ مریم شان کی اہم کتاب سے سردار جعفری پر ہندوستان کی مختلف جامعات میں ہونے والے ایم فل اور پی ایچ ڈی کے مقالوں کی تفصٰیل کو یک جا کرکے نہایت جامع کام کیا ہے۔

حصہ دوم "خاکے اور مضامین" میں جن مشاہیر کی تحریریں ہیں ان میں شامل ہیں: سبط حسن، سجاد ظہیر، بیدار بخت، شوکت کیفی، ساجد رشید، عبداللہ ملک، باقر مہدی، حمید اختر، صدیق الرحمن قدوائی، مظہر امام، گوپی چند نارنگ، یوسف ناظم اور اٹل بہاری واجپائی ۔۔۔ کہنے کو تو یہ تمام تحریریں ہی رنگا رنگ ہیں اور سردار جعفری کی زندگی کے گوشوں کو بے نقاب کرتی ہیں مگر ان میں کیفی اعظمی کی اہلیہ شوکت کیفی کا لکھا خاکہ خاصامزے دار ہے۔ پر لطف واقعات سے مزین یہ تحریر بلاشبہ ایک یادگار تحریر کہلائے جانے کی حق دار ہے۔ واضح رہے کہ شوکت کیفی اداکارہ ہونے کے ساتھ ساتھ ایک کہنہ مشق ادیبہ بھی ہیں جو اپنی خودنوشت کے سبب ادب میں بھی ایک مقام رکھتی ہیں۔

حصہ سوم کا نام یاروں کے روبرو ہے جس میں سردار جعفری کے انٹرویو شامل ہیں۔
حصہ چہارم "علی سردار جعفری کی منتخب تحریریں" میں مرتب نے سردار جعفری کے دیگر مشاہیر ادب پر لکھے چند اہم مضامین کو یک جا کیا ہے۔

سردار جعفری کی نظریاتی تحریروں پر مشتمل اگلے حصے کا نام "شاعر سردار جعفری" ہے جبکہ "انتخاب شاعری" کے تحت سردار جعفری کا کلام شامل کیا گیا ہے۔

کتاب کے بالترتیب ساتویں اور آٹھویں حصوں کے عنوان ہیں: " سردار جعفری کا فن" اور "رثائی ادب اور سردار جعفری"۔ اول الذکر میں سردار جعفری کے ہم عصروں کے مضامین شامل ہیں۔

کتاب کا آخری باب "گوشہ سلطانہ جعفری" ہے جس میں اول اول سلطانہ جعفری پر بمبئی فلمی صنعت کے معروف کہانی نویس جاوید صدیقی کی حالیہ دلچسپ کتاب روشن دان سے سلطانہ جعفری کا خاکہ شامل کیا گیا ہے جبکہ اس میں چند دیگر لکھنے والوں کی تحریریں شامل ہیں۔

اب کچھ بیان کتاب کی اشاعتی تفصیلات کا:

سچ پوچھیے تو "علی سردار جعفری ۔شخصیت اور فن" کی طباعت، اس کا سرورق اور سب سے بڑھ کر اس کا زردی مائل بہترین، پھسلواں آفسٹ کاغذ دیکھ کر بے اختیار جی چاہتا ہے کہ اسے "ہر قیمت پر" حاصل کرلیا جائے۔
اب سوال یہ ہے کہ یہ "ہر قیمت" آخر ہے کتنی۔ تو عرض یہ ہے کہ کتاب کے معیار کو دیکھتے ہوئے 1200 روپے ادا کرنا کچھ ایسا کھَلتا بھی نہیں۔ آخر ہم دیگر مکروہات پر بھی تو بے دریغ خرچ کرتے ہی ہیں تو کیوں نا ایک عمدہ و دل چسپ کتاب کی خریداری پر کچھ رقم صرف کی جائے۔

کتاب بڑے سائز میں شائع ہوئی ہے اور تعداد اشاعت صرف دو سو ہے۔ اس کے پرنٹر کراچی کے فضلی سنز ہیں جبکہ اسے مرتب نے اپنے ادارے ورثہ پبلی کیشنز سے شائع کیا ہے۔ جلد ہی یہ فضلی سنز اردو بازار کراچی اور کتاب سرائے لاہور پر دستیاب ہوگی۔ جبکہ ہندوستان سے بھی اس کی اشاعت متوقع ہے۔

ورثہ کا رابطہ نمبر و برقی پتہ یہ ہے:
092-21-35346028
virsapublications[@]gmail.com
یہاں مشفق خواجہ مرحوم یاد آرہے ہیں۔ ایک "جان لیوا" کتاب کو دیکھ کر بے اختیار کہہ اٹھے تھے کہ سو گرام کے کاغذ پر دس گرام کی بات کی گئی ہے۔
اتفاق دیکھیے کہ "علی سردار جعفری ۔شخصیت اور فن" کا کاغذ سو گرام کے آس پاس ہی رہا ہوگا مگر یقین رکھیے کہ اس میں موجود پر لطف باتیں، قصے، تاریخی حقائق۔۔۔ چار سو گرام سے کم نہیں۔

حرف آغاز

جب سے آنکھ کھولی ، گھر میں سردار جعفری کا ذکر سنا۔
دادا کی جانب سے میرے بھائی (شاید ففتھ کزن) اور دادی کی جانب سے چچا ( کہ میری دادی سردار جعفری کی سگی خالہ تھیں)۔
بچپن ہی سے سردار جعفری کی تحریریں، ڈھونڈ ڈھونڈ کر پڑھی گئیں ۔ بعد میں چند ادبی نشستوں اور مشاعروں میں رو بہ رو سننے کا موقع بھی ملا اور چند ملاقاتیں بھی ہوئیں ۔ ایک یادگار واقعہ یاد آرہا ہے ۔ کراچی میں بھارتی قونصل خانہ میں مشاعرہ تھا، بھارت اور پاکستان کے معروف شعرا مدعو تھے ۔ ناظم مشاعرہ جب بھی بھارت کے کسی شاعر کو بلاتے تو ان کا تعارف "بھارت سے تشریف لائے ہوئے مہمان شاعر" کے طور پر کرواتے ۔ صدارت، سردار جعفری کی تھی ۔ جب ان کی باری آئی تو انہوں نے سامعین کو مخاطب کیا۔
"یہ ایک مسلمہ سفارتی دستور ہے کہ دنیا کے کسی بھی ملک میں قائم کسی بھی ملک کا سفارت خانہ اس ملک کا حصہ تسلیم کیا جاتا ہے ، جس ملک کا وہ سفارت خانہ ہوتا ہے۔ اس وقت آپ سب حضرات بھارت کے سفارت خانے میں تشریف فرما ہیں ، جو سفارتی اعتبار سے بھارت کا حصہ ہے ۔ سو میں آپ سب کو بھارت کی سر زمین پر خوش آمدید کہتا ہوں ۔ ہم مہمان نہیں، میزبان ہیں اور آپ پاکستان سے تشریف لائے ہوئے مہمان اور مہمان شعرا"۔
سردار جعفری کے ان جملوں سے مشاعرہ کے فضا بالکل تبدیل ہوگئی ۔ یہ سردار جعفری کی خطابت سے میرا پہلا تعارف تھا ۔

1999ء میں سردار جعفری شہر قائد کے عالمی مشاعرے میں شرکت کے لئے آخری مرتبہ پاکستان آئے، تو ان سے نہ صرف کئی یادگار ملاقاتیں رہیں۔ بلکہ مجھے ان کے ساتھ مشاعرے پڑھنے کا اعزاز بھی ملا جس کی آرزو مجھے ایک عمر سے تھی ۔
2013ء میں علی سردار جعفری کی ولادت کا صد سالہ جشن دنیا بھر کے طول و عرض میں منایا گیا ۔ ایسے میں جناب کاظم رضا جعفری کی تحریک پر میں نے یہ کتاب ترتیب دینا شروع کی ۔

اس کتاب میں کوشش کی گئی ہے کہ علی سردار جعفری کی زندگی کے ہر پہلو کا بھرپور احاطہ کیاجائے ۔ اس میں ان کی خود نوشت سوانح بھی شامل ہے اور اعزا اور احبا کے تحریر کردہ سوانحی مضامین بھی۔ ان کی تخلیقات بھی ہیں اور ان کی تخلیقات پر معروف ناقدین کے مضامین بھی ۔ انٹر ویوز بھی ہیں اور رثائی ادب سے ان کے تعلق پر چند مضامین بھی۔ کتاب کا ایک گوشہ ان کی شریک سفر سلطانہ جعفری کے نام ہے ، جن کی محبت اور ہمت نے ہمیشہ سردار جعفری کو مہمیز دی ۔ یہی سبب تھا کہ جب اس کتاب کے انتساب کا مرحلہ در پیش ہوا تو میرے لئے اس کے لئے سلطانہ جعفری سے زیادہ مناسب شخص کوئی نظر نہیں آیا ۔

یہ کتاب اصولاً 2013ء ہی میں شائع ہونی چاہئے تھی مگر بوجوہ اس کتاب کی اشاعت میں دیر ہوتی چلی گئی ۔ بالآخر ایٹکو لٹریری کے جناب فرحان رضا نے اس کتاب کی اشاعت کا بیڑا اٹھایا اور یوں یہ کتاب اب آپ کے ہاتھ میں ہے ۔
کتاب کی تدوین میں بہت سے دوستوں نے میرا ساتھ دیا اور نادر و نایاب تخلیقات اور مضامین کی فراہمی اور کتاب کی پروف ریڈنگ میں میرا ہاتھ بٹایا۔ جن میں جناب سعید اللہ والا (چیئرمین ایٹکو لیبارٹریز) جناب فرحان رضا ( صدر ایٹکو لٹریری سوسائٹی)، جناب کاظم رضا جعفری ، جناب رفیق عباس جعفری، جناب راشد اشرف، جناب آل مہدی جعفری، جناب یدار بخت، جناب سجاد مہدی جعفری، جناب پرویز جعفری ، محترمہ عشرت آفرین ، جناب اسلم ملک ، جناب ناصر جاوید ، جناب محمد امجد ، جناب ظہیر عباس ، محترمہ شاہانہ مریم شان، جناب محمد انیس اور جناب رفیع الزماں زبیری کے نام سرفہرست ہیں ۔ میں ان تمام احباب کا فرداً فرداً ممنون و متشکر ہوں۔

عقیل عباس جعفری
یکم جنوری 2015ء
کراچی

پس ورق

عقیل عباس جعفری کا نام تحقیق کے شعبے میں نیا نہیں ، انہوں نے ابتداء معلومات عامہ کے شعبے سے کی اور اس حوالے سے کئی کتابیں تحریر کیں جن میں۔۔۔ " 366 دن، صفر سے سو تک ، جہان معلومات ، ہے حقیقت کچھ ۔۔۔، ایک سال پچاس سوال، کون بنے گا کروڑ پتی؟ اور قائد اعظم معلومات کے آئینے میں " شامل ہیں ۔
"پاکستان کے سیاسی وڈیرے" پاکستانیات کے موضوع پر ان کی پہلی کتاب تھی، جس نے شائع ہوتے ہی تہلکہ مچا دیا ۔ بعد ازاں عقیل عباس جعفری نے پاکستانیات ہی کے موضوع پر کئی اور کتابیں بھی لکھیں جن میں پاکستان کرو نیکل ، قائد اعظم کی ازدواجی زندگی، پاکستان کی ناکام سازشیں، پاکستان کی انتخابی سیاست، پاکستان کا قومی ترانہ : کیا ہے حقیقت؟ کیا ہے فسانہ؟ اور لیاقت علی خان قتل کیس شامل ہیں ۔ عقیل عباس جعفری نے فن موسیقی پر شاہد احمد دہلوی کے مضامین کو مضامین موسیقی کے نام سے مرتب کیا اور بر صغیر کے آخری داستان گو میر باقر علی داستان گو کے احوال و آثار پر یھی ایک کتاب مدون کی ۔
عقیل عباس جعفری نے ریڈیو پاکستان اور پاکستان ٹیلی ویژن کے لاتعداد پروگرامز کے اسکرپٹس بھی تحریر کئے جن میں سات دن ، ٹی وی انسائیکلو پیڈیا ، ٹیلی شو، برانڈ شو، ہم مصطفوی، یہ تو مجھے بتا ہے ، یونیورسٹی چیلنج ، جہاں نما، ایک سال پچاس سوال ، سارک کوئز ، ملینیم کوئز ، یو۔ این کوئز، جو جانے وہ جیتے ، ہم کسی سے کم نہیں، بیسویں صدی ، سال بہ سال اور رات گئے کے نام سرفہرست ہیں ۔ انہوں نے اے ۔ آر۔ وائی کے پروگرام "کیا آپ بنیں گے کروڑ پتی؟" اور جیو ٹیلی وژن کے پروگرام "یہ گھر آپ کا ہوا" کے سوالات بھی مرتب کئے۔ ان دنوں وہ پرائیویٹ نیوز چینل سے منسلک ہیں ۔

عقیل عباس جعفری کا شمار اپنی نسل کے نمائندہ شعراء میں ہوتا ہے ۔ وہ 2000ء میں ریڈیو پاکستان کا "بہترین نعت گو" اور "بہترین قومی نغمہ نگار" کا ایوارڈ بھی حاصل کر چکے ہیں ۔ وہ بین الاقوامی مشاعروں اور سیمیناروں میں شرکت کے لئے امریکہ، کینیڈا، برطانیہ ، چین، بھارت اور متحدہ عرب امارات کے سفر بھی کر چکے ہیں ۔ ان کی غزلیہ شاعری کا مجموعہ "راستا" اور مذہبی شاعری کا مجموعہ "تروتازہ" زیر اشاعت ہیں۔

تحقیق اور پاکستانیات کے شعبے میں ان کی خدمات کے اعتراف کے طور پر پاکستان کوئز سوسائٹی نے انہیں 2004ء میں کوئز ایکسیلینس ایوارڈ ، 2010ء میں وزڈم پاکستان فورم نے ہیروز آف پاکستان کمال کارکردگی ایوارڈ ، 2012ء میں اے پی این ایس نے بہترین فیچر نگار کا ایوارڈ اور 2014ء میں اے آر وائی ٹی وی نے خاص پاکستانی ایوارڈ عطا کئے ہیں ۔

فہرست مضامین

نمبر شمار	عنوان	مصنف	صفحہ نمبر
زندگی نامہ
1	آپ بیتی	علی سردار جعفری	15
2	راج سنگھاسن ڈانواڈول	علی سردار جعفری	28
3	میرے بھائی	رباب جعفری	32
4	سردار بھائی	ستارہ جعفری	41
5	سردار جعفری کا بلرام پور	رضا جعفری	64
6	بیاض حیات	ڈاکٹر قمر رئیس	70
7	سید علی سردار جعفری	انور جعفری	82
8	سردار جعفری کا زمانہ طالب علمی	خواجہ تصور علی حیدر	92
9	سردار ماموں	رضا جعفری	102
10	علی سردار جعفری	عشرت آفرین	107
11	زندگی کا مختصر سفرنامہ	علی سردار جعفری	114
12	سوانحی اشارے	عقیل عباس جعفری	121
13	کتابیات علی سردار جعفری	عقیل عباس جعفری	126
14	علی سردار جعفری : تحقیقی مقالے	شاہانہ مریم شان	129
خاکے مضامین
15	وطن گلاب	بیکل اتساہی	133
16	سردار جعفری چند یادیں	سبط حسن	137
17	ممبئی میں ترقی پسند تحریک کا منظر نامہ	سید سجاد ظہیر	144
18	آج موسیٰ نہیں ہم سرطور ہیں	بیدار بخت	163
19	سردار جعفری میرے ہمدم میرے دوست	شوکت کیفی	179
20	رومانی انقلاب کا آخری سالار	ساجد رشید	188
21	سردار جعفری ۔۔۔ نصف صدی پہلے کی یادیں	عبداللہ ملک	192
22	سرخ سیاہی کے دائرے میں محصور ۔۔۔ سردار جعفری	باقر مہدی	196
23	عہد عزم و پیکار کی یادگار	صدیق الرحمٰن قدوائی	203
24	اک چراغ اور بجھا	حمید اختر	211
25	شعری اظہار اور سردار جعفری	مظہر امام	216
26	علی سردار جعفری : ترقی پسندی کے تاج کا نگینہ	گوپی چند نارنگ	224
27	علی سردار جعفری کی شخصیت کے کچھ پہلو	یوسف ناظم	229
28	علی سردار جعفری کا اعزاز	اٹل بہاری واجپائی	237
29	علی سردار جعفری معاصرین کی نظر میں	مختلف معاصرین	239
یادوں کے روبرو
30	گفتگو بند نہ ہو	راہی معصوم رضا	241
31	بات سے بات چلے	پینل انٹرویو (روزنامہ جنگ ، لاہور)	270
علی سردار جعفری کی منتخب تحریریں
32	فکر اقبال	علی سردار جعفری	287
33	قبلۂ رندان جہاں (جوش ملیح آبادی)	علی سردار جعفری	295
34	ذکر یار (فیض احمد فیض)	علی سردار جعفری	309
35	ڈاکٹر اختر حسین رائے پوری	علی سردار جعفری	323
36	رقص شرر (سید سجاد ظہیر)	علی سردار جعفری	326
37	بدزبان (سعادت حسن منٹو)	علی سردار جعفری	332
38	کفن بردوش (مجاز)	علی سردار جعفری	336
39	ن۔ م۔ راشد	علی سردار جعفری	346
40	پروین شاکر	علی سردار جعفری	349
41	عشرت آفرین کی شاعری	علی سردار جعفری	352
شاعر سردار جعفری
42	میں اور میرا فن	علی سردار جعفری	369
43	لمحوں کے چراغ (موت زندگی کے آئینے میں)	علی سردار جعفری	374
44	میری شاعری	علی سردار جعفری	402
45	میرا نعرہ روٹی اور کتاب	علی سردار جعفری	408
46	اردو شاعری کا انقلابی مزاج	علی سردار جعفری	412
47	اجودھیا	علی سردار جعفری	418
48	راج بہادر گوڑ کے نام دو خطوط	علی سردار جعفری	421
انتخاب شاعری
49	ٹوٹا ہوا ستارہ	علی سردار جعفری	427
50	آگے بڑھیں گے	علی سردار جعفری	428
51	انتظار نہ کر	علی سردار جعفری	430
52	اودھ کی خاک	علی سردار جعفری	432
53	صبح فردا	علی سردار جعفری	433
54	کون دشمن	علی سردار جعفری	434
55	گفتگو	علی سردار جعفری	436
56	میرا سفر	علی سردار جعفری	437
57	نومبر میرا گہوارہ	علی سردار جعفری	438
سردار جعفری کا فن
58	مقدمہ : کلیات علی سردار جعفری	علی احمد فاطمی	447
59	علی سردار جعفری کی شاعری	پروفیسر وارث علوی	460
60	سردار جعفری کے افسانے	ڈاکٹر ارتضیٰ کریم	482
61	ڈراما اور علی سردار جعفری کی ڈراما نگاری	اکرام بریلوی	487
62	علی سردار جعفری کی ادبی صحافت	پروفیسر محمد انور الدین	490
63	علی سردار جعفری کے مرتبہ کلاسیکی دواوین	ڈاکٹر صاحب علی	501
64	خطیب خوش گفتار : علی سردار جعفری	پروفیسر رفیعہ شبنم عابدی	513
65	سرمایہ سخن	رفیع الزماں زبیری	526
رثائی ادب اور سردار جعفری
66	آو اک بار پھر اس عہد کی تجدید کریں	ڈاکٹر ہلال نقوی	531
67	کربلا ایک رجز	علی سردار جعفری	532
گوشۂ سلطانہ جعفری
68	موگرے کی بالیوں والی	جاوید صدیقی	539
69	ہماری سلطانہ آپا	قرۃ العین حیدر	555
70	سردار جعفری کے خطوط ، سلطانہ کے نام	علی سردار جعفری	557
71	میرا سردار	سلطانہ جعفری	574

***
Rashid Ashraf
ای-میل : zest70pk[@]gmail.com
ویب سائٹ : وادئ اردو

راشد اشرف

A Review on Autobiography of 'Ali Sardar Jafri' by Aqeel Abbas Jafri. Reviewer: Rashid Ashraf